رواية هذه ليلتي الفصل الحادي والثلاثون 31 بقلم نجمة براقة

رواية هذه ليلتي الفصل الحادي والثلاثون 31 بقلم نجمة براقة

رواية هذه ليلتي الجزء الحادي والثلاثون

رواية هذه ليلتي البارت الحادي والثلاثون

رواية هذه ليلتي الحلقة الحادية والثلاثون

يامن بيكون قاعد في اوضته وبيشرب سجاير بتوتر ويكح لانه اول مره يشربها. ويحدث نفسه _ انت مظلمتهاش خليها تغور مطرح ماتغور، وايه يعنى يتيمه وصلاح ممكن يقتلها لو رجعتله، خليه يقتلها وهو نخلص منهم هما الاتنين، بس انت اللي غبي رايح تحب واحده وتجوزها وانت متعرفش اتربت ازاي ولا ماضيها شكله ايه، رانيا اتعادت مره تانيه، الله يلعن اختياراتك الزبالة.. خليني اتصل ب أدم واباركله علي حسن حظه اللي موقعهوش معاها، خليه يعرف انه كان حمار لما فكر فيها

بيمسك التليفون ويتصل ب آدم وهو منفعل وبيتعصب علي التليفون

ادم في المكتب _ ايه يا يامن

يامن بعصبيه_ مبروك ياصاحبي انت ربنا بيحبك وانا طلعت حمااار

ادم _ مالك في ايه

يامن يبكي وايده ترتجف _ طلعت بتخوني، ، ليلي بتعرف واحد عليه من اول شهر جواز طيب كانت استنت نتم سنه

ادم _ انت ايه اللي بتقوله دة ازاي تفكر كده من الأساس

يامن بانفعال _ وانت هتصدق ازاى مانت مشوفتش بعينك رسالته هو وبيقولها الطربش اللي هو انا يعني.. بس تعرف انا استأهل ضرب الجزمه علشان ساعدتها من الأول كان لازم اسيبها لا ابوك يموتها

ادم _ ليلى مستحيل تعمل كده انت فاهم غلط، ولو شوفتها بعيني مع حد هكدب نفسي

يامن _ ههههه ماهي خانتك معايا مش هي دي ليلي اللي بتحبك من صغرها وانت بتحبها، نسيتك في كام يوم

ادم بانفعال _ عشان كانت فكراك راجل بتحميها، تصدق هي غلطانه فعلا علشان حبت واحد زيك .. ليلي فين يا يامن

يامن بغضب _ طيب خليك معاها انا اصلا طلقتها

ادم بغضب _ ليلي فين بقولك

يامن _ مشيت

ادم _ مشيت في الوقت ده

يامن _ امال هخليها تستنا لصبح

ادم بغضب _ تصدق انك عيل، وبيقفل في وشه

يامن بغضب _ غبي صدقها لغيت ما تبقا زي حالاتي

ادم _ كفايه كده قومي روحي

بسمه _ في حآجه يا استاذ ادم

ادم _ يلا روحي، تعالي هوصلك في طريقي الوقت اتاخر

بسمه _ حاضر . بتمسك شنطتها وتنزل معاه

داخل العربيه

ادم بيسوق بسرعه ويبص حوليه يمكن يلاقيها

بسمه _ في حآجه يافندم

ادم _ ممكن تسكوتي

عند بيت بسمه

ادم_ انزلي يلا

بينزلها عند البيت وبيرجع يلف في الشوارع يدور عليها

في بيت شامي

شامي_ اتاخرتي ليه

بسمه _ كان عندي شغل لازم يخلص النهارده

شامي _ لو الموضوع ده هيتكرر متروحيش تاني

بسمه _ مش هيتكرر تاني

شامي _ مالك حد مزعلك؟

بسمه _ مش عارفه بس استاذ ادم حد كلمه وبقا يزعق وبعدين نزل وبيسوق بسرعه في وقت زي ده

