رواية أحفاد البارون الجزء الثاني الفصل التاسع 9 بقلم إيمان جمال
رواية أحفاد البارون الجزء الثاني الجزء التاسع
رواية أحفاد البارون الجزء الثاني البارت التاسع
رواية أحفاد البارون الجزء الثاني الحلقة التاسعة
أيهم مصدوم من اللي بيسمعه ومش مصدق انها ازاي قالت كدا
أيهم: هتندمي على كلامك دا اوي ياهدى
هدى بعصبية: اندم ايه وزفت ايه انت مش شايف تصرفاتك عاملة ازاي خلتني اشك فيك
أيهم بصلها بنظرات حزن واتحرك من جمبها
هدى: ايوا امشي واهرب من انك تواجهني
أيهم لفلها وبصلها واخد باله ان فهد نازل: انا مش هرد عليها ياعمي عشان لو رديت هي هتزعل مني انا ماشي
أيهم سابهم ونزل وفهد فضل واقف ادام بنته
فهد: ممكن تفهميني ايه الكلام اللي انا سمعته دا؟
هدى بدموع: دا اللي أنا شايفاه يابابا
فهد: انتي غلطانة عشان اللي بيحب حد بيكون مصدقه ومستعد يستناه عشان يسمع منه لكن انتي حكمتي من غير ماتعرفي الحقيقة
هدى بغضب: وهي ايه الحقيقة اللي انا معرفهاش
فهد: ورايا علي المكتب ياهدى
هدى نزلت ورا أبوها للمكتب وقفل الباب عشان محدش يدخل
فهد قعد على كرسي المكتب: اقعدي
هدى قعدت ادامه وساكتة وعاوزة تسمع اللي حصل، أبوها بدأ يحكي ليها اللي حصل مع أكمل لحد دلوقتي
هدى بإنهيار: يعني كل دا حصل لأخويا واحنا مانعرفش
فهد بحزن: ايوا وانتي جايا بقى تشككي في حب أيهم ليكي وتتهميه بحاجات غلط
هدى بندم: غصب عني يابابا
فهد: دا يعلمك تاني مرة تدي فرصة للإنسان اللي ادامك وتسمعيه كويس عشان تقدري تدي سبب لكن باللي انتي عملتيه دا بتبعديه عنك
هدى: انا اتصرفت كدا من حبي فيه
فهد ابتسم: يعني ماطلعش أيهم لوحده اللي بيحبك من زمان بقى
هدى بصتله بخجل: انا هقوم اظبط اللي انا نيلته
فهد: ابقي قابليني لو رد عليكي
هدى: حضرتك فرحان فيا
فهد ضحك: اوي عشان بتفكريني بأمك
هدى: ماشي ياباشا انا هروح اشوف الاستاذ يارب يرد عليا
أيهم خلاص هو وحور في الطريق بس باين عليه انه مضايق
حور: هدى مضايقة اني جايا معاك؟
أيهم: براحتها اكيد عمي فهد قالها وهتلاقيها دلوقتي هترن
وفعلا هدى بترن بس هو مش راضي يرد
حور ضحكت: طب رد عليها
أيهم: لا ياحور عشان تتعلم تثق فيا مش تشك فيا بالشكل دا
هدى رجعت رنت على حور وايهم طلب منها ماتردش بس هي قالت مش هينفع وردت
حور: ايوا ياهدي
هدى بغضب: ادي التليفون للأستاذ اللي قاعد جمبك
حور عملت كدا بس أيهم مش راضي ياخد التليفون: انا اسفه ياهدى بس هو مش موافق
هدى اضايقت: طب افتحي الاسبيكر
حور فتحته: فتحته اتكلمي
هدى بحزن: انا عارفة ان ليك حق انك تزعل وعارفة اني غلطانة واني ندمت ذي ما انت قولت وليك الحق ماتردش عليا بس انا بجد اسفه يا أيهم
هدى قفلت وأيهم باردوا فضل عند قراره ومكلمهاش
رنا وسامر وعمر واسيل وباسم ومعاهم كمان سلمي قاعدين بيذاكروا عشان النهاردة يوم اجازة بين الامتحانات ومهاب كان فوق ونزل عشان يروح المكتب ذي كل يوم وشافهم قاعدين فراح عندهم
