رواية البر التاني الفصل التاسع والستون 69 بقلم لولو محمد
رواية البر التاني الجزء التاسع والستون
رواية البر التاني البارت التاسع والستون
رواية البر التاني الحلقة التاسعة والستون
انتصار / الله يرحمها الضحكه ما كانتش بتفارق وشها و اول ما يتقفل عليها باب و تفتكر كل الغمز و اللمز و التلسين ما كانتش بتعرف توقف دموعها الله يرحمه عمى شاكر كان الوحيد اللى بيهون عليها و يعرف يسكتها كان اصيل ابن اصول امير ابن امره الله يرحمه الله يرحمه
انتصار تعيط
هند / بيقولوا كانت من عيله كبيره
انتصار / ايوه ابوها الله يرحمه كان عمده بلد جنبنا كدا و كان عندهم اراضي و مواشي بس انتى عارفه الصعيد زمان ما كانوش بيورثوا البنات ارض قدرولها ورثها بقرشين و ادهوملها الله يرحمهم بقي فى ناس بتقول … الله يرحمهم بلاش نجيب فى سيره الناس ما حدش عارف الحقيقه انا كنت عيله وقتها ما اوعاش على الكلام ده
هند / ما ادوهاش حقها يعني
انتصار / فى ناس بتقول و ناس بتقول لا خدت حقها و ان ده كان تمن الارض وقتها الله اعلم بس اللى اعرفه ان من يومها قالت اللى كنت بروح بلدنا عشانه مات و ما عتبتش البلد تانى حتى لما ماتت كانت موصيه تندفن فى مقابرنا احنا مش فى بلدها
هند / الله يرحمها
انتصار / انا عارفه انك على رجلك من اول النهار بس سامحيني مش قادره اقوم النهرده
هند / لا ارتاحى قولى انا اعمل
انتصار / عدى لمى الفارغ و اغسليه و اسقى الناس تانى البكا بينشف الريق
هند تهز راسها و تقوم
………………….
فى شقه رشيد
رشيد نايم و سمر فى حضنه تليفونه يرن يمد ايده و يبص فيه و ينفخ و يرد
رشيد / افندم
فيرا / هى القاعده عندك حلوه اوى كدا
رشيد / انا لسه واصل
فيرا / عندنا طالعه تانيه
رشيد/ بتهزرى
فيرا/ اعمل ايه الكميه كلها خلصت
رشيد / بالسرعه دى
فيرا / هى الدنيا كدا على قد ما بتتعب على قد ما بتاخد
رشيد / مش هقدر اجى النهرده حتى لو اتحركت دلوقت مش هوصل قبل بكره
فيرا / لا ما تقلقش انا برده مش عازول اوى كدا النقله الجايه داخلى من و اللى اسكندريه
رشيد / ازاى
فيرا / بعتلك فايل على الواتساب هتلاقى فيه من و الى حطط خط السير و ظبط الدنيا و كلمنى
رشيد / و الدفع
فيرا / هنروح من بعض فين يلا يا بيبي انجوى بقي
فيرا تقفل رشيد يحط الموبايل جنبه
سمر / هتسافر
رشيد / لا الشغل هنا فى اسكندريه بس مش فاهم حاجه
رشيد يمسك الموبايل و يفتح الواتس و يحمل الفايل و يشوف اللوكايشنز و يفكر
………………….
فى سرايا الجوارحه
سماح داخله جنب مغاورى و كوثر وراهم
كوثر / خشي يا وش السعد خشي خشي
مغاورى يبص لعمته
كوثر / ايه طول ما كانت هناك والنحس كان راكبنا و الجنازات كلها عندنا يوم ما سابتهم النحس فارقنا و ركبهم
سماح / لو على كدا بقي المفروض تعامليني حلو بدل ما امشي و النحس يرجعلكوا و يخلص عليكوا
ام مغاورى / اطلعى ارتاحى يا سماح يا بنتى ما تاخذيهاش انتى عارفه ظروفها
كوثر / مالها ظروفى ياختى
مغاورى / اطلعى ارتاحى يا عمتى اطلعى ارتاحى … ماجده
ماجده تحاول تاخد كوثر كوثر تسحب ايدها
كوثر / طالعه ادفنونا بالحيا اياكش ترتاحوا
كوثر و ماجده يطلعوا ام مغاورى تطبطب على سماح
ام مغاورى / هى ما غلطتش لما قالت انك وش السعد اطلعى ارتاحى مع جوزك يا بنتى
سماح تبوس ايد ام مغاورى ام مغاورى تطبطب عليها بالايد التانيه و هى مبتسمه سماح تطلع مع مغاورى ام مغاورى تبص حواليها و تطلع الجنينه تلاقي شاهين قاعد تروحله
ام مغاورى / مالك يا خويا ايه اللى مقعدك هنا
شاهين / هدخل اتحشر بين الحريم و اختى و عمايلها
ام مغاورى / حقه يا خويا دا انا رقبتى منها بقت قد السمسمه دى مسكت البت هند مرات مختار و هاتك يا نقرزه فى الرايحه و الجايه و البت تربيه امرا و الله واحده غيرها كانت بهدلتها
شاهين / هند … ما تعملهاش
ام مغاورى / مين دى الله يرحم اما وقفت لمغاورى و لا لما وقفت لام عباده دى بت سبع بميه راجل
شاهين / كلنا قدام الناس بنبان جامدين بس من جوانا تعبانين من المعافره و نفسنا مقطوع اللى شافته فى كام شهر قد اللى شوفناه احنا فى سنين و الاسم رجاله
ام مغاورى/ قواها البت خديجه بتقول فيها شعر بتقول لو دخلنا الحرب بكره هنحط هند اول الصف
شاهين / و دا من شطارتها و لا من خيبه رجالتنا يا ام مغاورى
شاهين يقوم و الست مصدومه
الست / مالهم رجالتنا يا سيد الناس مهم زى الفل اهم احسن رجاله
شاهين / مش عارفين ياخدوا تارهم و حته حرمه مطلعه عنينا بالمنظر ده
الست / ما يقدر على القدره الا ربنا اذا كانت الحكومه مش قادره عليها احنا هنقدر و بعدين هى مش لوحدها و بعدين احنا كنا بنتكلم فى ايه و انت جبتنا لايه انت عاوز توصل لايه بالظبط
شاهين / عاوز اوصل للسرير انام … تصبحى على خير
شاهين يسيبها و يطلع فوق يلاقى باب اوضه كوثر متوارب و ماجده قاعده معاها
كوثر / بكره تركب فوق كتافك و تدلدل رجليها جوزها فى ضهرها وانتى جوزك فى تربته بكره تقوم اخوكى عليكي و تقلب كيان البيت عاليه واطيه دى حربايه متربيه فى جحر افاعى
ماجده / اخويا راجل و مفيش راجل مراته تمشيه و احنا مش داخلين حرب معاها المصلحه واحده يا عمتى
كوثر / دى بنت ابوها اللى فهمها بدرى و لعبها صح متربيه على سياسته تضرب و تلاقى
ماجده / هو كان فى اطيب من عمى شاكر الله يرحمه دا كان بلسم
كوثر / شاكر خد العز كله و هو قاعد فى مكانه ساب كل حاجه فيها خطوره على حياته لغيره و مع كدا كان بيتمرمغ فى عزهم و فلوسهم و قوتهم عشان كدا عاش لحد ما ربى عياله كان لئيم و جبان
شاهين يزق الباب ماجده تقوم تقف
شاهين / لما كنتى انتى لسه عيله بضفيرتين الحج شاكر كانت سيرته بتتغنى فى الشوارع … سمعته كانت سبقاه و اسمه كان بيهز شنبات بس سنه الحياه اجيال بتسلم اجيال السن و المرض ما كانش انانى لما حس ان صحته مش مسعداه سلم لابن اخوه اللى شافه اصلح منه شاب و بصحته ومتعلم و ذكى لان المصلحه العامه اولى الله يرحمه بقي فى دار الحق و احنا فى دار الباطل بقي بين ايدين ربنا … ربنا يا اختى ربنا
كوثر / و نعم بالله ياخويا مالك محموقله كدا ليه
شاهين / من خوفى عليكي لتضيعي تعب السنين اديكي شايفه الموت ما بيعرفش كبير و لا صغير … جهزى نفسك يا ماجده هتطلعى معايا انا و عمتك عمره يمكن الواحد يغسل روحه شويه و يهدى و يعرف يكمل استغفرى يا اختى استغفرى
شاهين يمشي
كوثر / استغفر انت استغفر …روحى ياختى اطمنى على عيالك اللى رمياهم طول النهار و ما بتساليش عليهم روحى
ماجده تهز راسها و تمشي فى صمت
كوثر / استغفرى يا اختى قال يا خويا استغفر انت بلا هم لا و محموقلهم اوى
……………………..