شامي _ طيب وانتي مالك

بسمه _ وانا مالي ازاي بقولك بيسوق بسرعه وكمان متعصب

شامي _ بسمة ركزي في شغلك وبس، يسوق بسرعه او يتعصب متدخليش في اللي ميخصكش

بسمه _ في ايه يا شامي

شامي_ نفذي وخلاص

بسمه _ حاضر.. بس مالك حد ضايقك في الشغل؟

شامي _ لا انا تمام،… عاملين اية الناس اللى فى الشغل معاكي

بسمه _ تمام

شامي _ ليكى اختلاط بحد هناك

بسمه _ الاستاذ احمد والاستاذ ادم والانسه ناردين، البنت اللي حصلت بسببها المشكله عارفها طبعا

شامي _ اه يعني فاكرها شويه،.. كويسه معاكي ولا بتضايقك

بسمه _ بالعكس دي لطيفه اوي انا قبل ما اشوفها كنت بكرها بس لما عرفتها طلعت بنت حلوه، بس دايما شارده ومش معانا

شامي _ سألتيها على السبب

بسمه _ سألتها بس مقالتش

شامي _ إذا صعبانه عليكي، صحبيها وقربي منها

بسمه _ حاولت، بنتكلم اه بس مبتقولش اللي شاغلها،

شامي _ يمكن حآجه اكبر من انها تتقال، قربي منها انتي زكيه وهتقدري تساعديها

بسمه _ شيفاك مهتم بيها

شامي_ عادي

بسمه _ هو انت تعرفها، قريبين من بعض يعنى

شامي بشرود_ بعاد اوي

بسمه _ مالك يا شامي، ايه حكاية البنت دى كنت شيفاكم واقفين مع بعض الصبح ودلوقتي مهتم بيها

شامي _ مفيش، يلا تصبحي علي خير

بيسيبها ويدخل اوضته ويفتح صورتها علي التليفون ويكبرها باصبعيه ويحدث نفسه _ لو بأيدي امسح اي حزن من حياتك، مكنتش اتاخرت لكن انا سبب الحزن ده،، بس صدقيني مش أكتر من حزني عليكي يا حوريه،، اتمنالك كل الخير واتمنالك تقابلي اللي يقدر يمحي الحزن من حياتك

حتي لو كان هياخدك منى

ناردين قاعده في اوضتها وداخله على رقم شامي ومتردده ترن ولا لأ، وبعد تفكير ضغطت اتصال وحطت التليفون علي ودنها وغمضت، خوف من رد فعله، وبعد شويه بيرد

شامي _ بتتصلي ليه مش قولت ابعدي عني

ناردين بدموع _ مقدرتش

شامي _ اقدري

ناردين بدموع _ طيب ازاي وانا انفذ

شامي _ اتجوزي اول عريس يتقدملك

ناردين ببكاء _ ومين قالك اني هتجوز انا هفضل كده طول عمري،، لأما انت لأما بلاش

شامي _ وانا مش هنفع يا ناردين،

ناردين ببكاء _ خلينا نهرب ياشامي، علشان خاطري

شامي _ طيب واخواتي وامي، ابوكي مش هيسيبهم لو هربت معاكي

ناردين ببكاء _ طيب وانا،، انت مش بتقول انك بتحبني

شامي _ بحبك والله بحبك ومش هبالغ لو قولت انك النفس اللي بتنفسه، بس القصة مش هتنتهي بهروبنا،

ناردين ببكاء _ انا هموت نفسي يا شامي،

شامي _ عشان مين تموتي نفسك، اعقلي

ناردين ببكاء _ مش هقدر اعيش من غيرك، اعيش ليه ولمين

شامي بحزن _ ناردين، انا مش بأيدي حآجه، عارفه لو انا لوحدي، كنت هربت معاكي من زمان، بس امي واخواتي ميستهلوش اسيبهم يتأذو

ناردين ببكاء _ يبقا ملهاش حل تانى، انا لو مكونتش معاك هموت نفسي

شامي بنرفزه _ متقوليش الكلمه دي تاني، هما كل اللي ملهمش نصيب في حد حبوه يموتو نفسهم

