رواية إختيار خاطئ الفصل الرابع 4 بقلم إيناس طه

رواية إختيار خاطئ الجزء الرابع

رواية إختيار خاطئ البارت الرابع

رواية إختيار خاطئ الحلقة الرابعة

عالية حكت لملك علي كل اللي حصل من أول الرسايل اللي كانت بتجيلها لحد مقابلتها ب مازن النهاردة
ملك كانت ساكتة و مصدومة من كلام عالية
ملك بعصبية : أنا بجد مش مصدقة إنك عملتي كده و صدقتيه بالسهولة دي…مش عارفة أقولك إيه
مش عارفة أزعل منك ولا أزعل عليكي..بس أنا حذرتك كتير منه وإنتي عارفة من الأول إنه مش كويس و بتاع بنات
عالية بدموع : غصب عني صدقته كنت فاكراه اتغير فعلا
حبي ليه كان عاميني عن تصرفاتي مكنتش عارفة إذا كان اللي بعمله ده صح ولا غلط
لما بقينا نتكلم حسيت إنه ملا عليا حياتي
أنا طول عمري لوحدي محدش بيهتم بيا…محدش بيسمعني و لا بيحس بيا حتي عيلتي كل واحد فيهم في دنيا تانية
بابا اللي مسافر وبيجي كل فترة علشان ظروف شغله وأخواتي اللي بعيد عني
حتي مليش صحاب أحكيلهم كنت دايما بخاف أقرب من حد لحد ما قابلتك واتعرفت عليكي
مكنتش واخدة عليكي في البداية بس بعد كده اتمنيت لو كنت أعرفك من زمان

ملك مكنتش عارفة تقولها إيه
من جواها عايزة تلومها أكتر وتزعل منها علي تصرفها وفي نفس الوقت عايزة تطبطب عليها وتقرب منها
عالية بدموع : أنا عارفة انتي بتفكري في إيه دلوقتي…أكيد شايفاني واحدة مش كويسة وندمانة إنك عرفتيني
مش كده…علي العموم أنا هريحك مني ولو حابة مكلمكيش أو أقرب منك تاني أنا هعملك اللي انتي عايزاه
ملك دموعها نزلت و حضنتها :شششش انسي كل حاجة
أنا جنبك وعمري ما هسيبك…عايزاكي ترجعي أقوي
تركزي في دراستك زي الأول وأحسن كمان
واحمدي ربنا إنه كشفهولك بدري وإنها جات علي كده و بس
وعايزة أقولك حاجة إنتي غالية أوي يا عالية وتستاهلي واحد أحسن منه مليون مرة…و أظن الدرس ده علمك كتير
حافظي علي قلبك وحبك للإنسان اللي يقدره بجد و أحق بيه
ومش عايزة اسمع منك أنا لوحدي دي تاني أنا جنبك ومش هسيبك أبدا وهنبدأ صفحة جديدة و هنقول لبعض كل حاجة مش هنخبي حاجة تاني اتفقنا
عالية مسحت دموعها و حضنتها : اتفقنا
بس أنا خايفة منه
ملك : مش عايزاكي تخافي طول ما أنا جنبك هو مش هيقدر يعمل حاجة ولا يقدر يقرب منك تاني ولو فكر أنا اللي هقفله
بس المهم عندي إنك تشيليه فعلا من قلبك ومتفكريش فيه تاني
عالية بإبتسامة : حاضر
أوعدك ان أنا هتغير وهرجع أحسن كمان
____________________________________
عدت سنة وعالية مش بتفكر في أي حاجة غير دراستها ومستقبلها بقيت قوية وقدرت تنسي وتعدي تجربة مازن بسرعة
________________________________
وفي يوم ملك كانت في الجامعة وماشية بسرعة علشان عالية مستنياها ولقيت اللي بينادي عليها
هشام : أنسة ملك ممكن لحظة
ملك : خير حضرتك في حاجة
هشام : بصراحة أه كنت حابب أتكلم معاكي في موضوع
ملك : نعم موضوع إيه