فى اوضه سماح
سماح قاعده فى البلكونه تعيط مغاورى يدخل شايل طبق فيه شويه رز و كفته يناوله لسماح
مغاورى / ما بعرفش استخدم المايكريف سخنتهولك فى المقلاه على قد ما قدرت انا اصلى مش شاطر فى حاجات المطبخ دى
سماح/ تعبت روحك انا مش جعانه
مغاورى يقعد
مغاورى / لو قله الاكل بترجع اللى راح كنت قطعت الاكل من سنين كليلك لقمه
سماح / ربنا ما يكتب عليك اللى انا حاسه بيه … بفكر فى كلام عمتك
مغاورى / يا سماح عمتى
سماح / عمتك ابنها مات فتقول اللى هى عوزاه و احنا نستحمل مش مهم ان ابويا ميت … طب انا ابويا ميت اقول اللى انا عوزاه
مغاورى / قولى يا سماح قولى كل اللى انتى عوزاه
سماح / مش عاوزه اقول حاجه
مغاورى / خلاص كلى لقمه دلوقت و لما يجيلك شوق تقولى اى حاجه انا هسمعلك
سماح تبصله
مغاورى / اقولك حاجه انا يا سماح
سماح / قول
مغاورى / انا مش عارف مين فينا اللى نحس عيلتنا و لا عيلتكوا البت خديجه و اخوكى و جوازتهم المعقربه و لا انا و انتى و فرحتنا اللى ما بتكملش
سماح تبتسم
مغاورى / لو مش هتاكلى قومى ارتاحى الدنيا برد عليكي و انتى لسه عروسه و مش هتستحملى
سماح تبتسم بسخريه
مغاورى / قومى معايا يا بنت الناس قومى
سماح تقوم و يدخلوا جوه يقعدها على اقرب كرسي
مغاورى/ قسما بالله انا من ساعه لقمه الصبح اللى كلتها من ايدك دى ما حطيت فى بقي غير القهوه الساده و الميه
سماح تبص فى الطبق و تملا معلقه و تحطها على بق مغاورى
مغاورى / لو كلتيها هاكل ما اكلتيش مش هاكل اياكش نقع من طولنا احنا الاتنين
سماح / بعد الشر … مش هستحملها دى و انا ليا مين بعد ابويا غيرك
مغاورى / ربنا يعزك كلى منى الحته دى … ما تكسفيش ايد جوزك يا بنت الاصول
مغاورى يعزم على سماح بصابع كفته تاخد قطمه
مغاورى / كمليها عشان خاطرى … بالله عليكي يا شيخه ما تكسري بخاطرى
سماح تاكل يبوس راسها
مغاورى / ربنا يهديكي و يصبرك و يصبرنا كلنا
………………….
فى اوضه فاطمه
فاطمه نايمه على الكنبه عباده يفتح الباب بالراحه و يدخل يشوفها يروح يقعد على ركبه قدامها
عباده / اما … اما … فطومه … امى
فاطمه تفتح و تقوم تقعد
فاطمه / فى ايه اختك جرالها حاجه
عباده / لا ياما مفيش حاجه انا جيت اطمن عليكي ايه اللى منيمك هنا تبردى ياما
فاطمه / معرفتش انام فى سرير ابوك و هو مش فيه
فاطمه تقوم تدخل الحمام و تبصله
فاطمه / اطمنت على اختك يا عباده حد اطمن عليها اتلخمنا عنها اطمنت عليها يا ابنى
عباده / هروحلها النهرده يا امى حاضر
فاطمه تهز راسها و تدخل الحمام و تقفل الباب عباده يقعد على الكنبه و يحط ايده على خده و الهم باين عليه يطلع الموبايل و يكتب رساله و يبعتها و يحط الموبايل قدامه
……………………….
فى اوضه سماح
سماح نايمه و مغاورى قاعد بيقرا قران توصله رساله يصدق و يقراها
مغاورى / لما تصحى كلمنى
مغاورى يقفل المصحف و يقوم يطلع الاستقبال و يتصل
مغاورى/ صباح الخير
عباده/ صحيتك و لا ايه
مغاورى / لا صاحى كنت بقرا الورد بتاعى
عباده / تقبل الله … سماح عامله ايه
مغاورى / نايمه قولت اسيبها ترتاح لما الفجر ياذن هصحيها
عباده / اتلخمنا عنكوا اعزرنى
مغاورى / اعزرك فى ايه ربنا يصبركوا على العموم سماح بخير عيطت شويه و نامت و انا والله ما سبتها الا اما اكلت
عباده / ربنا يكرمك … هستاذنك اعدى عليكوا بكره
مغاورى / مالك يا عباده من امتى بتستاذن تيجي دا بيتك يا ابنى دا ليك فيه زى ما ليا بالظبط
عباده / عشت ربنا يكرمك مش هوصيلك على سماح بقي
مغاورى / فى عيني
مغاورى يقفل و يروح يحط الموبايل على رخامه التقفيل و يدخل الحمام يقف قدام الحوض يغسل وشه
سماح / اعملك حاجه
مغاورى يتخض
مغاورى / لا اله الا الله … اتنحنحى طيب فاكرك نايمه خضيتيني
سماح تضحك
سماح / حقك عليا اعملك حاجه
مغاورى / تسلم ايدك ايه اللى صحاكى
مغاورى يطلع بره الحمام
سماح / معرفش قلقت ما لقيتكش جنبى قمت ادور عليك
مغاورى / عباده بيطمن عليكي
سماح / هم عاملين ايه امى عامله ايه
مغاورى / لا اله الا الله تصدقى فاتتنى اسال حالا اكلمه اطمنلك عليها
مغاورى يمسك موبايله و يجي يتصل سماح تحط ايدها على الموبايل
سماح / بلاش ليقلق ابعتله رساله احسن
مغاورى / انتى صح ممكن كمان يكون الجماعه نايمين و لا حاجه انا هبعتله رساله لما يشوفها يكلمنى
سماح تهز راسها و تدخل الحمام
……………….
