Uncategorized

رواية المؤامرة الحلقة السادسة 6 بقلم منة محسن

 رواية المؤامرة الحلقة السادسة 6 بقلم منة محسن

رواية المؤامرة الحلقة السادسة 6 بقلم منة محسن

رواية المؤامرة الحلقة السادسة 6 بقلم منة محسن

انجى قاعده مع هانى فى الكافيه .
هانى:انا لقيت شغلانه ف بنك وبأذن الله هستلمها من بكره..وبنائآ على كده روحتلها وحاولت أقنعها ترجع…بس هى كانت رافضه تسمعنى حتى.
انجى بصتله بحزن وهو مسك أيدها وأبتسم بخفه:تيجى تعيشى معايا؟؟
انجى بصتله كانت ف عيونها علامات الرفض لكن معرفتش ازاى تقولهاله اتكلمت ونبره صوتها باين فيها توترها:اا…انا…مرتاحه مع خالى و…قريب أملاكه هتبقى بأسمى انا ..او مامى..
هانى باصصلها وفهم أنها بينت رفضها للموضوع لكن بطريقه غير مباشره..
هانى ابتسم بخفه وهز رأسه بإيجاب:ربنا يسعدك اكتر واكتر ويقدملك اللى فيه الخير
انجى بصتله وابتسمت بخفه ووقفت:طيب انا لازم امشى زمان خالى عزام رجع للقصر .
هانى وقف ومسك أيدها باسها:ابقى خلينى اشوفك انتى بتوحشينى اوى ببقى حاسس بالوحده من غيرك.
انجى ابتسمت بخفه وبتطمنه:اكيد هجيلك تانى قريب ..وهكلمك ف التليفون كمان.
هانى ابتسم :يارب بس متكونيش بتصبرينى وبس.
انجى ضحكت وهزت راسها بنفى:لا متخافش انا فعلا هتصل بيك ومش هيعدى يوم إلا لما اكلمك..
هانى ابتسم وحضنها:خلى بالك من نفسك ولو احتجتى اى حاجه اتصلى بيا…عارف ان عندك كل حاجه ومش محتجالى بس أجبرى بخاطرى حتى..
انجى بعدت وبصتله بأبتسامه:انا اكيد لو احتجت حاجه هتصل بيك…يلا سلام..
هانى ابتسم وهى مشيت.
للكاتبه/منه محسن [Milly]
روسندا شربت الازازه كلها وبقت عماله تضحك من غير اى سبب..
فاطمه راحتلها: روسندا هانم عزام بيه عايز يشوفك .
روسندا بصتلها وبتضحك هزت راسها بإيجاب:طيب يا فطومه..قوليلو ف السكه
فاطمه بصتلها بقلق وحزن:انتى كويسه؟
روسندا هزت راسها بإيجاب وبتضحك.
فاطمه مسكت دراعها:تعالى انا هسندك..
روسندا سحبت أيدها وهزت راسها بنفى وبثمل:قولتلك ..كويسه..
فاطمه بصالها بحزن وهى بتحاول تسند نفسها وتقف..اتسندت على الشجره لحد ماوقفت وهى سانده عليها بثمل
كرم راحلهم وبص لفاطمه بتعجب:هى مالها ايه اللى حاصلها؟؟
فاطمه بحزن على حالتها:هى سكرت ..وعزام بيه لو عرف مش هيسكتلها.
روسندا مركذه مع كرم وأبتسمت بثمل واعجاب قربت وحطت أيدها حوالين رقبته وسندت عليه…كانت هتقع بس هو مسكها: روسندا هانم انتى لازم ترتاحى..
روسندا مسكت وشه خليته يبصلها وابتسمت..حطت أيدها على شعره وبتبص لعيونه وميلت راسها على كتفها:تعرف انك حلو..
كرم بصلها ورفع حواجبه وبص لفاطمه بخجل:احم..انا خاطب ..