مهاب: شدوا حيلكم عاوز امتياز السنادي
باسم ضحك: ما انت عارف يامهاب ان كل سنة بنجيب امتياز
مهاب عينه على رنا اللي عنيها في الكتاب: عارف ياباسم انا بس بشجعكم
ديما جات من وراه: ماتخافش عليهم ياحبيبي دول مجتهدين
مهاب حاوطها بدراعه: ماشي ياقلبي
مهاب اخد ديما ومشيوا ورنا قاعدة هتموت من الغييرة رغم ان عنيها ماترفعتش أصلا من الكتاب وقفلته وقامت متعصبة وراحة لمهاب عند عربيته
مهاب كان لسة واقف مع ديما وشاف رنا جايا عليهم: ادخلي انتي جوا دلوقتي
ديما سابته ودخلت وهو سند على العربية ومربع ايده
رنا بعصبية: هو انت مستفز ليه
مهاب ببرود: عاوزة ايه يارنا
رنا: مافيش يامهاب بس ياريت بقي تلتزم حدودك مع ديما عشان دا ماينفعش ولا اتربينا على كدا
مهاب: على فكرة ديما خلاص هتكون خطيبتي
رنا مش مستوعبة اللي سمعته والدموع اتجمعت في عنيها وبصتله بحزن ومشيت من ادامه
مهاب ابتسم: اما اشوف آخرتها إيه
مهاب ركب عربيته واتحرك وفي طريقه للمكتب
نيجي لچويرية اللي مختفية عننا خالص قاعدة في أوضتها وبعيدة عن الكل ومروان رن عليها وردت عليه
مروان: ينفع أقولك وحشتيني
چويرية معرفتش ترد عليه لانها اتكسفت حتى لو هي بتحب حد تاني
مروان ابتسم: خلاص مش هكسفك، طمنيني عليكي
چويرية: الحمدلله انت عامل إيه
مروان: الحمدلله خلاص اسبوع بإذن الله ونازل
چويرية: توصل بالسلامة ان شاء الله
أمير كان لسة نايم وصحي على رنة تليفونه ورد من غير مايبص ويعرف مين اللي بيرن
أمير بنوم: الو
شهد: صحيتك؟
أمير فتح عنيه لما عرف صوتها وقام عدل نفسه: صباح الخير
شهد: اسفه اني صحيتك
أمير ابتسم: كويس انك صحتيني عشان ماكنتش هلحق انزل العيادة
شهد: على معادنا بالليل؟
أمير: أيوا
شهد: انا مش عاوزة المشوار دا
امير بيهز راسه بيأس: شهد انا هقوم اخد دش واكلمك عشان شكلك هتعصبيني عالصبح عشان انا قولت دا حقك حتى لو تمثيل على الاقل والدك مايشكش في حاجة ودا شبكتك وحقك، يلا سلام
امير قفل معاها وقام دخل ياخد دش
نور اخدت مالك وقاعدة تحت مع الباقيين
سارة شالته: حبيب قلب تيتة
آيه ضحكت: والله اسم تيتة لايق علينا
ملك: لا ياختي اتكلمي عن نفسك انا هفضل صغيرة
امل برخامة: عشان كدا اكمل سابك وراح شرم
ليل ضحكت اوي غصب عنها: شكلك وحش أوي
ملك بغضب: انتوا رخمين والله وانا غلطانة ان جيت اقعد معاكم
مي: اقعدي مش كل مرة تقوم وتزعلي انتي عارفة اننا بنهزر
مريم ضحكت اوي: هي عارفة اننا بنهزر بس لازم تعمل زعلانة شوية عشان نصالحها
نور: واحنا اصلا مش هنصالحها
ملك بتبصلهم بغضب وهما قاعدين يضحكوا عليها
ريما جاتلهم: بقولكم ايه ياحلوين
ليل: خير ياشقية
ريما ضحكت: هي امي هاجر مش ناوية تيجي
ملك ضحكت: الهانم مش هتقدر تسيب عماد لوحده
ريما: طب نعمل ايه انا بقول نعمل فيها مقلب عشان تيجي
سارة: بطلي مقالب عشان ابوكي مايزعلش وهي هتيجي
عماد وهاجر قاعدين في بيتهم بيفطروا