فى مخزن شركه ادويه
رشيد قاعد و فى رجاله بتحمل بضاعه بنت تدخل و تقعد على اللاب رشيد يمنعها
رشيد / ايه تكيه هى و لا ايه
البنت / سورى مدام فيرا طلبت اعملك ابديت للموقع اللى رايحينه
رشيد / لا يا شيخه نعمين يعني ازاى الكلام ده
البنت / حضرتك عارف انى ما ليش اى دخل
رشيد / طب اركنى انتى فى اى حته دلوقت
رشيد يتصل بفيرا
رشيد / هى فكراها رحله تغير فى خط السير بمزاجها … الو
فيرا / وصلك الابديت
رشيد / ازاى يعني والناس اللى متفق معاهم و الشحنه دى انتى بتغيرى فى اخر ثانيه ازاى يعني
فيرا / صدقنى غصب عنى جالى خبر ان فى ناس فى الحكومه بينخورزا ورانا اسلمهم الشحنه على الجاهز كدا
رشيد / و انتى كدا بتعملى ايه ان شاء الله
فيرا / الله مش انت ساحر اتصرف يا رشيد لسه قدامك وقت
رشيد / حسبي الله و نعم الوكيل فيكى انتى جيبانى تحرقى دمى
فيرا / هروقهولك بس خلص شغلك انت بس
رشيد / مش هنختلف يعني ؟
فيرا/ عيب عليك دا انت حبيبي
رشيد / طب اقفلى اما اشوف هعمل ايه اقفلى اقفلى … تعالى يا ست العروسه قوليلى خط السير الجديد اما نشوف اخرتها فى اليوم ده
…………………..
فى سرايا الزنايته
هند تدخل المطبخ تلاقي فاطمه بتحشي حمام و انتصار بتعصج مفروم
هند / صباح الخير انتوا بتعملوا ايه اقدر اساعد
فاطمه / فى عندك على الصينيه كرنبايه لسه سلقاها لفى على قد ما تقدرى
انتصار / ما كفايا يا ام عباده
فاطمه / اللى مش عاوز يساعدنى ما يساعدنيش انا هعمل اللى فى دماغى
انتصار / خلاص ياختى اللى تشوفيه
انتصار تبص لهند و تشيل اللحمه من على النار
انتصار/ هتعملى بيهم ايه دول
فاطمه / عندك سمبوسه هناك لفيها و اقليها سماح بتحبها … شوفى كدا معلش يا هند فى كاتشب فى التلاجه ؟ .. نادى البت مريم بتعرف تعمله حلو
انتصار / لما نخلص اللى فى ايدنا نبقي نشوف حكايه الكاتشب دى
فاطمه / انا خلصت … يووووه نسينا ندس الرز نسينا الرز
هند / احنا لسه بدرى و بعدين فى محشي و حمام و سمبوسك يعني كلو تمام اهو
فاطمه / مش تمام … مش تمام هو انتوا هتعرفوا اكتر منى
انتصار / هدسه حالا مش هياخد حاجه و بعدين احشي السمبوسه على ما يستوى هدى روحك ان شاء الله كل حاجه هتبقي زى ما انتى عاوزه
خديجه تدخل
خديجه / صباح الخير معلش اتأخرت بطنى مش رحمانى من امبارح بايته فى الحمام ما هديتش الا اما اخدت الحقنه
هند / سلامتك
خديجه / الله يسلمك حتى بق الميه يا هند
انتصار / يومين و هيروحوا لحالهم ما تقلقيش كلنا كنا زيك و اكتر طب دا حتى ما كنش على ايامنا الحقن بتاعتكوا دى
هند / ماما كانت بتاكل جيلى فى ياسمينا كانت بتقول بيخفف الترجيع … الله هى ماما فين صحيح ما شوفتهاش
انتصار / قاعده مع الحريم عند الفرن البرانى بيخبزوا
فاطمه / لو عاوزه تروحيلها
هند / لما اخلص هروحلها
خديجه / اساعدكوا فى ايه … ايه ده انتوا بتعملوا ايه
انتصار / فطار للعرسان
خديجه / عرسان ايه يا امى هو ده وقته
فاطمه تبصلها و تقوم تغسل ايدها و تسيب المكان و تمشي
انتصار / معلش يا بنات ربنا يصبرها معلش كملوا انتوا و نا هتكلم معاها
هند / ممكن اتكلم معاها انا يا ام فاتن
انتصار / روحى يا بنتى و انا هخلص بسرعه و اجيلكوا الاوضه
هند تقوم تغسل ايدها و خديجه و إنتصار يكملوا
…………………
على ترابيزه فى الهول
مريم قاعده و مدرسه بتشرحلها
الست / انتى مش مركزه خالص يا مريم
مريم / حقك عليا والله بس غصب عنى
الست / انتى ثانويه عامه لازم تفصلى نفسك عن اللى حواليكي
مريم تهز راسها فاطمه تعدى مريم و الست يقفوا فاطمه تجرى على فوق يقعدوا و هم بيبصوا عليها
مريم / معلش تلاقيها مستعجله نكمل الدرس
الست / تمام كنا بنتكلم عن جهاز الغدد الصماء
هند تدخل الاتنين يقفوا
هند / السلام عليكم
مريم / و عليكم السلام ..استاذه عبير مدرسه الاحياء
هند / اهلا و سهلا منورانا معلش على الربكه حضرتك عارفه الظروف
عبير / انا والله لولا المنهج كبير و هى مش بتروح المدرسه كنت لغيت بس
هند / لا تلغى ايه دا احنا عاوزين ننجز …ما شوفتيش ام عباده يا مريم
مريم/ طلعت فوق
هند / عن اذنكوا … كملوا كملوا
هند تطلع و هم يقعدوا عبد الله يدخل شايل طشت ملفوف جواه ملايه مريم تجرى تاخد منه
عبد الله/ حسبى لحسن سخن امى بتقول قسموهم فى اكياس او حاجه كدا
مريم / طيب تمام
عبد الله/ ايه ده انتى بتاخدى الدرس
مريم / والله بنحاول بس مش باينلها رجا
عبد الله / طب دخليه المطبخ و اقعدى ركزى و انا هروح اكمل مزاكره انا كمان
مريم / تمام
مريم تاخد الطشت و تدخله المطبخ و تطلع تلاقى عبير بتلم الحاجه
مريم / هو احنا خلصنا و لا ايه
عبير تتكلم بعصبيه
عبير / و لا ايه هو احنا عارفين نشتغل
مريم / معلش انا
عبير / انتى ما تقوليش حاجه عن اذنك
عبير تمشي انتصار تطلع
انتصار / هو فى ايه
مريم / معرفش اتعصبت و لمت حاجتها و مشيت
انتصار تطلع تجرى ورا المدرسه و مريم تروح وراها
………………..