ناردين ببكاء _ مش قادره، انا بموت كل يوم ومش قادره اتكلم مع حد غيرك

شامي _ حاولي تشغلي نفسك بشغل وتعرفي حد جديد اكيد هيغشلك وتحبيه انتي حاسه بكده عشان اول مره تقربي من حد زي ما قربتي مني

ناردين بدموع _ أقرب من حد غيرك؟ مستحيل، لو مش هكون ليك مش هكون لحد تانى

شامي _ اخر كلام

ناردين بدموع _ ومعنديش غيره

شامي _ حلو اوي انا مبسوط بالحالة اللي وصلتيلها معايا

ناردين _ يعني ايه

شامي بتنهيده _ يعني انا كده خدت حق امي ورقدتها في المستشفى، وحق المقلب اللي عملتيه فيه، والضرب اللي اتضربته بسببك، وكدبك عليه من رقم توقه، واخرهم الرصاصه اللي خدتها عشانك

ناردين بدموع _ مش هصدقك مهما تقول،

شامي _ لازم تصدقيني، انا حلفت ادفعك تمن اللي عملتيه، وحلفت لا اعلقك بيه عشان تتعذبي ومتجرأيش تحكي لحد عن وجعك ده.. واديني وصلتك لانك عاوز تنتحري، أخيرا شوفتك مزلوله قدامي،

ناردين بدموع _ والله ما تقولي ايه ما هصدقك يا شامي، متحاولش تفهمني انك كنت بتضحك عليه

شامي بانفعال _ تصدقي او لأ، انتي حره، وخليكي كده مصدقه نفسك لغيت ما تتصدمي بعدين،

ناردين بدموع _ بحبك ياشامي

شامي بانفعال _ انتي غبيه مبتفهميش معندكيش كرامة يعني

ناردين بدموع _ بحبك

شامي _ انتي حره، بس لو اتصلتي هنا تانى هبلغ ابوكي

ناردين ببكاء _ والله بحبك

شامي بانفعال_ كفاااايه

شامي يقفل في وشها ودموعه تغلبه وتنزل غصب عنه ليحدثه نفسه _ اعملك ايه بس، مش هينفع يا ناردين والله ماهينفع

ناردين تنام على السرير وتحضن المخده وتبكي وتحدث نفسها _ بتكدب عليه لو قولت ايه مش هصدق انك. كنت بتخدعني، ومهما تقول مش هبطل احبك

تاني يوم

يامن بيكون نايم علي الكرسي وبيصحا علي صوت منصور

منصور بزعيق_ ياااامن

يامن بفزع _ ليلي

منصور _ ياااامن

يامن يقوم بسرعه ويروح عند منصور وهو شكله متبهدل وشعره ملخبط

يامن _ في ايه

منصور _ تعاله شوف

يامن _ اشوف ايه

منصور بغضب _ مراتك بتتخطف الكاميرات صورتها، ازاي تخرج في وقت متاخر لوحدها

يامن يقرب لشاشة ويشوفها هي وبتتخطف في تسجيلات الكاميرات

منصور _ فهمني ايه طلعها، ومين دول

يامن بذهول _ ليلي لا لا

منصور _ رد عليه

يامن _ معرفش معرفش، انا خارج

منصور _ فهمني الاول

يامن _ مش وقته، بيروح يجيب تليفونه ويطلع جري لبرا ويركب العربيه، ويروح بيت كمال والحرس يوقفوه