هاجر: هترجع امتى النهارده؟
عماد: مش هتأخر ياحبيبتي قبل المغرب هكون هنا
هاجر: ماشي ياحبيبي خلي بالك من نفسك
عماد قام باسها دماغها وخلاص هيمشي: جوجو لو عاوزة تنزلي القاهرة تاني انزلي
هاجر: انا قولتلك مش هنزل واسيبك
عماد بحب: ياحبيبتي والله انتي عارفة اني بحبك تروحي براحتك وتغيري جو وكدا كدا بنطلع كلنا مع بعض في الصيف كل سنة فعادي لما تروحي دلوقتي وكلها كام شهر ونطلع سوا
هاجر قربت منه بحب: انا عندي ان افضل معاك بالدنيا ومافيها
عماد: لا انا كدا بقى مش رايح الشغل
هاجر بدلع: والله براحتك بقى
عماد طلع تليفونه من جيبه واخد اجازة اليوم دا وهاجر كانت فرحانة انه هيقضي معاها اليوم
ليث واكمل قاعدين في مطعم الفندق واعمامهم لسة نايمين
ليث: ايهم جاي في السكة ومعاه حد
اكمل: حد مين؟
ليث: حور
اكمل بفرحة: بجد؟
ليث برفع حاجب: ايه سر الفرحة دي
اكمل بتوتر: عادي اصلهم وحشوني
ليث بشك: ماشي هصدقك لما اشوف
علا وصلت الفندق وعرفت انهم قاعدين في المطعم وكانت عارفة ان اكمل موجود وعرفت باللي حصل عشان كدا مجاتش من وقت ماوصل
علا: صباح الخير ياشباب
اكمل ابتسم: ياااه علا ايه يابنتي فينك من زمان
علا قعدت معاهم: في الدنيا
ليث ضحك: مش هتبطل رخامة ذي زمان
علا: والله ياليث يا اخويا الدنيا دي مش عاوزة نكد عاوزة فرفشة ورخامة وهزار
اكمل: والله انتي عندك حق
اكمل وجاسر صحيوا ونزلوا ليهم تحت
ليث: اهلا بالباشوات اللي كانوا سهرانين امبارح لحد الفجر
جاسر بيبصله بغضب: ماتبقاش انت وابوك بقى عدي يومك احسن
اكمل(الكبير): احنا جايين هنا عشان نبعد شوية عن الفهد والادهم
ليث خرج تليفونه ورن على أبوه من غير ما الباقي ياخدوا بالهم: يعني انتوا عاوزين تفهموني انكم ماصدقتوا تخلعوا من الفهد والادهم
جاسر: ايواا واياك تروح تقوله بقي عشان مايبقاش اخر يوم في عمرك
اكمل(الصغير) ضحك اوي: دا ايه الخوف دا
اكمل(الكبير): من خاف سلم ياحبيبي وبعدين هو عامل ذي عفريت العلبة بيطلع من اي مكان
ليث فتح الاسبيكر وفهد اتكلم: طب وحياة امك لما اشوفك ياكلب
اكمل اتخض لدرجة كوباية الماية وقعت من ايده: حبيب قلبي
فهد: والله لما اجيلك فأحسنلك شوفلك مكان استخبى فيه وانت يا جاسر ياحبيبي ماصدقت تخلع طب انا كلها كام يوم وجايلك
جاسر بخوف: والله ابنك السبب
ليث بيضحك جامد: الله وانا مالي
اكمل(الصغير) بيتكلم بصعوبة من كتر الضحك: والله يابابا حلال اللي يتعمل فيهم
فهد فرحان بإنه سامع ضحكة إبنه: طب قولي اعمل فيهم إيه
اكمل بيبص لاكمل ولجاسر وبيضحك: والله يابابا بعد منظرهم اللي ادامي دا كفاية عليهم ان شوية وهلاقيهم مغمى عليهم والله
فهد ابتسم: خلاص عشان خاطرك انت بس
ليث: نعم بقي انا عامل دا كله وتقولي عشان خاطره طب انا غلطان
جاسر بيبص لليث: انا بقول يافهد تقفل عشان ورايا مهمة صعبة
ليث بيبصله برفع حاجب: انت تقصد إيه