فى اوضه فاطمه
فاطمه بتكوى عبايه سوده هند تفتح الباب بالراحه و تدخل
هند / ممكن اجى
فاطمه / تعالى
هند / بتعملى ايه
فاطمه / بكوى العبايه عشان اروح اصبح على سماح و اطمن عليها
هند / تحبى اساعدك
فاطمه / لا مش مستهله اقعدى ارتاحى اجبلك حاجه تشربيها
هند تقعد على كرسي
هند / تسلم ايدك مش عاوزه … على فكره انا فهماكى
فاطمه تبص لهند
هند / لما والدى اتوفى عملت زيك كدا رميت نفسي فى مليون شغلانه و ما سبتش لنفسي ثانيه و لا فرصه انه يفكر او يحزن مفيش وقت
فاطمه / ابويا الله يرحمه كان راجل ما لوش فى حاجه غلبان و على باب الله طيب و زى ما بيقولوا الطيب عمره قصير مات و سابنى للدنيا لوحدى مع مرات اب ما بترحمش هى كمان ما ادتنيش فرصه احزن عليه سحلتنى فى الشقا لحد ما ربنا كرمنى بسي شاكر سيد الناس و سيد قلبي نصفنى و كرمنى و عوضنى عن ابويا اللى راح مش بيقولوا اذكروا محاسن موتاكوا اهو انا بقي لو اتكلمت عن جزء من محاسنه بس مش هسكت لحد ما بقي يقع
هند / الله يرحمه
فاطمه / لما بشوف العز و الراحه اللى انا فيها بفتكره و لما بتعب و اتسحل فى الشقا و التعب بفتكر ابويا الله يرحمه يعني فى الحالتين بزعل
هند / بس ربنا بيعوض
فاطمه / فى حاجات … فى ناس ما بتتعوضش … انا مش زعلانه انه مات الله يرحمه فى مكان احسن من هنا بكتير الله يرحمه كان حافظ كتاب ربنا و بيقراه بصوت جميل سمعتيه يا هند ؟
هند / مره صوته حلو فعلا
فاطمه/ انا مش زعلانه يا هند انا طول عمرى و انا عارفه ان اللحظه دى هتيجي مش عشان كان كبير فى السن لا … عشان مفيش حاجه بتدوم .. عشان ما حدش بياخد كل حاجه و هو كان كل حاجه يا هند … كان كل حاجه والله … تعرفى الجوارحه بيتهم مليان اكل و مش واقف على صينيه الاكل اللى هبعتها … دا غير انه واجب عليهم يبعتولنا هم و هيبعتولنا … بس البت دى … كدا كدا فرحتها اتكسرت … نفسها كمان تتكسر يا هند … زى اليتيمه كدا ما لهاش اهل
هند / لا طبعا فى دى معاكى حق
فاطمه / خلصت … ايه رايك فى العبايه دى حلوه
هند / اه حلوه
فاطمه / كان جيبهالى من الحج … الله يرحمه عمره ما راح حته الا اول حاجه يجيبلى هديه انا قبل عياله
فاطمه تقعد جنب هند
فاطمه / تعرفى افتكرت موقف كدا … اى واحد فى الدنيا لما ربنا يكرمه بابن بيجرى يشيله و يحضنه تعرفى سى شاكر عمل ايه ؟
هند / عمل ايه؟
فاطمه / حضنى انا ساب ابنه اللى قعد فوق العشرين سنه يترجاه من الدنيا و ولد و جرى يطمن عليا انا كنت بموت من الوجع اول ما سمعت منه كلمه سلامتك كنت هقوم زى الرهوان قسما بالله وجعى و تعبى كله راح كنت عيله بنت خمستاشر سنه و يمكن ما كنتش قفلتهم كمان و جسمى ضعيف و حالتى حاله كان خايف يجرالى حاجه مسك الاكل و اكلنى بايده و لما اطمن عليا بقي خد ابنه و اذنله كان ناصر الله يباركله اذنله قبله و سماه عباده سى شاكر لما عرف قالى ايه رايك لو مش عاجبك او نفسك فى اسم تانى احنا لسه فيها قولتله كل واحد بيتولد باسمه حلو عباده ربنا يجعله نصيب من اسمه
هند / و فى سماح عمل ايه؟
فاطمه / دى كانت ليله البت حبيبه ابوها دا شلها و رقص بيها دا ما كانش بينزلها من على حجره و لا بيشيلها لحد
فاطمه تبتسم
هند / كان بيحبك اوى لما قالوله نكتب كتاب سماح قال اخد راى امها الأول ما كنتش اعرف عن الصعايده كدا بس فرحت لما عاشرتهم
فاطمه / لما كان يعرف ان فى اتنين هيطلقوا فى البلد او راجل غضب مراته كان بيجرى يدخل و يحل الموضوع و كان بيتحل الكبير و الصغير كان بيكبرله و كلمته مسموعه و حكمه نافذ و انا كمان كنت بحبه اوى و لسه والله
فاطمه الدموع تنزل منها تلم نفسها
فاطمه / انتى قاعده ترغى و شكلك فاضيه انا ورايا مليون حاجه عاوزه اروح اطمن على البت
فاطمه تقوم و تاخد العبايه و تدخل الحمام و هى بتمسح دموعها
……………………
فى الجنينه
انتصار تطلع تلحق عبير
انتصار / يا ست الابله يا ست الاستاذه
عبير تقف
انتصار / خير يا ست الاستاذه فى حد ضايقك و لا ايه البت مريم مش عامله الواجب اقطملك رقبتها والله … بت يا مريم
مريم تدخل
عبير / هو واضح ان قرار الحصه النهرده كان غلط من البدايه لا هى مركزه و لا البيت هادى و كل شويه حد يدخل يقطع الحصه و فى الاخر سابتنى و راحت وقفت تتكلم مع خطيبها
مريم / والله كان شايل القرص و كنت بدخلها المطبخ ما ينفعش يدخل عليكوا لكن
انتصار / ما وقفتش عليكي يعني يسيبها عند الباب و ينادى و بعدين انتى مقعده الست الابله بره ليه اصلا للى رايح و اللى جاى مدخلتوش جوه ليه زى كل مره
مريم / مهو برده ما بنعرفش نركز و العيال الصغيره بتاخد دروسها
انتصار / خشي المكتب بتاع ابوكى و لا اقولك اقعدوا فى الفرنده … لا برد اليومين دول … اطلعوا اوضتك و اقفلوا الباب ما فيهاش حاجه
عبير / على العموم ان شاء الله المره الجايه تكون المشكله دى اتحلت و كمان يكون الجو بقي اروق عن اذن حضرتك عشان مرتبطه بمعاد تانى
انتصار / اتفضلي … خليفه … خليفه… وصل الست الابله
عبير تمشي مع خليفه
مريم / ما تقول عندها حصه بدل ما تعمل مقموصه يعني
انتصار / قال يعني الست هانم مش غلطانه خشي لمى حاجتك واطلعى اوضتك و زاكرى انا مش نقصاكى
انتصار تدخل و تطلع فوق و مريم تلم حاجتها
…………………..