يامن _ عاوز اقابل كمال

الحارس _ هنبلغه

يامن _ بسرعة

بعد شويه بيجي الحارس

الحارس _ سيبوه

بيسيبوه وهو بيدخل جري

يامن _ كمال ليلى اتخطفت

كمال بصدمه _ مين خطفها

يامن _ معرفش، شوفتها في تسجيلات الكاميرا، انت تقدر ترجعها صح

كمال _ مفيش غيره صلاح الكلب

يامن بانفعال _ صلاح تانى، الراجل ده عاوز مننا ايه ،

كمال_ انت ازاي تسيبها لوحدها مش قادر تحميها كنت قولي

يامن بانفعال_ ضحك عليه

كمال _ ضحك عليك ازاي

يامن ببكاء _ بعت رسايل على تليفونها وخلاني اشوك فيها وخلتها تمشي بالليل لوحدها وهما كانو مستنين بره

كمال يرفع ايده ويضربه بغضب _ انت خليتها تمشي لوحدها بالليل، امال لو مكنتش عارف انه مستقصدها،.. اكيد هيقتلها وانت السبب

يامن بدموع _ انا السبب صح بس خلينا نرجعها وبعدين اعمل اللي انت عاوزة معايا

كمال بانفعال _ دا لو مكنش قتلها، غبببي انا غلطان اني سلمتهالك

يامن _ هو عاوز منها ايه تانى مش بعدت عنه وعن ابنه

كمال بانفعال _ علشان متعرفش انه هو شريكي في قتل ابوها

يامن بصدمه _ صلاح قتل ابو ليلي

كمال _ انا اللي نفذت وهو خطط وساعدني

يامن _ طيب ليه

كمال _ كلم ادم خليه يجي فوراً

يامن _ مش هيسمعني

كمال _ كلمه وادهوني

يامن يرن عليه وهو يقفل

يامن _ بيقفل عليه

كمال _ هات رقمه

يامن بيكتبلو الرقم وبيرن عليه،

ادم _ مين

كمال _ عاوز اقابلك

ادم _ انت مين وتقابلني بخصوص ايه

كمال _ انا كمال خلف الله

ادم _ ومتصل ليه

كمال _ عاوز اتكلم معاك

ادم _ مفيش بينا كلام يتقال

كمال _ حتى لو عرفت ان ابوك خاطف ليلي دلوقتي

ادم _ وبابا يخطفها ليه تاني .. انت كداب

كمال _ علشان متعرفش سره

ادم _ وهو ايه سره ده بقا

كمال _ انه قتل نور الدين

ادم بغضب _ انا وليلي ويامن عارفين انك انت اللي قتلته متلبسش غيرك جريمتك

كمال _ ماشي، بس انت مسالتش نفسك ازاي بقيتو اغنياء بشكل ده في لحظة بعد ما كنتو ناس من الطبقة المتوسطة كل اللى حيلتهم شركه لسه في بدايتها و واقعه كمان

ادم بانفعال_ انت راجل واطي ومهما تقول مش هصدقك

كمال _ طيب قولي انتو بقيتو كده ازاي

ادم بغضب _ حتي لو كلامك صح، ايه دخل نور الدين الراجل اللي علي قد حاله بفلوس بابا وغناه فجاه

