رواية روز الأحمد الحلقة الثالثة 3 بقلم مريم
 |
| رواية روز الأحمد الحلقة الثالثة 3 بقلم مريم |
رواية روز الأحمد الحلقة الثالثة 3 بقلم مريم
عادت روز إلى منزلها ودلفت إلى غرفتها وجلست على فراشها بانزعاج : انا نفسي افهم انا مخنوقة ومتضايقة ليه دلوقتي!
تابعت بنبرة لوم : يمكن علشان حاسه اني زودتها معاه انا احرجته جدا ما كانش هيحصل حاجه لو كنت احرجته بذوق كوني جاوبته اصلا وهو ما كانش متوقع ده . ده في حد ذاته احراج ليه فماكانش لازم اكملها بقى واقوله سؤالك غلط والعك اللي عكيته ده ، انا لازم اكلمه. بس هكلمه ازاي وانا مش معايا رقمه.. بعد فترة قليلة من التفكير قالت بحماس : بس لاقيتها محمد هو اللي بياخد ارقام الدكاترة اكيد هلاقي رقمه معاه. اتصلت روز بمحمد وبعد لحظات أتاها رده : ازيك يا روز عامله ايه
_ الحمدلله يا محمد انت اخبارك ايه
_ تمام الحمدلله
_معلش يا محمد عارفة اني هتعبك معايا بس ممكن لو معاك رقم دكتور احمد تبعتهولي
_ لا معلش لحظة عشان انا مش مستوعب دكتور احمد مين بالظبط؟!
_ في ايه يا ابني ما تركز معايا دكتور احمد ده اللي دخلنا انهارده
قال بلؤم : الاه احنا هننحرف بقى ولا ايه هو اكمنه حلو وملون عاوزه رقمه طب ما انا حلو برضو وممكن اسد في اي حاجه انت بس تؤمر يا جميل
ضحكت روز فقال : ايوه كده اضحكي وروقي بس بجد وبعيدا عن الهزار ممكن اعرف ليه عاوزه رقمه
_ في ايه يا محمد انت خايف تديني الرقم!
_ ان جيتي للحق اه انا خايف وما بضمنكيش خايف تعكي الدنيا معاه ويقلب علينا كلنا والدفعة كلها بدل ما تصيف في الساحل هنروح نصيف في الكلية
_ لا اطمن ياخويا مش هعك الدنيا انا هتصل اصلح اللي انا عكيته ده وهعتذرله ممكن تديني الرقم بقى
_ ده ايه العقل اللي نزل عليكي فجأة ده على العموم إذا كان كده اوك هقفل معاكي وابعتهولك و ربنا يكملك بعقلك يالا سلام.
ارسل محمد الرقم إلى روز التي تسارعت دقات قلبها عندما استلمت رقمه ولكنها حاولت ان تنظم نفسها عن طريق الشهيق والزفير ثم اغمضت عينيها وقالت بهدوء : مفيش اي حاجه تستدعي القلق انا هتصل دلوقتي وهعتذرله و لو هو اتعصب انا مش هتعصب وهتمالك اعصابي وهحرجه بهدوئي مش بلساني. تنهدت ثم فتحت عينيها بهدوء وقامت بالاتصال به.. وعند احمد..