فى سرايا الجوارحه
سماح قاعده على السرير بتقرا قران باب الاوضه يخبط مغاورى يروح يفتح يلاقي ماجده شايله صينيه اكل
ماجده / هى عامله ايه
مغاورى ياخد منها الصينيه
مغاورى / الحمد لله تسلم ايدك تعبتى روحك
ماجده / تعبك راحه بنعمل تحت اكل للجماعه هنخلص و نروح نوديهولهم
مغاورى / ربنا يقويكوا انتى عامله ايه
ماجده / فى ايه
مغاورى / مع عمتك انتى بوجه عام
ماجده / ياخويا خليك فى عروستك يلا يلا ما تعطلنيش انا ورايا هم ما يتلم يلا فتك بعافيه
ماجده تمشي و مغاورى يقفل الباب و يدخل يحط الاكل على الترابيزه سماح تصدق
مغاورى / ماجده عملتهولك بايديها
سماح / هو عباده مقالكش هيجي امتى
مغاورى يروح يقعد جنب سماح على السرير
مغاورى / يجي وقت ما يجي الله يكون فى عونه اشغاله كتير
سماح تهز راسها
مغاورى / انا مش هقولك مالك عشان اللى ما يشوفش من الغربال يبقي اعمى بس
سماح / انا عارفه انى نكدت عليك فرحتك
مغاورى / انتى بتقولى ايه يا سماح دا كان فى مقام ابويا و اكتر دا هو اللى مربيني طب احكيلك كنت بعمل فيه ايه و انا صغير طب دا انا ياما طلعت عنيه و لا لما كنت اتخانق مع عباده و مختار
سماح / كنت مع مختار اكتر
مغاورى / لا دا فى الوش انا و عباده كنا نتفق على مختار و لما نيجي على مختار عباده يغضب طب انت عاوز ايه ما تجنينيش
سماح تضحك
مغاورى / الله اكبر … قومى كليلك لقمه و لا انتى استحليتي المحايله و اكلك فى بقك و كدا
سماح / كتير عليا
مغاورى / مفيش حاجه تكتر عليكي بس على راي احمد بدير فى ريه و سكينه و لما اكلك بيدي اكل بايه و انا جعان
سماح تبتسم و تهز راسها و تقوم
مغاورى / ربنا يهديكي يا ست الناس تعالى اقعدى جنبي هنا
مغاورى يمسك لسماح الكرسي تقعد
مغاورى / بدلعك اهو … بقدم السبت خدى بالك
سماح / يخليك ليا
مغاورى يقعد تليفونه يرن على الكومدينو جنب السرير
مغاورى / مش رادد اما اكل الاول
سماح / ليكون عباده هقوم اجيبهولك
سماح تقوم تلاقيه عباده
سماح / شوفت عباده … الو
عباده / الله اكبر ازيك يا ست الكل عامله ايه
سماح / الحمد لله انت عامل ايه وامك عامله ايه
عباده / احنا داخلين عليكوا اهو لما نوصل نتكلم براحتنا يلا مش عاوز اطول عشان سايق
سماح / ماشي يا خويا تيجي بالسلامه انا مستنياك
سماح تقفل و تجرى تفتح الدولاب
مغاورى / و الاكل
سماح / زمانهم جايين يادوب اللبس مش عاوزه اسيبهم ملطوعين تحت كتير عمتك تقول كلمه من عسلها لامى اديك شايف و ان كنت انا هسكت عشان خاطرك امى مش هتسكت مش عاوزين مشاكل
مغاورى / هو عندك حق و كل حاجه بس بقول بلاش تلبسي اسود
سماح / امال اللبس ايه يا مغاورى
مغاورى / هم جايين يصبحوا على عروسه مش جايين يعزوكى انا ما اعرفش بصراحه بس بيتهيالي انهم لما يشوفوكى ملونه هتفرق معاهم امك ما لحقتش تفرح بيكي
سماح / انا مش عارفه
مغاورى / اللبسي اللى يريحك و انا هخليهم يطلعوا لك بره بلاش القاعده تبقي تحت و اهو تاخدوا راحتكوا
سماح / احسن برده .. طب اللبس ايه
مغاورى / اى حاجه … بس الاول كلى لقمه امك هتشوفك وشك اصفر و ممقوت كدا تقول ايه
سماح / مفيش وقت يا مغاورى مفيش وقت
…………………..
فى سرايا الجوارحه
فاطمه و انتصار يدخلوا و عباده يشيل الصينيه و يمشي وراهم ام مغاورى تستقبلهم
ام مغاورى / يالف مرحب يالف … ايه ده يا ام عباده انتى بتركبينا الغلط و لا ايه طب والله الاكل على النار
فاطمه / الغلط عمره ما يركبكوا ابدا يا ام العريس دى حاجه صغيره كدا مش فى مقام لعريس
ام مغاورى / طب والله طلعنالهم الاكل لحد عندهم هو احنا هنجوعهم
انتصار / الاصول اصول برده يا ام مغاورى
مغاورى ينزل جرى
مغاورى / السلام عليكم نورتوا … ايه ده … سماح مستنياكوا فوق نطلع فوق احسن و لا ايه رايك يا امى
انتصار / العروسه هى اللى بتطلع للناس يا مغاورى
مغاورى / لا ما انا فاهم كل حاجه ما تقلقيش يا ست الكل نورتوا نورتوا
عباده / هو مفيش عنك و لا اى حاجه كدا يا عريس و لا ايه
مغاورى / و انت ايديك ما عدتش بتعرف تشيل و لا ايه .. هههه عنك عنك
عباده / الف مبروك يا سيد العرسان
مغاورى يشيل من عباده
مغاورى / الله يبارك فيك اتفضلوا اتفضلوا نورتوا البيت
انتصار / منور باهله
الكل يطلع فوق
…………………….
فى مخزن شركه الادويه
رشيد / ابو دى شغلانه يا جدع خلصنا و لا ايه
البنت / اخر صيدليه هنسلمها و ننهى الموضوع
رشيد / و ماله ما احنا خدامين الست
البنت تبصله
رشيد / فى حاجه يا قطه
تليفون رشيد يرن
رشيد / القطه الكبيره تحبى تاخدى تقوليلها حاجه
البنت تبص الناحيه التانيه
رشيد / اهلا
فيرا/ كنت عارفه انى اقدر اعتمد عليك
رشيد / لا يا شيخه
فيرا / مالك شكلك مش مبسوط
رشيد / هو انا دورى ايه فى الليله دى نفسي افهم انتى بتشتغليني يا فيرا
فيرا / ليه بس عربيه الشركه وزعت على الصيدليات فى خط السير اللى رسمتهولك و انت امنته
رشيد / مهو يا روح الروح اى كمين كان هيوقف العربيه و يفتشها كان هيلاقى الادويه بتاعه الشركه يعني كدا كدا فى السليم
فيرا / الحمد لله
رشيد / نعم !!
فيرا/ انت كنت عاوزنى امشي شمال يعني
رشيد / لا ازاى اللهم قوى ايمانك
فيرا / الدنيا مفتحه عنيها علينا و الموضوع سخن يبقي لازم نامن نفسنا بكل الطرق و لا ايه يا قلبي
رشيد / طب انا خلصت ممكن اروح بقي
فيرا / ممكن بس تعمل حسابك اسكندريه كبيره لسه فى خطين سير كمان و بعد كدا هتروح محافظه تانيه و هكذا لحد ما تخلص الجمهوريه كلها
رشيد / مش مستاهله سحله كل ده ممكن بعد كدا اعمله من بيتي
فيرا/ شغلك و انت ادرى بيه انا ليا الشغل يتم و بس
رشيد / ماشي يلا عشان تعبان و مش فايق يلا سلام
رشيد يقفل و يقوم يلم حاجته فى الشنطه البنت تروح تجيبله شنطه تانيه
البنت / الفلوس
رشيد يفتح الشنطه و يبص فيها و يشد رزمه و يحدفها للبت
رشيد / عشان تفكى البوز ده يلا سلام
رشيد ياخد الشنطتين و يمشي
………………….