كمال _ ما انت لما تقابلني هقولك

ادم _ ده فخ من بتوعك انا عارف، ومش هاجي

كمال _ انت حر بس لازم تعرف اني هلاقي ليلي وتكفير عن ذنبي هقتلها ابوك واخلصها منه

ادم _ لو قربت منه هقتلك

كمال _ قولت اللي عندي، ياريت لو خايف عليه تقوله ليلي تكون عندي

ادم بانفعال _ ملكش دعوه بليلي، يامن طلقها وانا هتجوزها واعرف احميها

كمال _ وهي هتوافق تجوزك بعد ما تعرف ان ابوك قتل ابوها

ادم بغضب _ انت كداب، دا كان صاحب عمره مستحيل يعملها

كمال _ ابوك. ملهوش عزيز، مش ليلي دي اللي رباها ورغم كده حاول يقتلها كذا مره

ادم يقفل في وشه ويطلع عند صلاح، يلاقيه عند الباب وخارج

ادم _ استنا

صلاح _ في ايه

ادم يروح عنده _ وديتها فين

صلاح _ هي مين

ادم_ ليلي هيكون مين غيرها

صلاح_ ليلى في بيت جوزها يابني

ادم بغضب_ ليلي فين يا بابا

صلاح_ ما تيجي تضربني قلمين احسن

ادم بغضب_ رد عليه ودتها فين

صلاح ببرود_ ملكش دعوه انت برا الموضوع

ادم_ انت ايه، شيطان مبترحمش، عاوز منها ايه تانى بعد ما بعدت عنك

صلاح_ عاوز اتجوزها

ادم بصدمه_ نعم

صلاح_ زي ما سمعت، امال انا منعتك تجوزها ليه ماهو عشان عاوزها لنفسي

ادم بغضب_ انت مش طبيعي، ليلي اللي انت مربيها زي ابوها… وابوها ايه بقا، والله مش بعيد تكون انت اللي قتلت نور الدين زي ما قال كمال

صلاح يمسكه من قميصه بغضب_ وانت شوفت كمال فين وقالك ايه الواطي ده

ادم_ قالي انك انت اللي قتلته، ودلوقتي صدقته، مش بعيد عليك

صلاح بتهديد_ خليييك بعيد احسن والله هنسا انك ابني واقتلك.انت وليلي ويامن وكمال وامك اللي قاعده فوق دي

ادم_ يعنى انت اللي قتلته بجد

صلاح_ اه قتلته وهقتل بنته زي ما قتلته، وانت خليك في حياتك، لا تحصلهم

ادم بصدمه_ انا مش مصدقك بجد، انت ايه

صلاح يذقه بعيد بانفعال_ اه انا ومستعد اقتل تاني وتالت علشان اوصل للي عاوزة

ادم بغضب_ انا هبلغ عنك لو مرجعتهاش، وعيشتك دي انا مش عاوزها، قولي ليلي فين احسنلك

صلاح _ علشان خايب وغبي انا غلطان بعتك تتعلم برا كان لازم اخليك تشتغل زي زمان علشان تعرف معنا الشقا وتستغل اي فرصه تجيلك

ادم _ مش عاوز فرص ولا عاوز فلوس، انا هاخد امي وناردين ونمشي وخليك انت لوحدك لغيت ما تموت ومتلقيش حد ينجدك

صلاح _ لا ياحبيبي مش صلاح اللي عيل زيك هيوقفه ويلوي دراعه، اعقل كده وروح شوف شغلك واشرب قهوه علشان تهدا

ادم بغضب _ بقوولك هاخد اختي وامي ونمشي ، خليك لوحدك، اه وحاجه كمان لو ليلي مرجعتش، انا هبلغ عنك يا صلاح

صلاح يشاور ل الحرس يمسكوه، وفعلا بيمسكوه ويكتفو ايديه

ادم يشد في نفسه بغضب _ سيبوني انت عاوز مني ايه

صلاح _ هاتوه علي العربيه

ناردين بتكون واقفه بعيد وبتسمعه ولما بيمشو بتطلع وراهم

في بيت كمال

يامن_ هنعمل ايه

كمال _ معرفش انا بفكر اهو

تليفون يامن بيرن وبتكون ناردين

يامن _ نعم

ناردين _ يامن الحقني، بابا خد ادم وحابس ليلي، اتصرف لازم نلقحهم، انا مش هقدر اعمل حآجه لوحدي

يامن _ هما فين

ناردين _ هبعتلك الموقع، انا دلوقتي ماشيه وراهم، اتصرف يا يامن انا خايفه يعملهم حآجه

يامن _ طيب بسرعه ابعتي

كمال_ في ايه

يامن _ ناردين بتقول انه خطف ادم

كمال _ ما يخطفو ولا يولع

يامن _ اكيد هيوديه في مكان ليلي، لازم نلحقهم

كمال _ طيب يلا بينا، والله ماهو عايش يوم تاني بعد النهارده

في بيت فهد،

علي السطوح

فهد _ مبقتش عارف اعمل ايه معاه مبياكولش ولا يخرج ودايما قاعد لوحده

نور _ انت مبتعرفش تصرف وسع انا هوريك ازاي تتعامل مع المواقف دي

فهد _ هتعملي ايه يعني

نور _ بص في المواقف دي علشان تخرج حد من حالته، لازم يحس انه في حد محتاجه واوي كمان،ف هينسا اللي هو فيه ويحاول يساعد الشخص التاني، زيك انت كده

