رواية لحظات من الصدمة الفصل الثالث 3 بقلم عمرو راشد
رواية لحظات من الصدمة الجزء الثالث
رواية لحظات من الصدمة البارت الثالث
رواية لحظات من الصدمة الحلقة الثالثة
تتجوزيني؟
= موافقة،، هتيجي تكلم بابا امتا بقا؟
اكلم بابا ازاي،، هو مش ابوكي مات
= مات ايه حرام عليك،، بابا لسة عايش
عايش!!
= مالك يا وليد في ايه؟
ولا حاجة يا حبيبتي انا بس اختلط عليا الأمر
= طب ايه؟،،، احدد معاد مع بابا؟
حددي معاد طبعا
= بكرا؟
بكرا
” بعد ما خلصنا كلامنا قومنا احنا الاتنين ومشيت ركبت معاها العربية عشان اطمن انها وصلت البيت وفعلا زي ما الدكتور قال هي راحت على بيت اهلها القديم
هتعمل ايه دلوقتي انت؟
= في واحد صاحبي جاي ياخدني دلوقتي
طب ما كنت وصلتك انا يا وليد احسن
= وبعد ما توصليني ترجعي لوحدك
اه عادي
= لا طبعا انا بخاف عليكي
طب صاحبك دا جاي امتى؟
= شوية وهييجي،، اطلعي انتي وانا هستناه هنا في اي كافيه
طب خلي بالك من نفسك
= خلي أنتي بالك من نفسك
متقلقش عليا ومتتأخرش بكرا
= عمري ما اتأخر،، يلا اطلعي وانا هكلمك
هو انت جيبت رقمي منين؟
= من…،، هو معايا اصلا من الاول لاني كنت بعمل عليكي مراقبة شاملة ف كان لازم يبقا معايا رقمك
ايوا منين يعني؟
= لا معلش دي مصادري الخاصة مقدرش اقول عنها حاجة بس ممكن بعد الجواز اقولك
خلاص مش عايزة اعرف
= بس انا عايز اتجوزك
” اتكسفت وبصت في الارض لكن حاولت تداري دا بسرعة وقالتلي
مش ملاحظ انك اتأخرت؟
= على مين؟
على صاحبك
= يولع صاحبي المهم انتي
يلا يا وليد
= يلا عشان خاطرك انتي بس
” بعد ما شوفتها وهي بتطلع شاورت ل دكتور سامح يقرب بالعربية لانه طبعا كان ماشي ورانا بالعربية بتاعتي،، ركبت معاه العربية و رجعنا على البيت
دي بتقولي اروح اكلم ابوها يا سامح
= وفيها ايه وليد ما تروح تكلمه عادي
انت هتجنني انت كمان،، ابوها متوفي من سنتين
= مش جايز عايزاك تروح تكلمه في المقابر؟
طب ما انزل اشرب معاه شاي احسن
= والله واجب برضو
انا مش ناقص جنان يا سامح بالله عليك
= يا حبيبي الموضوع بسيط،، هي رجعت بالزمن ل ورا ف طبيعي جدا أنها تتخيل ان ابوها عايش
وهو اللي انت بتقوله دا يطمن؟
= طبعا لا
وبتقوله ليه؟
= بشرحلك الحالة
حالة ايه اللي تشرحها،، دي كدا ملك بقت مجنونة رسمي
= احنا خلاص بدأنا العلاج ولازم نكمله
لسة فاضل 4 واحنا اصلا مش عارفين هي هتكون مع مين بكرا
= هنعرف متستعجلش
انا مش مستعجل خالص بالعكس،، انا في غاية السعادة
= الرضا يا وليد،، لازم تكون راضي بأي حاجة
هو انا قاعد مع اخصائي تنمية بشرية؟ يا ناس حرام عليكم
= انا نفسي اعرف انت زعلان ليه؟،، انت المفروض تفرح بعد ما خلصت اول مهمة عندك
الحمدلله طبعا بس الوضع دا مضايقني
= ومضايقني انا كمان والله بس مفيش حل تاني
” بعد نص ساعة الدكتور مشي و سابني قاعد لوحدي عشان ذكرياتي تبدأ تحاوطني من تاني
فلاش بااك
الشقة قربت تخلص اهي،، فاضلها بس حاجات بسيطة
= ايوا بالظبط حاجات بسيطة ونبدأ نجهز الشقة،، الشقة لسة على الطوب الأحمر يا وليد
طب ما حلو دا،، ايه رأيك نبدأ حياتنا على الطوب الأحمر
= طب ما نوفر وننزل نشحت تحت الكوبري
والله فكرة بس انهي كوبري بقا
= مش لو لقينا كوبري أصلا
ليه ما الكباري كتير الحمدلله
= بيعملو كافيهات تحتها دلوقتي مش عايزين نقطع رزق حد