فى اوضه سماح
سماح قاعده على السرير مع فاطمه و انتصار
انتصار / المهم تاخدى بالك من روحك و تاكلى كويس
فاطمه / و ان عوزتى اى حاجه فى اى وقت ديتها رنه
الا صحيح عامله ايه مع ام عباس
سماح/ دى غلبانه الله يصبرها و يصبرنا
فاطمه / اوعى تنسي انتى مين و لا بنت مين
انتصار / ان كنا بنسكت فدا مش ضعف بالعكس و زى سيدنا محمد قال انما الشديد الذى يملك نفسه عند الغضب
سماح / عليه الصلاه و السلام
فاطمه / بقولك ايه سيبك من اى حد و اى حاجه خدى بالك من جوزك … يلا يا ام فاتن
سماح / انتوا لحقتوا
فاطمه / لسه بقولك خلى بالك من جوزك خشي اغسلى وشك و سرحى شعرك الراجل ما لوش دعوه
سماح / ازاى يعني
إنتصار/ زى الناس الحى ابقي من الميت و انتى لسه عروسه و الحزن فى القلب لا هيخلص و لا هينتهى ما حدش هيحس بيه غيرك
فاطمه / اشغلى نفسك و اللهى روحك باى حاجه ابوكى ما كانش عاوزلك الحزن و لا كان يرضى ابدا انه يكون سبب فى كسر فرحتك
انتصار / هو الكلام صعب بس بكره مع الوقت هتفهمى يلا نفوتك بعافيه
انتصار تفتح الباب عباده و مغاورى يقوموا يقفوا
انتصار / لولا الملامه انا ما كنت خرجت من هنا غير و الزغروطه بترج البيت بس النصيب بقي
مغاورى يبتسم عباده يروح يوطى على سماح
عباده / ان كان ابوكى مات فاخوكى عايش
سماح / ربنا يديك الصحه و طوله العمر
عباده يبوس راسها و يمشى مع فاطمه وانتصار
مغاورى / هوصلهم و ارجعلك
سماح تبتسم مغاورى يمشي و يقفل الباب وراه
…………………….
فى شقه رشيد
سمر / طب و انت زعلان انك هتفضل هنا الفتره الجايه
رشيد / فى حاجه كبيره بتحصل حاجه من تحت الترابيزه حاجه مش فاهمها
سمر / و بعدين هتعمل ايه
رشيد / و انا اقدر اعمل ايه انا دورى فى الحكايه معروف الباقي بقي مش دورى
سمر / احنا عمرنا ما هنوصل لحاجه و احنا هنا انا بفكر نرجع انا و انت
رشيد / ازاى يعني
سمر / مهى لو فقدت الامل فيا ممكن تعمل فيه حاجه هتحافظ عليه ليه
رشيد / اللى ما تحتاجش النهرده لوشه بكره تحتاج لافاه
سمر / لو جالها فيه تمن كويس
رشيد / و دى فكره مش وحشه على فكره
سمر / انت مش قولت هى لازم ما تعرفش انك عارف هتعرض عليها فلوس ازاى
رشيد / و مين قال ان انا اللى هعرض انتى اللى هتعرضي و ان ما جابتش نتيجه يبقي اواجها انا بقي لو عوزانى اكمل شغل معاها تديني الولد ده
سمر / طب ما تبدا بدى
رشيد / ساعتها هنبقي حرقنا كل الورق اللى فى ايدينا انما لو بدئنا بيكي هيبقي لسه عندنا امل
سمر / خلاص يبقي على بركه الله بقي
…………………..
فى مكتب فى الداخليه
ظابط ١ / بس احنا بنفتش الصيدليات بشكل دورى بالتعاون مع وزاره الصحه و ما بنلاقيش حاجه
ظابط ٢ / دا غير ان الناس دلوقت بقوا عارفين مواصفات الحبوب و الاعراض الجانبيه بتاعتها يعنى لو حبايه واحده وقعت فى ايد اى حد بالغلط اكيد هيبلغوا
ظابط ٣ / بس احنا ما ينفعش نستنى حد يبلغ يا فندم احنا دورنا اننا نقطع الطريق على المدمنين انهم يوصلوا الحبوب دى فنجبرهم يطلعوا
ظابط ١ / ادهم باشا اخبار تامين مستشفيات الحجز ايه
ادهم/ فى بكره مؤتمر وزير الصحه هيطلع و يعلن عن خروج اكتر من متين حاله تمت شفائهم بالكامل
ظابط ١ / دا ما كانش سؤالى على العموم اى حاجه تحصل انت المسؤل قدامى
ظابط ٤ / طب و بعد خروجهم معاليك
ظابط ٢ / ناقص نحطلهم حراسات خاصه فى بيوتهم كمان
ظابط ٤ / الناس دى لو حطينا عنينا عليهم ممكن يوصلونا لاى طرف خيط
ظابط ١ / انتوا معاكوا طروف خيط تملا مصنع غزل و نسيج اتمنوا انكوا تستغلوهم بدل ما انتوا بتدوروا على سكك فاضيه نمشي فيها و مش محتاج اكرر اهميه القضيه دى
الرجاله تبص لبعض تليفون يوصل للظابط واحد
ظابط ١ / تقدروا تتفضلوا
الرجاله كلها تطلع بره الظابط يرد
الظابط / ايوه يا زياد طمنى فى جديد عندك
زياد / فى خط سير تانى بكره و فى بعده يا فندم
الظابط / كل دى صيدليات بتوزعلهم
زياد / ما افتكرش يا فندم بس المصدر معروف شركه الادويه و مصنع الحلويات
الظابط / احنا حطين الاتنين تحت المراقبه انا ما يهمنيش اقبض على كام واحد و معاهم شويه حبوب انا عاوز فيرا و اللى وراها يا زياد
زياد / يا فندم انا كل المعلومات اللى بتوصلنى
الظابط / مش كفايا يا زياد مش كفايا
زياد / باذن الله اى معلومه هوصلها هبلغها لحضرتك اول باول
الظابط / تمام يا زياد ربنا معاك
الظابط يقفل و يرمى الموبايل و يقعد يفكر
…………………..