فاطمه ضحكت غصب عنها.
روسندا حطت أيدها على وشه وبصاله بثمل قربت من وشه جات تبوسه بعد وشه بسرعه وبصوت عالى:عزام بيه.. عزام بيه فى حاله تحرش هنا ..
روسندا شيفاه مشوش والصوره مش واضحه قدامها ..حطت أيدها على راسها بثمل وتعب
كرم لاحظ ده عليها:اا..انتى كويسه؟؟!!
روسندا مش سمعاه حطت أيدها على بطنها بألم وفجاه وقعت غابت عن الوعى وفاطمه جريت عشان تسندها بس كان كرم سندها وشالها.
فاطمه قربت وبتحاول تفوقها: روسندا هانم .. روسندا هانم..هو طبيعى أنها يغمى عليها؟؟!!
كرم باصص لروسندا بقلق:مش عارف بس احنا لازم نبلغ عزام بيه عشان لو ينقلها على المستشفى احنا مش عارفين ايه اللى ممكن يكون حاصلها..
فاطمه بصت لروسندا بقلق وهزت راسها بإيجاب:انا هروح اقوله..
انجى:قوليلى فى اى حاجه حصلت؟؟
عايده بصتلها بأبتسامه:قصدك من ناحيه مين؟؟
انجى: روسندا…
عايده:لا يا روحى خلاص..الموضوع اعتبريه منتهى 
انجى بصتلها اوى:يعنى ايه!!..ماتت؟؟
عايده بصتلها بأبتسامه خبيثه:هو كده..
انجى ابتسمت بأنبهار:معقول ننجح بالبساطه دى..انا كنت متخيله أننا هناخد وقت عقبال ما نخلص منها..
ف الوقت ده سمعوا صوت عزام بينادى على انجى وعايده..
عايده بصت لانجى بأبتسامه خبيثه:هو اكيد بينادينا عشانها..المهم دلوقت نتصرف ولا كأننا نعرف حاجة امم .
انجى هزت راسها بإيجاب وسعاده ممزوجه بتحمس:امم..
خرجوا من الأوضه وراحوا على اوضه روسندا .
عايده:فى حاجه يا عزام يا خويا؟؟!
عزام قاعد جانب روسندا على السرير وماسك أيدها بيحكها وبيحاول يفوقها: روسندا تعبانه عايده اتصلى بالدكتور..
عايده بصتله وانجى بصتلها بتردد.
عايده:اا..دكتور ايه انتوا لازم تنقلوها على المستشفى عشان لو فى اى اشاعات تتعملها وهيكون احسن بردو.
انجى بصتلها اوى..
عزام بقلق وأرتباك :طيب فاطمه لبسيها اى حاجه عقبال ماغير هدومى كرم جهز العربيه ..
كرم هز رأسه بإيجاب ومشى 
عايده خرجت برا اوضه روسندا هى وانجى
انجى بصتلها بعتاب:انتى ليه قولتلهم ينقلوها على المستشفى كان ممكن تقوليلوا حاضر وماتتصليش بالدكتور.
عايده:غلط طبعآ لما اقولهم حاضر وماتصلش بالدكتور وقتها هيبقى فيه شك من ناحيتنا..غير لما تقولهم يودوها المستشفى وعقبال مايروحوا يكون السم أتمكن منها وانتقل ف دمها كله وقتها..انتهت فهمت يا روحى متراجعيش حاجه ورايا لان مفيش حاجه غلط بعملها..
انجى ابتسمت بتفكير وتفهم..
بعد مراحوا للمستشفى ..
عزام واقف برا الاوضه الموجوده فيها روسندا والقلق متملكه بطريقه جنونيه .
كرم بصله وملاحظ خوفه الشديد عليها.
عزام بيفتكر المشهد اللى طلع فيه الدكتور من الاوضه وخبره بموع مراته (ام روسندا) ..وده اللى كان بيخليه يتجنن اكتر وتوتره وخوفه عليها يزيد.