خلاص يا ملك احنا نبدأ حياتنا هنا لحد ما نلاقي كوبري
= حرام عليك يا وليد احنا كدا مش هنتجوز غير بعد سنتين
بس انتي عارفة بقا اني بتكلم بجد،، انا لو هعيش في البيت وهو بالشكل دا هيبقا جنة بالنسبالي عشان انتي هتبقي معايا فيه
= ما بلاش الكلام اللي يخلينا ننزل نجيب مرتبة ونكمل حياتنا على الطوب الأحمر دا
انا عايز اعيش معاكي في اي مكان،، عايز اعملك كل اللي نفسك فيه،، عايز اخليكي اسعد واحدة في الدنيا
= انا فعلا اسعد واحدة في الدنيا طول ما انا معاك
بحبك يا ملك
باااك
” مكنتش اعرف ان الشقة اللي كنت بحلم أنها تبقا جنة هتتحول لكدا،، هتتحول ل شقة مبحبش اقعد فيها ولا ادخلها بسبب عدم وجودها فيها،، وجودها كان بينور اي مكان هي موجودة فيه،، بسبب الارهاق اللي كنت فيه نمت،، محستش بنفسي غير تاني الصبح الساعة 12 الضهر،، فوقت على صوت اشعارات التليفون،، عربية ملك اتحركت من ساعتين وحاليا هي موجودة في.. ،، في نفس اللحظة لقيت جرس الباب بيرن،، قومت فتحت الباب لقيته الدكتور سامح،، دخل وقفل وراه
عرفت حاجة؟
= الهانم موجودة دلوقتي في شركة ابو العز
قصدك خالد ابو العز بتاع الأجهزة الكهربائية
= هو
و دي تعرفه منين؟
= انت مش كان معاك الكشف بتاع كل الدفعة بتاعتها؟
اه كان معايا
= اومال مستغرب ليه؟
مش عارف بس الموضوع دا لازم يبقا فيه استغراب
= طب هنعمل ايه بقا؟
خالد ابو العز دا بقا راجل تقي جدا و بتاع ربنا يعني صعب ندخل عليه
= متجوز دا؟
تلاتة بس مفيش واحدة هبلة هتفكر تتخانق معاه لانها ببساطة هتتطلق ساعتها و وتتحرم من العز دا كله
= قفلتها و استريحت؟
انا قولت افهمك بس
= طب احنا مش هنفضل قاعدين كدا ونسيبهم لوحدهم،، احنا لازم نروح
هنروح نعمل ايه؟
= اي حاجة المهم متبقاش معاه لوحدها
اذا كان هي مش فاكراك اصلا
= ماهو انا مش فاقد الذاكرة،، اومال انا بعمل كل دا ليه؟
عجبتني الصراحة
= جاي معايا ولا لا؟
جاي و أمري لله
” نزلنا من البيت و ركبنا العربية و روحنا عند مكان الشركة اللي هما قاعدين فيها،، نزلنا من العربية وفضلنا واقفين،، سامح بعدها بص ليا وقالي
هندخل ازاي بقا؟
= وانت مين قالك اننا هندخل
اومال احنا جايين نتفسح ولا ايه؟
” تجاهلت كلامه ومشيت بهدوء لحد ما قربت من البوابة،، سامح ساعتها أتكلم بصوت عالي
انت بتعمل كدا ليه؟
= امشي روح قولهم احسن،، وطي صوتك يا عم
انت عاملهم مفاجأه مثلا؟
= اه وشوية وهنطفي الشمع
طب لما تطفو حد يبقا يناديني
= والله العظيم لو ما وقفت وسكت هزعق انا عشان نتمسك و اخلص منك
العيب بقا فيا انا دلوقتي يعني
= ما ترجع العربية وترتاح يا سامح،، والله انت محتاج ترتاح فعلا
” في اللحظة دي حسيت ب هوا سخن بدأ يحاوطني بس دا مش بسبب الحر،، دا كان بسبب واحد طوله مترين كان واقف ورانا،، سامح ساعتها بص له وقاله
حضرتك مستني حد برضو؟
” الشخص الغريب دا ضر*ب سامح بالبوكس،، وقع في الأرض واغمى عليه ومن بعده كنت انا اللي عليا الدور،، لما فوقت لقيت نفسي مربوط وفي مكان غريب،، تقريبا كان مخزن قديم،، لقيت ساعتها راجل في اواخر التلاتينات واقف قدامي وحواليه اكتر من راجل،، الراجل بعدها اتكلم وقال
انت كنت جاي تسرقني انا يااالا،، دا انت مش هيطلع عليك نهار!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية لحظات من الصدمة)