فى مطبخ الجوارحه
ماجده بتخبز سماح تدخل المطبخ شايله صينيه عليها مواعين
سماح / صباح الخير … غسلتهم و نضاف و زى الفل
ماجده / تعبتى روحك يا عروسه كنتى ابعتيهم و انا اغسلهم
سماح / ما خدوش حاجه …بتعملى ايه … اساعدك
ماجده / دى قرص هطلعها رحمه و نور
سماح / طب دا انتى خلصتى الصعب كله
سماح تقعد
ماجده / هتعملى ايه ما ينفعش كدا
سماح / هتقرصي كل دول لوحدك هساعدك نخلص علاطول انا بحب الحاجات دى اوى حتى اسالي خديجه ما احبش العجن بس بحب التقريص
ماجده / انا بعمل اكتر من كدا لوحدى ما لكيش انتى دعوه هو مغاورى فين
سماح / نايم خليني اتسلى لما اتعب هقوم ماشي
سماح ترش دقيق و تبدا تبطط العجين
ماجده / سمعت انك شاطره فى الطبيخ
سماح / كلنا فى السراي شاطرين لا امى و لا ام فاتن هيسيبونى انا و لا اى واحده فينا الا اما نبقي بريفكس تعرفى ممكن امى تصحى الصبح تقولى اعمليلنا بشاميل النهرده يا سماح اعملى خلطه المحشي يا سماح احشي الحمام ده يا سماح و يا ويل ان باظ منى
كوثر تدخل
كوثر/ ما شوفناش يعني
سماح / ما انتى ما كنتيش بتيجي تاكلى عندنا
كوثر / احنا فيها ما تدوقينا
سماح / هتدوقى ما تقلقيش هنروح من بعض فين
كوثر / انا لسه هستنى يلا نقى اكله و اعمليها النهرده
سماح / كان نفسي يا عمتى بس اول ما مغاورى يصحى و يناديني هطلعله انا بس خفت اشغل التليفزيون اقلقه و زهقت قولت انزل شويه و هطلع تانى
كوثر / و هو مغاورى هيقول لا لاكل مراته
ماجده / انا كدا كدا جهزت الاكل مش مستاهله تعبها خليها مره تانيه
كوثر / و ماله خليها خفى عاوزين نلحق الشمس مش هنوزعها بايته
كوثر تطلع بره
سماح / انتى ما حدش بيساعدك ليه الكميه دى كانت تخلص فى نص ساعه
ماجده تتنهد
ماجده / كلهم تعبانين من اكل امبارح و عمتى حكمت رايها لازم النهرده و انا ما برضاش ازعلها بتصعب عليا
سماح / و انتى ما تعبتيش معاهم امبارح
ماجده / دى على روح جوزى يا سماح
سماح / هو انتى علاطول كدا
ماجده / علاطول ايه
سماح / بحسك هاديه و غلبانه عكس اخواتك يعني
ماجده / ههههههه ما كنتش كدا زمان بس حكم السن بقي ههههههههههه
سماح / حكم السن و لا حكم التجارب
ماجده / الاتنين يعني فى تجارب مش هتفهميها الا اما تكبرى و فى تجارب بتكبرك
سماح / كلام كبير
ماجده / ههههههههههههههه
سماح/ تفتكرى لو كان ابويا وحش معايا كان وجع فراقه هيكون اخف
ماجده / ما اعرفش
سماح / بس عباس كان وحش معاكى … انا اسفه انا
ماجده / كلنا فينا اللى فينا و العبره بالخواتيم عباس كان له حاجات برده مش هنكر بس كان له حاجات تانيه ما بتتحكيش … اقولك حاجه … انا ما فيش حاجه مهونه عليا فراقه الا انه اتصلح حاله فى اخر ايامه مطمنه عليه
سماح / بيوحشك صح
ماجده / طول الوقت
سماح / تفتكرى لو جالك حد كويس
ماجده / ههههههههههه و بتقولى عليا انا اللى غلبانه
سماح / انتى لسه صغيره و حلوه و الف من يتمني يناسب الحج شاهين الجرحى
ماجده / هم يتمنوا اه لكن انا لا انا خدت نصيبي خلاص
سماح / ما يمكن يكون كويس
ماجده / ما ينفعش تتجوزى واحد وانتى قلبك و تفكيرك مع واحد تانى حتى لو اللى بتحبيه ميت
سماح / يمكن تغيرى رايك مع الايام انتى مش بتقولى السن بيفرق فى التجارب
ماجده / هو انتى بتسالي كتير فى الحته دى ليه ليكون عندك عريس ليا
سماح / لا بس
ماجده / ههههههههههههه انا بهزر معاكى … بقولك ايه قومى اغسلي ايدك و اطلعى اتشطفى قبل ما مغاورى يصحى و تسلم ايدك
سماح / اساعدك شويه كمان
ماجده / لا يا ستى تشكرى حلو اوى لحد كدا انا هكمل اطلعى لجوزك
سماح / براحتك
سماح تقوم تنفض هدومها و تمشي و الابتسامه تروح من وش ماجده كوثر تدخل
كوثر / سابتك يعني
ماجده / انا اللى قولتلها تطلع لجوزها
كوثر / ابعدى عن البت دى احسنلك مش هيجي من وراها خير
ماجده / روحى ارتاحى يا عمتى و انا هخلص و اناديكي
كوثر / اما نشوف ياختى
كوثر تمشي ماجده تتنهد و تكمل شغل
……………………..
فى مطبخ الزنايته
هند بتعصر برتقال انتصار تدخل
انتصار / يا بخته
هند / هو مين ده
انتصار/ اللى بتعمليله العصير
هند / دا لبطه قافله على نفسها الباب من ساعه ما جت و صينيه الاكل نزلت زى ما طلعت
انتصار / والله غلبت معاها بتقول مش جعانه
هند / بس انا مش هسكت هعملها لقمه و اطلعهالها و مش هسيبها الا اما تاكل
انتصار تطبطب على هند
انتصار / كنت عارفه انك هتحبيها
هند / عملت عشانى كدا و اكتر و لا نسيتي
انتصار / عملت مع الكل و الله كلنا كنا عارفين اننا و هى يعني اكتر هنتحط فى الموقف ده كانوا بيقولوا و فعلا اقنعوها بعد سماح كانوا بيقولوا ابن الشيبه يتيم و العيال دى مين هيربيهم
هند / الاعمار بيد الله
انتصار / و نعم بالله فراقه قطع بينا خصوصا انه كان كويس
هند / ازاى بس دا كان بيشتكى من ضهره طول الوقت خصوصا الفتره اللى فاتت راح المستشفي اكتر من مره
انتصار / و الدكاتره قالوا انه كويس هو بس شويه الضغط حكم السن يعني و كان بياخد الدوا فى معاده بس ضهره ما كانش فيه حاجه
هند / اجله كدا بقي هنعمل ايه
انتصار / و فى ايدنا ايه نعمله
هند / انا خلصت هطلعلها بقي
انتصار تبتسم هند تاخد الصينيه و تمشي
……………….
فى اوضه سماح
سماح تدخل تتسحب تبص على مغاورى نايم تتسحب لحد ما توصل للدولاب تفتحه بالراحة و تطلع غيار تقفل الدولاب و تيجي تطلع
مغاورى / دا انتى تتحركى عادى اهون
سماح تتخض مغاورى يقوم يقعد
مغاورى/ افتكرتك حرامى … ايه ده ايه اللى عمل فيكي كدا
سماح / كنت بساعد ماجده فى الخبيز بص هتشطف بسرعه و اجيلك … انت جعان اسخنلك حاجه
مغاورى / لا تسلمى
سماح / خمس دقايق بس خمس دقايق
سماح تروح الحمام مغاورى يقوم يتمطع و يطلع بره يفتح التقفيل و يطلع كنكه و فنجانين
مغاورى / تشربي قهوه .. سماح تشربي قهوه .. انتى يا بت
مغاورى يفتح باب الحمام سماح تصرخ يقفل الباب بسرعه
مغاورى / اسف اسف … اسف ايه انتى مراتى
مغاورى يفتح الباب و يدخل
…………….