اكمل(الكبير) قام واخد التليفون وقفل المكالمة وبص لليث: انا بقول تمشي من ادامي السعادي
ليث وقف بتحدي: الليث مش بيخاف ياعمي
جاسر بيقرب منه: انت نسيت نفسك ولا ايه
ليث بدأ يقلق: هو انتوا بتتكلموا بجد ولا ايه
اكمل(الصغير): هي هتقلب بجد ولا ايه
اكمل(الكبير) بغضب: هي خلاص قلبت بجد
علا بتبصلهم وماكس قاعد على الأرض وحست ان الموضوع هيكبر فقامت: طب هاخد ماكس امشيه
ليث: معلش ياعلا الا ماكس دا ملك الفهد انا اصلا واخده منه من وراه
اكمل(الكبير): ماهو الليث بيخاف اهو
ليث بثقة: في فرق مابين الخوف وفي فرق بين اني اكون بحطهم ادام الامر الواقع
جاسر: امشي يلا من ادامي
ليث: بزمتك ياعمي انا يتقالي يلا؟
جاسر: اه وامشي من ادامي السعادي عشان ليلتك سودا الليلادي
ليث: انا هروح اتمشى كلها كام ساعة ويوصل أيهم وساعتها ابقوا قابلوني لو قضيته يومين حلوين
اكمل(الكبير) بغضب: سايبين فهد في القاهرة جيت انت هنا في شرم
ليث غصب عنه ضحك: حظكم الحلو
ليث اخد ماكس وعلا مشيت معاه وخرجوا يتمشوا شوية
جاسر لأكمل(الصغير): عاجبك كدا
اكمل ضحك: معلش ياعمي انت عارف ان ليث هو نسخة تانية من الفهد
اكمل(الكبير) بغضب: نخلص من ابوك يطلعلنا أخوك
ليث خرج مع علا بارة وكان سرحان وفيه حاجة شاغلة تفكيره
علا: مش هتقولي إيه اللي شاغلك باردوا
ليث بصلها وقعد على صخرة وماكس قعد جمبه على الأرض وعلا قعدت جمب ليث
ليث: مافيش حاجة شغلاني
علا: لا ياليث فيه حاجة انت مش ليث اللي اعرفه
ليث: عاوزاني اقولك ايه ياعلا، اقولك ان الليث قلبه محتار
علا بفجأة: واخيرا الليث وقع
ليث بغصب: هترخمي هقوم واسيبك
علا: خلاص مش هرخم كمل
ليث: مافيش حاجة أصلا اكملها كل الحكاية ان حاسس اني تايه ومش عارف اعمل ايه
علا: طب هي مين؟
ليث: چويرية بنت عمي أكمل
علا: طب انت بتحبها؟
ليث: صدقيني مش عارف انا كنت عارف انها بتحبني بس طول الوقت كنت رافضها وجرحتها بالكلام بس لما حسيت انها هتروح لحد تاني لاقيت نفسي مضايق
علا: يبقى انت ماكنتش شايفها حبيبة بس لما لاقيت انها خلاص هتروح لواحد تاني قدرت تعرف ان جواك مشاعر ليها بس انت كنت عامي نفسك عنها وطبعا بشخصيتك المغرورة
ليث: انا مش مغرور ياعلا وفيه فرق بين الثقة والغرور
علا: بس لو الثقة ذادت هتقلب بغرور
چويرية بدور على حور عشان مش شايفاها وعرفت من هدى انها سافرت شرم الشيخ
چويرية: ليه سافرت من غيرنا؟
هدى بحزن: عادي
چويرية: قوليلي ايه اللي حصل ياهدى
هدى حبت تغير الموضوع: تقريبا عندها مؤتمر او حاجة تحضره هناك فعشان كدا سافرت مع أيهم
چويرية: ماشي امال فين رنا؟
هدى: كانت هنا وطلعت على اوضتها ومن ساعتها مانزلتش
چويرية: تعالي نشوفها
إسلام ومي قاعدين سوا بيتكلموا في الجنينة
مي: حبيبي ممكن اروح اشوف ماما يومين
إسلام: يعني عاوزة تغيبي عني يومين
مي: ياحبيبي انا بروح يوم واجي تاني يوم الصبح وانت عارف ان مش بقدر اغيب عنك بس هي وحشتني