وهو في كلام أصلا بيني وبين حضرتك
هشام : أه هو بصراحة موضوع خاص
ملك : أسفة مبتكلمش مع حد وأظن الوقفة كده مش لطيفة خالص عن إذنك وكانت ماشية بس وقفها صوته
هشام : أنا عارف و صدقيني مش هعطلك
ولو مش حابة نتكلم هنا ممكن نتكلم في مكان تاني
ملك : مكان تاني طب شوف بقي أنت لو ما مشيت من قدامي أنا هشتكي للعميد وهقوله إنك بتمشي ورايا و بتعاكسني
هشام : انتي فهماني غلط والله مش بعاكس كل الحكاية إن أنا معجب بيكي وعايز أتقدملك
ملك : لا برافو بجد
تصدق تمثيلك حلو جدا بس ياريت تمثل علي حد تاني مش عليا
هشام : أمثل إيه…أنا مش فاهم حاجة
ملك : معقولة خلاص أنا هفهمك
أقصد إن الشباب اللي زيكم ياريت يغيروا شوية من الطرق بتاعتهم دي علشان بقيت قديمة و مكشوفة أوي…وسابته ومشيت
_________________________
في بيت مازن
نور : أيمن الحقني أنا في مصيبة
أيمن : مصيبة إيه
نور : في عريس متقدملي وأهلي موافقين عليه
أيمن ببرود : وبعدين يعني المفروض أعمل إيه
نور : هو إيه اللي تعمل إيه
أنت لازم تيجي تتقدملي وبسرعة
أيمن بضحك : أتقدم إيه…لا الحقيقة مش هينفع طب أقولك علي حاجة أحلي ما توافقي علي العريس طالما كويس
إيه اللي يمنع
نور بصدمة : أنت بتقول إيه
أيمن : بقول الحقيقة احنا نخرج ونتكلم مع بعض لكن جواز مليش فيه
نور بدموع : أنت مش المفروض بتحبني إيه اللي يمنع عايز تسيبني كده بسهولة
أيمن : أنا بقول الأحسن ليكي
خلينا صحاب بس لكن أكتر من كده متعشميش علشان أنا مستحيل أتجوزك و ياريت متتصليش بيا تاني
سلام يا قلبي…وقفل في وشها
نور كانت بتعيط مش مصدقة إنه اتخلي عنها وإنها اتخدعت فيه طول الفترة دي
__________________________________

في مكان تاني
أيمن بضحك : بس إيه رأيك علمتها الأدب ومسحت بيها الأرض
نسرين : تصدق صعبت عليا أوي يا أيمن
أيمن : ميصعبش عليكي غالي
يا ساتر دي كانت مغرورة وشايفة نفسها هي وأخوها مش فاهم علي إيه…أديني ذلتهالك وخدتلك حقك منها
__________________________________
ملك قالت لعالية علي اللي حصل في الجامعة وهما ماشيين في الطريق
عالية بضحك : بس حرام عليكي حد يعمل كده
افرضي كان بيتكلم جد
ملك : يستاهل و بعدين جد إيه الأشكال اللي زي دول كلهم زي بعض ونادراً لما تلاقي حد محترم فيهم
عالية : ملك افهمي مش معني إنه قريب مازن يبقي زيه علي العموم الأيام هتثبتلنا
يلا اسيبك أنا بقي عايزة حاجة
ملك : إيه مش هتطلعي معايا
عالية : معلش كفاية كده مش عايزة أتأخر أوي بالليل يادوب ألحق أروح علشان ماما متقلقش عليا
ملك : تمام خلي بالك من نفسك
عالية بإبتسامة: حاضر…سلام
ملك بإبتسامة : سلام
ملك فتحت الباب وأول ما دخلت البيت اتصدمت لما شافت…