فى اوضه فاطمه
فاطمه قاعده و قدامها شكمجيه مليانه دهب الباب يخبط
فاطمه / ادخل
هند تدخل شايله الصينيه
هند / بصي بقي انا استغليت قدارتى المطبخيه و قطعتلك صدر الفرخه و عملته شاورما و حنطته بالفلفل و الطماطم و البصل و شويه مسطرده خلت ريحته ايه و ما لقيتش عيش سورى لفيته ببتاو و خلاص الجيش قالك ايه اتصرف
هند تحط الصينيه و تقعد
فاطمه / هو انتوا موراكوش الا تزغيطي انا كلت
هند / امال دى فرخه مين بقولك ايه هتاكلى يعني هتاكلى انا ضيعت وقت الجيم بتاعى مخصوص عشانك
فاطمه / ما بلاها المدعوق ده يا هند عشانك والله
هند / انا مش حامل
فاطمه / و طول ما انتى بتتنطتى كدا عمرك ما هتحملى اهدى شويه على الاقل كام شهر
هند / طب كلى و انا اسمع كلامك مش هتسمعى كلامى مش هسمع كلامك
هند تمسك الساندوتش لفاطمه فاطمه تقطم
هند / جامد صح
فاطمه تبتسم و تهز راسها اه هند تمسكهولها
هند / يلا الف هنا اجيلك الاقيكي خلصتى الاكل ده كله و شربتى العصير
هند تقف و تروح ناحيه الباب
فاطمه / انتى وعدتيني
هند / وعدتك مش نازله الجيم النهرده لحد العشا اتعشيتي هكمل لبكره فطرتى هكمل للغدى و هكذا
فاطمه / تعالى يا هند عوزاكى
هند تستغرب و ترجعلها
هند / خير
فاطمه تدور فى الصندوق و تطلع خاتم سولتير
فاطمه / خدى ده
هند/ ايه ده
فاطمه تمسك ايد هند هند تسحب ايدها
هند / دا بتاعك لو مش عوزاه اديه لسماح و لا خديجه
فاطمه / و هو انتى عندى اقل من سماح و لا خديجه … انا عارفه انك بتحبي الحاجات دى لكن لا انا و لا سماح و لا خديجه بنلبسهم
هند / امال اشتريتيه ليه
فاطمه / بكيد انتصار
هند و فاطمه يضحكوا
فاطمه / كنت صغيره و الحاجات دى ما كانتش منتشره وقتها و قولت اعمل بقي نفسي حاجه خليته يجيبهولى نزل مصر مخصوص و نقاه
هند / يعني هديه من عمى و تفرطى فيه كدا
فاطمه / مش بفرط فيه انا بحييه اللبسيه يا هند و ما تقلعيهوش و كل ما اشوفه فى ايدك هفتكره و اترحم عليه و انتى كمان تفتكريه و تترحمى عليه
هند / هترحم من غير حاجه خليهولك اللبسيه انتى
فاطمه/ هتاخديه و لا مش هاكل هاتى ايدك دى
فاطمه تمسك ايد هند و تلبسهولها بالعافيه هند تبصله
فاطمه / جوزك فين
هند / لسه ما جاش هيتاخر النهرده
فاطمه / طب استنى هنا
فاطمه تقوم تدخل الحمام و تطلع بعلبه صبغه لونها احمر
فاطمه / ما تيجي اعملك نيولوك
هند / هههههههههههه بتهزرى
فاطمه / انا شاطره فى الحاجات دى اوى ما يغركيش انى كنت بجيب ام داوود دى برده مكايده فى انتصار
هند / هههههههههههههههه انتى فظيعه
فاطمه / هتليق عليكي اوى صدقيني الاحمر ده مفعوله سحر و هظبطلك شعرك و ارسملك عنيكي و هتخلى مختار يلف حوالين نفسه النهرده
هند / بصراحه انا كان نفسي اجرب اللون بس كنت خايفه
فاطمه / ما تخافيش هتدعيلى
هند / طب كلى الاول
فاطمه / هعملك و على ما يخرط فى شعرك اكون كلت
فاطمه تدخل الحمام و هند قاعده مبتسمه
……………………
فى اوضه سماح
سماح بتسرح شعرها و مغاورى ممدد على السرير بيقلب فى التليفزيون
مغاورى / الا مفى فيلم جديد و لا اى حاجه تسلى الواحد كدا كلها خلق تسد النفس
مغاورى يطفى سماح تقوم تقعد جنبه
مغاورى / اهى دى الخلق اللى تفتح النفس
سماح تبتسم بخجل
سماح / كنت عاوزه اتكلم معاك فى حاجه ما تخصنيش
مغاورى يتعدل فى قعدته
سماح / بس تخصك انت
مغاورى/ طب ما تقولى خير
سماح / ماجده … عمتك سحلاها اوى هى يعني عشان بنت اصول مفيش حد يكلم عمتك تخف عنها شويه النهرده دخلت المطبخ بالصدفه لقيتها بتخبز رحمه و نور كميه كبيره لوحدها و عمتك كل شويه تدخل تزعقلها عشان تخلص و مفيش حد بيساعد
مغاورى يبان عليه الضيق
سماح / طب الكل تعبان عشان عملوا اكل كتير بعتوه عندنا حبكت الخبيز النهرده
مغاورى / ماجده ماخداهم على كدا ماجده بتحب الشقا
سماح / محدش بيحب الشقا يا مغاورى
مغاورى / كل واحد و ليه طريقته يا سماح هى بتحب تشقى و تهلك روحها عشان تنام من التعب من غير ما تفكر هى كدا من زمان هى اللى اخدت البيت كله على كدا
سماح / اقولك حاجه جوايا معرفش ينفع اقولها و لا لا
مغاورى / قولى
سماح / عمرى ما كنت اتمنى ان جوزى يعمل فيا اللى عباس كان بيعمله فى ماجده اختك و كنت بستغرب ازاى ساكتين
مغاورى الحزن يملا وشه
سماح / بس ببصلها دلوقت و من يوم ما مات قد ايه هاديه و قادره تعيش بقول سبحان الله يمكن لو كان كويس معاها كان قطع بيها و فرق معاها
مغاورى / انتى ما تعرفيش حاجه يا سماح
سماح / طب فهمنى انا برده بفكر فى نفس الموضوع يمكن ابويا لو كان وحش ما كنتش هزعل عليه اوى كدا
مغاورى/ عباس اتصلح حاله قبل ما يموت و عملها عيد ميلاد فى السر و جابلها هديه و رضاها و هى مش مبسوطه انه مات لا هى مبسوطه انه ما مامتش على معصيه انتى لو تسمعيها و هى بتتكلم عنه … مهما كانت المشاكل اللى بينهم كانوا بيحبوا بعض … دول بيحبوا بعض من و هم عيال
سماح / لو بيحبها خانها ليه كان بيضربها ليه
مغاورى / شيطان و دخل بينهم
سماح / و انت ممكن يجي عليك يوم و تضربنى يا مغاورى
مغاورى / عمرى ما عملتها عمرى ما مديت ايدي على واحده همدها عليكي انتى
سماح / و لا هتبص لغيرى
مغاورى / انتى و شطارتك بقي هههههههههههه
سماح / اخص عليك يا مغاورى
مغاورى / بهزر معاكى يا بت الله
سماح / لا ما تهزرش انا ما احبش الهزار فى الحاجات دى
مغاورى / طب لو بصيت هتعملى ايه
سماح/ هتقهر واموت و ابقي انبسط بقي مع الغندوره بتاعتك
مغاورى / ايه الرد ده امال فين السواطير و الاكياس البلاستيك مالك كدا ما تنشفي شويه
سماح / لا يا خويا انا مش زيك ما بعرفش ائذى اللى بحبهم
مغاورى / و انا كنت اذيت مين عشان تقولي كدا
سماح / مش هتبص على غيرى
مغاورى / ههههههههههههههه يخربيت عقلك يا بنت اللذينه يا بت دا كلام هزار انتى شوفتيني بصيت
سماح / غير بقي السيره دى كل شويه تقولها
مغاورى / دا انتى عقلك فسافيسي خالص
سماح/ ان كان عاجبك شوفلك واحده عقلها كبير
سماح تقوم و تدخل الحمام و ترزع الباب و مغاورى مصدوم
……………………..
فى اوضه فاطمه
هند قاعده شعرها مفرود احمر و عامله قصه لحد حاجبها و فاطمه قاعده قدامها بتكحلها انتصار تفتح الباب
انتصار / هى هند … بسم الله تبارك الله انا ما عرفتكيش
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
2 تعليقات