امسك احمد هاتفه فوجده رقم غريب فترك الهاتف
فقال ياسين : ايه ياعم ما ترد
_ لا ده رقم غريب
_ ومن امتى وانت ما بتردش على ارقام غريبة تلاقيه حد من الطلاب عاوز يسألك على حاجه
_ وانا بقى مش رايق لكده مش عاوز ارد على حد ولا اكلم حد
فقال ياسين بابتسامه ماكرة : افرض يا عم مزه بتعاكس نقول للنعمة لأ؟ رد رد ربنا يفتحها عليك
ضحك احمد وقال : والله انت فايق ورايق يا ياسين نفسي في نص روقانك ده
ياسين : وايه اللي مانعك ياخويا اللي عاوز حاجه بيسعى ليها جو الامنيات ده ما بيأكلش عيش ما دام انت عاوز تبقى رايق خليك هادي وماتتعصبش من اتفه الاسباب وارجع اضحك وفرفش محدش واخد منها حاجه مش ده كله كان كلامك برضو يا دوك ولا انا غلطان
ابتسم احمد وقال : لا مش غلطان يا هندسه انت صح
اتسعت ابتسامة ياسين وهو يقول : ياااه بما انك قولتلي يا هندسه دي تبقى انت روقت فعلا ياما نفسي ترجع تاني زي زمان يا احمد والله وحشتني يا اخي ووحشني هزارك ومقالبك. قاطع حديث ياسين رنين الهاتف مره اخرى فقال : اهو رجع يرن تاني رد بقى
تنهد احمد ثم امسك بالهاتف قائلا : الو مين معايا؟
ارتبكت روز عندما سمعت صوته فـانهت المكالمة بسرعة فقال احمد وهو يضع الهاتف على الطاولة امامه : مش قولتلك تلاقيه حد بيعاكس
وعند روز قالت روز بعصبية : انا غبية كان لازم اتوتر واقفل السكة ! تلاقيه دلوقتي افتكر حد بيعاكسه ومش هيرد عليا لو اتصلت تاني تأففت بإنزعاج ثم تابعت : انا هجرب اتصل تاني ومش هتوتر وكله هيبقى تمام ان شاء الله ثم اخذت نفس عميق و عاودت الاتصال فقال احمد بضجر : يوه بقى ده شكله فاضي وحابب يتسلى. اختتم جملته برده على المكالمه قائلا : ممكن لو عندك حاجه تقولها تتفضل ولو معندكش ما تتصلش تاني علشان لو سيادتك فاضي فأنا مش فاضيلك
قالت روز بلهجة مرتبكة : انا اسفة جدا ماكانش قصدي اقفل السكة الخط اتقطع بالغلط
فقال احمد وهو يشعر أنه سمع هذا الصوت من قبل : مين حضرتك ؟
_ أنا روز
_ روز مين؟
فقالت بتوتر : انا.. انا اللي حضرتك طردتها من محاضرة انهارده
لا يعلم لما ابتسم لا إراديًا عندما علم انها المتصلة ولكنه سرعان ما انتبه لنفسه واخفى تلك الابتسامة وقال بحزم : اه وحضرتك بقى متصلة ليه ياترى عندك كلام نسيتي تقوليه ا.. قاطعته قائلة : انا اسفة. صمتت قليلا ثم تابعت : انا اتصلت علشان اتأسفلك انا لما قعدت مع نفسي حسيت اني غلطت وانه ماكانش ينفع اقول اللي قُلته مهما كان حضرتك اكبر مني وواجب عليا احترامك حتى لو كنا مختلفين في وجهات النظر
كان مبتسمًا وهو يستمع إليها ابتسامة كشفت عن غمازاته ولكنه قال محاولا استفزازها : طبعا انت سألتي حد من الدفعه اللي قبلك عني وعرفتي اني ما بتفاهمش مع اي حد يُخطئ او حد طول لسانه عليا مع ان لحد دلوقتي محدش اتجرأ اصلا و عمل كده غير سيادتك فما اظنش ان مكالمتك واعتذارك ده ممكن يمنعني ان اتخذ معاكي اي اجراء يخطر على بالي
حاولت روز السيطرة على غضبها كما عاهدت نفسها وقالت بهدوء : انا ما اتصلتش علشان امنع حضرتك من اتخاذ اي اجراء ضدي انا اتصلت علشان حسيت اني غلطت وانا اتعودت اني لما اغلط اعتذر لكن حضرتك تقدر طبعا تعمل اللي انت عايزه المهم اني ابقى ريحت ضميري واتأسفت.
لقد كان يشعر منذ البداية انها لم تتصل خوفًا منه ولكنه اراد فقط ان يستفزها بهذا الكلام فقال بابتسامة تحدى : تمام وانا مصدقك بس انت لما قليتي ادبك معايا عملتي كده قدام الكل فياترى الهانم عندها الجرأة انها تطلع على ال stage في محاضرة بكرة وتعتذرلي في الميكروفون قدام الطلبة كلهم؟!