فهد_ مين يساعد مين مش فاهم

نور _عز يساعدك انت

فهد_ يساعدني في ايه انا اصلا مفييش حآجه

نور بإبتسامة_ بسيطه. تعاله معايا وانا هخلي فيك حاجات

فهد _ هتعملي ايه

نور_ تعاله بس

بينزلو تحت ويدخلو الشقة

نور بصراخ _ الحقننني، يافهد هموت

فهد بقلق_ مالك يانور

نور _ بطني بتتقطع

عز بيطلع من جوه على صوت صراخها،_ ايه ده مالها

نور بألم _ هموت الحقوني،

فهد _ هنوديها لدكتور بسرعه

عز _ طيب يلا

نور بألم _ لا انا عارفه ايه علاجي، عاوزة ينسووووون

فهد بقلق_ عز اعمل ينسون بسرعه

عز _ حاضر حاضر،.. بيجري علي المطبخ وهي بتتعدل وتبتسم بخبث

فهد _ في ايه

نور _ خليك زكي اللي زي ده مش هيخرج من حالته غير لما يشوف حد محتاجه،

فهد بغيظ _ وانتي بتستموتي، علي اساس هو يهتم بيكي وانا اقعد اتفرج

نور بإبتسامة _ اسكت دلوقتي، انا مش عاوزاه يهتم بيه انا

فهد بغيظ _ انتي عاوزة تعملي ايه بظبط

نور تضربه بالقلم والقلم يسمع في البيت وبانفعال_ انت حقير

فهد يفتح عينية للاخر بصدمه_ انتي عملتي ايه

عز بيجي من جوه_ مالكم

نور بانفعال_ صاحبك يا استاذ، بيستغل تعبي ويقولي باتي عندنا، ليه مليش اهل، انت ربنا رحم اهلك وماااتو قبل ما املهم يخيب فيك

عز بعصبيه_ انتي ازاي تتكلمي معاه بطريقة دي نسيتي نفسك يابت انتي

نور_ ملكش دعوه انت خليك في خيبتك، انا كلامي مع الغبي ده اللي فاكر كل البنات ممكن يترمو تحت رجله، دا حتى كلبهُ مات من نجاسته

فهد عارف انها بتمثل، بس كلامها اثر فيه و وجعه

نور _ ساكت ليه، بتحس اوي يعني، انا مش عايزة اشوفك تاني فوق،

وبتمشي خطوتين و عز بيروح وراها ويمسك ايدها عشان يضربها وفهد بيوقفه

فهد_ سبها،.. يلا روحي

نور تشد ايدها من عز وتطلع على فوق

عز بانفعال_ انت ازاي تسكتلها

فهد بخنقه_ بتحاول تساعدك بس متعرفش انها كده بتضايقني بجد.. انا مابصدق انسا وهي بكل غباء جاي تعمل فيها مُصلحه وتقلب عليه المواجع

عز _ وهي تساعدني ليه اصلا مالها بيه، انا هروح اخليها تسيب العماره كلها

فهد _ لا، سيبها

عز بانفعال _ هتقعد تعمل ايه بعد اللى هببته

فهد _ انا عاوزها

عز _ دي بنت متخلفه عاوزها تعمل بيها ايه

فهد بخنقه _ خلاص ياعز بقولك سيبها، انا داخل ارتاح شويه

عز _ متزعلش ياصاحبي، انا اهلك لو تحب

فهد بخنقه _ طبعاً، يلا اسيبك

فهد بيدخل اوضته وعز بيطلع عند نور وهو مضايق منها

عز_ انتي يابت ياللي هنا

نور بتطلع من الاوضه _ عاوز ايه

عز بغيظ_ متبقيش تدخلي في اللي ميخصكش مالك انتي بيه اخرج من اللي انا فيه ولا اولع

نور _ هو قالك

عز _ اه يختي قالي،، رايحه تعايريه بموت اهله وكلبهُ انتي عارفه عنهم حآجه عشان تخرفي في الكلام