الدكتور خرج من الأوضه بعد وقت قصير:احنا عملنالها تحاليل ومستنيين النتيجه..
عزام بصله بقلق وهز رأسه بإيجاب:طيب والتحاليل دى نتيجتها هتطلع بعد قد ايه؟؟؟!
الدكتور:متقلقش بعد وقت قصير اول ماتطلع هنبلغك بالنتيجه..
عزام اتنهد بعمق وهز رأسه بإيجاب:امم ..
بعد شويه من الوقت وعزام كان على أعصابه ..بعد مانتيجه التحاليل ظهرت.
الدكتور جى يدخل الاوضه الموجوده فيها روسندا وقفه صوت عزام..
عزام وقف قدامه بلهفه وعلى أمل يقوله اى حاجه يطمنه بيها:طمنى يا دكتور نتيجه التحاليل ظهرت ؟؟..هى بقالها فتره جوا..
الدكتور:هى فعلا ظهرت اتضح أنها اتسممت ..أو شربت خمره مسممه..
عزام بصله بصدمه :اتسممت!!
كرم بصله وبص للدكتور وكان مستغرب ..ايه سبب التسمم اللى بيتكلم عليه الدكتور!!..هى مشربتش حاجه غير الخمره..
الدكتور:بس من حسن حظها أن الخمره اللى شربتها أفسدت مفعول السم ..واحنا دلوقت هنعملها غسيل معده .
عزام اتنهد بعمق وقلق:طيب يا دكتور اعملها اى حاجه بس المهم تكون كويسه..
الدكتور بيطمنه:متقلقش احنا هنعملها اللى نقدر عليه وبأذن الله ميكونش فيه خطر على حياتها..عن اذنكوا .
ويدخل الاوضه الموجوده فيها روسندا.
عزام حط أيده على جبينه بقلق وقله حيله:هى لسه بتشرب ..وادى اخرتها …بس ازاى خرجت من القصر !
كرم بصله:هى مخرجتش يا عزام بيه.
عزام بصله بتعجب:امال جابت الخمره منين؟!!!
كرم بصله وافتكر لما كانت فاطمه موديالها الازازه …نفس الازازه كانت فاضيه ومرميه على الأرض ف الحديقه لما كانت ثمله…وف نفس الوقت عزام افتكر لما فاطمه كانت ماسكه ازازه وهتوديهالها..
عزام بأنزعاج وضيق:انا فهمت هى جابت الخمره منين..هى حطتها ف ازازه على أنها عصير عشان معرفش.
كرم:بس مين اللى سمملها الخمره؟؟!!!
عزام بصله بتفكير :فاطمه هى اللى ودتلها الازازه بس أنا واثق فيها هى اللى مربيه روسندا بعد وفاه مامتها ومش معقول تكون عملت حاجه زى كده….هاااا انا كل ماده بقلق عليها اكتر .. كرم المهم واللى لازم تعمله تخلى بالك منها اكتر ومتفارقهاش ولا لاحظه مجرد ماتخرج من اوضتها عايزك ملازمها.
كرم بصله وهز رأسه بإيجاب:امرك يا عزام بيه .
فى قصر عزام..
عايده قاعده على الكنبه بتتفرج على التليفزيون وبتاكل عنب وبصوت عالى:فاااطمه…انتى يا زفته ..
فاطمه راحتلها بضيق مخفى:نعم يا هانم؟
عايده بصتلها بزعيق:ايه نايمه على ودانك؟؟..اول مناديكى تيجى جرى فاهمه؟؟
فاطمه بصت ف الأرض :فهمت يا هانم..
عايده:عايزاكى تعمليلى تورته النهارده يعتبر عيد بالنسبالي.
فاطمه بصتلها:بس يا هانم ازاى اعمل حلويات وروسندا هانم ف المستشفى ..