إسلام مسك ايديها وباسها: ماشي ياقلبي هطلب من الحرس يوصلوكي
مهاب وصل المكتب والسكرتيرة بلغته بإن كرم الصياد بارة وسمحله يدخل
مهاب وقف وسلم عليه: اتفضل
كرم قعد: انا اسف ان جاي من غير معاد بس كنت جمبك هنا فقولت اجي اسألك عن ملف القضية
مهاب: عادي ولا يهمك، انا درست الملف كويس وهي قضية كويسة وخصوصا ان معاك الورق اللي يثبت انها ليك
كرم: ايوا انا لولا الورق دا ماكنتش هقدر اكسب القضية
مهاب: الورق فعلاً مهم ويابخت اللي يقع تحت ايده فبوعدك ان هعمل كل جهدي وهكسب القضية ان شاء الله
كرم: وانا واثق فيك وعشان جيت ليك
امير نزل بعد ماخلاص جهز وصبح على أمه وباس مالك إبنه
نور: هتروح مع شهد النهاردة؟
امير: ايوا يا أمي
ليل: عارف يا أمير البنت باين عليها هادية بس ابوها استغفر الله راجل طماع
امير ابتسم: هي كانت مفهماني على كل حاجة قبل ما اروح فعشان كدا كنت مستحمل وعادي الليلة عدت وهي اصلا مضايقة من تصرفاته
امل: عادي ياحبيبي المهم هي كويسة وابوها بقى مش مهم
امير بيبص بعنيه على فهد: امال فين عمو فهد نزل الشركة ولا لسة هنا؟
ليل: لا واخد اجازة هو وادهم هتلاقيهم في اوضة الرياضة
امير سابهم ودخل للفهد والادهم عشان يصبح عليهم قبل مايخرج
فريدة كانت قاعدة في اوضتها فوق والبنات طلعوا قعدوا معاها
ليل: مانزتيش ليه ياطنط تحت معانا
فريدة بتعب: حسيت بس بتعب فحبيت افضل هنا
نور بقلق: مالك ياحبيبتي نطلب الدكتور؟
فريدة: لا ياحبيبتي انا كويسة شوية بس ارهاق
ليل ضحكت: هو ايه حكاية الارهاق في البيت دا فهد باردوا واخد اجازة عشان مرهق شوية
ملك: ياستي سبيهم ياخدوا راحة شوية ويقعدوا معانا
آيه: اه والله دا انا ماصدقت ان ادهم واخد اجازة
فريدة: طب بما انهم واخدين اجازة حاولوا تعملوا شهر عسل جديد
ليل بكسوف: خلاص ياطنط كبرنا على الكلام دا
فريدة ضحكت: ما اظنش ان الفهد كبر عن كدا خالص
ليل خدودها احمرت: خلاص ياطنط بقى
ملك بتضحك اوي: البت خدودها احمرت من الكسوف
ليل بغضب: بس ياماما خليكي في حالك
فريدة: انا بتكلم بجد والله خليكم طول الوقت حلوين ودايما مهتميين بيهم هما لو تعبانين او مضايقين اعملوا اي حاجة عشان يبقوا فرحانين ومبسوطين، بلاش كلمة احنا كبرنا والكلام دا الرجالة مش بتكبر ولو حسوا ان الستات اللي معاهم مش واخدة بالها ولا مهتمية هيبصوا بارة
ليل: الله عليكي ياطنط وعلى كلامك
امل: والله اللي عاوز يسمع الكلام دا هي مي ومريم عشان خاطر اسلام وآسر دول مجانين
امير: صباح الخير
ادهم بصله: صباح الخير ياعريس
فهد بطل تمارين واخد الفوطة ينشف جسمه وبصله: رايح العيادة؟
امير: ايوا ياعمي
ادهم: هتروح تجيب شبكتك الليلادي؟
امير: ايوا، بس انا كنت عاوز اقول حاجة
فهد: قول
امير: انا مش عاوز خطوبة يعني ممكن لو فرح على طول
ادهم ضحك: انت مستعجل ولا ايه شكلك وقعت
امير بص للأرض واتكلم بحزن: عادي ياعمي انا مش حابب فترة خطوبة والكلام دا