نور _ انت بتزعق ليه دلوقتي

عز _ يا بجاحتك وكمان مش عارفه، اتفضلي روحي صلحي العك اللي عملتيه

نور _ وانا عملت ايه يعني اول واحد اهله يموتو ولا ايه

عز _ انتي متخلفه؛ هو سهل ان الاهل يموتو يعني، يمكن انتي كارهه اهلك هو لأ،،.. كان بيحبهم لدرجة كبيره ومبيحبش حد يتكلم عنهم بطريقة وحشه احمدي ربنا انه سابك عايشه

نور _ هو زعل اوي كده

عز بقرف_ ايوه زعلان اوي كده، اتفضلي روحي اعتذريلوه

نور _ لما يجي ابقا اعتذر

عز بقرف_ لو جه بقا

نور _ طيب ما تخليك جمبه طالما زعل اوي كده

عز بقرف_ هخليني جمبه امال هنحتاجلك انتي

نور بإبتسامة _ ماشي

بسمه بتروح الشغل تاني يوم ومبتلقيش ناردين ولا ادم، استنتهم لغيت ما عدا معادهم حاولت تتصل ب أدم بس مبيردش عليها . لتحدث نفسها بقلق _ ليكون حصله حآجه امبارح فينك يا استاذ ادم

في بيت منعزل عن المناطق السكنية بيوصل صلاح ورجالته بيكونو ماسكين ادم

ادم بغضب _ سيبوني، خليهم يسبوني

صلاح _ اربطهولي جوه جمب الحلوه

بياخدوه ويكتفوه جمبها

ليلى _ اادم.. انتو عايزين منه ايه

ادم يستسلم ليهم ويقعد جمبها _ انتي ليه طلعتي من البيت يا ليلي

ليلي ببكاء _ هما عاوزين مننا ايه تاني

ادم _ خلصتو… اتفضلو بقا

ليلي ببكاء _ مين اللى بيعمل فينا كده

صلاح _ انا يابنت الغالي

ليلي بانفعال _ انا مش بعدت عنك عاوز مني ايه تانى

صلاح _ ابوكي جاني في المنام وحلفني اوديكي ليه

ادم _ اياك تقربلها انا بحذرك

صلاح _ مش تخليك في نفسك … هي دي اللي انت قارفني علشانها اهي هتموت قدامك علشان نخلص

ليلي تبص لادم وتبكي_ هو ليه بيعمل معايا كده، انا اذيته في ايه

صلاح _ قولها يابني مينفعش تموتي وانتي نفسك في حآجه

ادم _ بابا كفايه الله يخليك ، سيبها تمشي وهي مش هترجع تانى، انا هسفرها بره مصر

صلاح _ ومين قالك انك هتخرج من هنا.. انت ولد عاق وعقاب ليك هتفضل محبوس هنا لغيت ما تموت

ادم بانفعال _ اقتلنا احنا الاتنين وريحنا اصلا مبقتش عاوز اشوف وشك ولا يشرفني تكون ابويا

صلاح يرفع المسدس على ليلي _ خليك ساكت… انتي عاوزة تعرفي بكرهك ليه صح .. هقولك

ادم بترجي _ علشان خاطري بلاش، اوعدك مش هتقربلك

ليلى بدموع _ خليه يقول ويموتني عادي، بس اعرف انا اذيته في ايه علشان يعمل معايا كله ده

ادم _ اسكوتي

صلاح _ حرام عليك تخليها تموت وهي نفسها تعرف، انا هقولك، .. اصل يابنت الغالي احنا بينا تار وطول مانتي موجوده عندي وباشوفك بتاكلي معايا علي نفس السفره واناشايفك حيه بأكل فيها واكبرها وهتيجي في الاخر وتبلعني انا والعيال، اللي منهم الفاشل ده اللي رايح يحبك ويعصاني عشانك