لمست نبرة التحدي في صوته فقالت بتحدي هي الاخرى : طبعا عندي الجرأة اني اعمل كده ما دام غلطي كان قدام الكل لازم اعتذاري كمان يبقى قدام الكل . بس ياترى بعد ما اعتذر لحضرتك انت هيكون عندك الجرأة انك تعتذرلي انا والبنات قدام الكل ؟ لانك اتكلمت معانا بأسلوب غير لائق واحرجتنا قداهم و كده نبقى خالصين
فقال مثيرا استفزازها : مش انت اللي تقوليلي اعمل ايه وما اعملش ايه وبعدين انت اخدتي من وقتي كتير وانا مابحبش اضيع وقتي مع عيال
وهنا لم تستطع التحكم في نفسها وقالت بانفعال : تصدق ان انا غلطانه انت ما تستاهلش ان حد يعتذرلك ولا يكلمك من اصله ثم انهت المكالمة وتركته والابتسامة تملئ وجهه لانه تمكن من اثارة غضبها
فقال ياسين بسعادة عارمة : انا مش مصدق عينيا انت طول المكالمة الابتسامة ما فارقتش وشك ده انت وشك كان بينور يا راجل وانت بتتكلم
فقال بابتسامة : بصراحه حسيت اني اخدت جزء من تاري زي ما هي حرقت دمي انا كمان حرقت دمها ولسه ياما هتشوف علشان تتعلم بعد كده تطول لسانها عليا
_ ليه بس كده يا ابوحميد انا اللي فهمته من ردودك عليها انها اتصلت علشان تعتذر صح؟
اخبره احمد بمحتوى المكالمه فقال ياسين : تصدق انت جبلة يعني البنت تعتذرلك وتقولك انها مستعده تعتذرلك قدام الكل وانت تكلمها بالسخافة دي والله مالكش حق
_ لا اسيبها تقولي انت كمان لازم تعتذر
_ والله ده حقها بما انها هتعتذرلك لازم انت كمان تعتذر وتبقوا خالصين
_ بقولك ايه يا ياسين طلع نفسك من الموضوع ده هي اللي بدأت ولعبت معايا خلاص تتحمل بقى وتورينا شطارتها ..
جاء اليوم التالي وامتلئ المدرج بالطلاب في انتظار قدوم الدكتور أما خارج قاعة المحاضرات كانت روز تأكل المسافات بخطواتها السريعة قائلة : ياربنا انا اتأخرت اوي هي ناقصة وفي الوقت ذاته كان احمد يسير بخطوات متعجله وهو يتحدث مع ياسين في التليفون قائلا : بقولك ايه يا ياسين وحياة ابوك يا شيخ انا مش فاضيلك دلوقتي انا متأخر عن المحاضرة اقفل دلوقتي وابقى اكلمك لما اخلص. وفجأة اصطدم بها فسقطت الكتب من يدها فانحنت روز وقالت بعصبية وهي تلملم اغراضها : مش تفتح يا اخ هي ناقصة عطله هو يوم باين من اوله انا مش عارفه انا اصطبحت بوش مين انهارده المنبه ما يرنش و المواصلات تتأخر وكل ده وانا لسه ما اصطبحتش بوش البيه اللي جوا ده اومال لما اشوفه بقى هيحصل ايه؟ زلزال؟! نهضت روز لتصطدم عينيها بأعين أحمد الذي كان يقف أمامها عاقدا ذراعيه وينظر إليها بثبات فصرخت من الفزع فقال احمد وعينيه مثبته علي عينيها : سلامة الحلوة من الخضة ايه شوفتي عفريت
ارتبكت روز ووضعت خصلتها خلف اذنها
فاقترب منها فزاد توترها واصبحت دقات قلبها كقرع الطبول ثم همس بجانب اذنها : لو حصلك كل الحاجات دي من غير ما تصطبحي بوش حد فأكيد انت بصيتي في المرايه اول ما صحيتي من النوم فنصيحه مني ما تبصيش في المرايه بعد كده علشان يومك يبقى تمام . ضربت روز الارض بقدمها بغيظ ثم دلفت إلى قاعة المحاضرات لتتسع ابتسامة أحمد ثم هندم بدلته و لحق بها وبمجرد ان دلف إلى القاعة وجدها تقف بجانب المنصة في انتظاره فابتسم ابتسامة جانبية ثم صعد على المنصة وامسك بالميكروفون وقال بمكر : طبعا الكل عارف ان في تجاوزات حصلت امبارح من الانسة روز وهي اتصلت بيا امبارح واعتذرتلي و الحت عليا اني اسامحها و طلبت مني انها تعتذرلي قدامكم كلكم تكفيرا عن غلطها. اتسعت حدقتاها بصدمة وقالت بنفسها : يا كدااااب انا اتحايلت عليك و انا اللي طلبت منك اني اعتذر قدام الكل! طيب يا احمد يا كريم
اما وريتك ما ابقاش انا روز انا هخليك تعتذرلي انا والبنات انهارده وقدام الكل وفي نفس المايك..
يتبع..
لقراءة الحلقة الرابعة : اضغط هنا
لقراءة باقي حلقات الرواية : اضغط هنا
نرشح لك أيضاً رواية موعد مع الوحوش للكاتبة مروة شطا.