فهد زعلان عشانه لانه عارف الحكاية كلها: براحتك ولو على ابوها انا هتكلم معاه
ادهم: مش عارف ازاي البنت تكون هادية وجميلة كدا وابوها زفت
امير: ماليش دعوة بأبوها هي اول ماهتدخل القصر هو والله ماهيدخل هنا
فهد: ما اظنش اصلا انه هيسأل عليها لانه خلاص هياخد الفلوس ويشوف نفسه
امير: انا ماشي
فهد: خلي بالك من نفسك وروح لمحل چورچ انا كلمته امبارح والشبكة هدية مني ليك
امير ضحك: ياعمي سبني مرة واحدة ادفع انا
ادهم: حد قالك اننا بنفرق مابينكم يلا يادكتور على العيادة
في آخر اليوم في القصر سامر وعمر قاعدين بيذاكروا عشان عندهم امتحان تاني يوم الصبح، بس حاسين نفسهم زهقانين شوية وعاوزين ياخدوا راحه كام دقيقة كدا
سامر: تعالى نقوم نعمل أي حاجة
عمر: ايوا يلا
سامر وعمر خرجوا بارة الاوضة وقابلوا آسر عالسلم
عمر: رايح فين يابابا؟
آسر: انا عاوز اعمل مفاجأة لأمك يعني سهرة حلوة كدا
سامر ضحك: ايوا بقى ياعمو، طب تحب نساعدك
أسر: ياريت
عمر بتفكير شيطاني: بقولك ايه تعالى كدا معانا واحنا هنظبطك
وفعلا آسر راح معاهم وبدأوا يجهزوه عشان سهرته مع مريم
أيهم وحور وصلوا بس اكمل كان نايم عشان حس بتعب
ليث: وانا اقول شرم نورت ليه
أيهم ابتسم: بكاش اوي انت
ليث بيحضنه: والله أبداً وكويس انك جيت عشان انا شوية وهمشي واسيب اعمامك هنا
أيهم: ماتقلقش هنتصرف سوا
ليث بص لحور: حمدلله على السلامة ياحور
حور: الله يسلمك
ليث: طبعاً يا أيهم انت معايا في الجناح، وانتي ياحور ليكي اوضتك
حور: طب ليه احنا مروحناش الڤيلا؟
ليث: انا طلبت انها تتنضف وهنتنقل فيها بكرة
أيهم: ما الفندق هنا كويس
حور: لا لما نكون عيلة لوحدنا دا هيفرق في نفسية اكمل لكن هنا هيبقى مضايق من الناس اللي بيبصوا عليه
ليث ابتسم: انتي صح ويلا اطلعوا ارتاحوا
عمر وسامر واقفين ادام آسر اللي واقف ادام المرايا وبيبص لنفسه بصدمة
آسر: هو انتوا جبتوا اللبس دا منين
عمر: كله موجود يابابا انت بس تؤمر
آسر: مستحيل اخرج كدا انتوا عاوزينهم يضحكوا عليا
سامر: ليه بس ياعمي دا هو في احلى من اللبس الهندي
(آسر لابس عباية لونها اسود استايل هندي لحد بعد الركبة بشوية ولابس على راسه العمة اللي بيلبسوها دي)
فجأة الباب خبط وقاعدين يبصوا لبعض
سامر: مين
فهد: الفهد
آسر هيموت من الرعب وهوبا طلع على السرير وغطى نفسه بالغطا
عمر راح فتح الباب بتوتر: اهلا ياعمي اتفضل
فهد دخل وبيبصلهم ولاحظ ان في حد نايم على السرير: مين نايم هنا؟
عمر: دا بابا
فهد بإستغراب: ابوك؟ وبيعمل ايه هنا
آسر بصوت واطي: والله لاوريك ياكلب
فهد اتحرك ناحية السرير وجه يشيل الغطا معرفش لان آسر ماسكه جامد: هو ماسك الغطا كدا ليه هيهرب يعني
آسر يشد وفهد يشد وهوبا الغطا اتشال 😂
الحلقة خلصت ياترى ايه هيحصل لآسر من فهد😂
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية أحفاد البارون الجزء الثاني)