ليلي _ تار ايه اللي بيني وبينك

صلاح يبصلها بإبتسامة ويسكت

ليلي _ تار ايه يا ادم

صلاح بإبتسامة _ قتلت نور الدين

ليلى بدموع _ مش انت انا شوفت كمال وعرفته من الوحمه، بتكدب ليه

صلاح ببرود _ صح صح، كمال هو اللى نفذ وانا اللي خططت.. بس ابوكي كان يستاهل يتقتل.. كانت دماغه جزمه قديمه، قال ايه عاوز يسلم شنطه بملايين للبوليس علشان بيخاف يأكلك حرام ههههه

ليلى _ بتهزر صح، ابوك بيهزر يا ادم وعاوز يجنني قبل ما يموتني

ادم _ كان فيها ايه الشنطة دي

صلاح _ هرووين

ادم بصدمه _ يعني صح فلوسنا حرام، عيشتنا طول عمرنا من الحرام يا بابا

صلاح _ وانت فاكر ان الشركه الكحيانه بتاعتنا تاكلك عيش حاف، دي كانت بتهش

ليلي باحتقار_ انت حقير، والله حقير وزباله وخاين و واطي، لو راجل فكني

صلاح بإبتسامة _ مش بقولك حيه، فكها يابني اما نشوف هتسم مين

ادم _ اسكوتي انتي، لا يا بابا سيبك منها

صلاح يبصلها بنظرات كلها رغبه _ انت اركن دلوقتي ، فكها يابني

ناردين بتوصل وبتكون باصه من الشباك وبتشوف صلاح وهو بيشد ليلي من شعرها ويقربها منه، بتدخل بسرعه وتذق الحرس، وتشد منه المسدس وتصوبه علي رأسها

ناردين ببكاء _ سيبها يا بابا والا هموت نفسي

صلاح_ انتي ايه جابك

ناردين ببكاء_ بقولك سيبها، وفك ادم قبل ما اضغط الزناد

صلاح_ اضربي

ناردين _ اضرب؟

صلاح بغضب_ اقتلي نفسك قبل ما اقتلك انا

ليلى تضربه في ركبته وتجري على ناردين وتمسك منها المسدس وتقرب من الحيط وبيكون قدامها صلاح بيتوجع

ليلي _ لو حد منكم قرب هقتله، .. ناردين فكي ادم…. ناردين بتجري تفكه

صلاح بضحك _ ههههه مش بقول حيه، وهتبلعنا، بيقرب منها، يلا ياحبيبتي اضربي

ليلي بتحذير _ هضرب

صلاح يقترب اكثر _ اضربي مستنيه ايه

ليلي بغضب _ خطوه تانيه والله هضرب

صلاح يقرب منها ويشد منها المسدس تانى، ويمسكها ويوجه على دماغها ويتحسس شعرها بوجهه _ خساره يا ادم مش هينفع الواد وابوه

ادم بتحذير _ ابعد عنها احسنلك

صلاح _ انتو اربطهملي هما الجوز، انا عارف اني معرفتش اخلف ولا اربي، عليه العوض

ناردين _ بابا انت بتعمل ايه، احنا ولادك

صلاح _ ولادي بيعصوني وانا الايد اللي توجعني اقطعها، وانا اقدر اخلف تانى غيركم،

ليلى تشد في نفسها _ غوور بقا ربنا ياخدك ويريحنا منك، ابعد عني.

رجاله صلاح بيربطو ادم وناردين، وهو يبتدي يتقرب منها ، وفي لحظه، بتيجي طلقه تخترق صدره

وبيضغط الزناد بدون ادراك لتخرج منه رصاصه، وتعلا الصرخات في المكان،

تفتكرو الرصاصه جت في مين

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية هذه ليلتي)