عايده بصتلها بصلابه وبزعيق:انتى تقولى نعم وحاضر وبس فاهمه..
فاطمه بصت ف الأرض واتكلمت بنفى:انا اسفه يا عايده هانم بس أنا لو عملت كده عزام بيه ممكن يتردنى وكمان لازم احترم مرض روسندا هانم .
عايده وقفت بغضب وبزعيق:انتى بتعارضى كلامى!!
فاطمه:اكيد لا انا بس عارفه ايه إللى المفروض اعمله و ايه اللى مش المفروض اعمله دى واجبات عليا..
عايده بزعيق:وكمان بتبجحى إن ماتردتكيش من هنا ميبقاش اسمى عايده..
انجى راحتلهم وبتحاول تهدى الجو:مامى فى ايه صوتك عالى ليه؟؟؟
عايده:الزفته دى بتعارض كلامى وبتبجح كمان فاكره نفسها هتستمر هنا ..
انجى قاطعتها بمسكه دراعها وبصت لفاطمه:اا..روحى انتى..
فاطمه مشيت وانجى بصت لعايده بعتاب:مامى انتى كده كأنك بتقوللها انك فرحانه بدخول روسندا المستشفى .
عايده:وايه الغلط انا فعلا فرحانه .
انجى:طيب بس ماينفعش توضحيلها كده وإلا الشك هيكون علينا احنا..
عايده:مش مهم انا مش هدارى فرحتى ولا لاى سبب دى الحاجه اللى استنيتها من زمن ومتشوقه جدا اسمعهم بيعلنوا خبر وفاتها..يااا اد ايه انا فرحانه..
للكاتبه/منه محسن [Milly]
كريم دخل الفله.
سوسن راحتله بلهفه وملكت وشه بين ايدها:حبيبى كنت فين كل ده قلقتنى عليك..
كريم بعد و حط ايده قدامها بتعب ونعاس:انا كويس.
سوسن مسكت دراعه:مالك حبيبى انت تعبان؟؟
كريم بضيق:شويه .
سوسن:حاسس بأيه نروح المستشفى؟؟
كريم زاء أيدها بضيق وعنف:ماما خلاص بقى انا قولتلك كويس..
سابها وطلع على اوضته وهى كانت مصدومه من تصرفه معاها .
سوسن راحت على اوضتها هى ومصطفى..
سوسن بتصحى مصطفى : مصطفى.. مصطفى قوم شوف ابنك..
مصطفى بنعاس ومش قادر يفتح عيونه:ماله ابنى يا سوسن؟؟؟؟!
سوسن:هو لسه جاى وشكله مش مظبوط حاولت افهم ماله بس هو قالى انا كويس .
مصطفى:طيب بدل ماهو كويس اعمل ايه يعنى!؟
سوسن:هو شكله مش كويس انا متأكده أن فى حاجه مضيقاه أو تعبان.
مصطفى: سوسن سيبيه ينام وسيبينى انا كمان.
سوسن:مصطفى انت هتنام ومنعرفش ابنك ماله ..
مصطفى شد الغطا على وشه بأنزعاج:يوه ه سيبينى بقى .
سوسن بصتله بأنزعاج وضربت كتفه:نام يا مصطفى نام..
للكاتبه/منه محسن [Milly]
فى المستشفى .
عزام قاعد حاطت أيده على جبينه ومغمض عيونه بتعب..
كرم مركذ معاه ..قرب حط أيده على كتفه:عزام بيه ممكن تروح ترتاح وانا هفضل هنا وهبلغ حضرتك لما تفوق .
عزام هز رأسه بنفى:وهتجيلى منين الراحه وهى هنا معرفش ايه اللى بيحصلها..انا مش هسيبها وامشى
كرم:بس الدكتور قال ان حالتها اتعدت الخطر وشويه وهتفوق وحضرتك قلبك تعبك ولازمك راحه عشان ماتتعبش اكتر.
عزام اتعدل ف قعدته وبصله بحزن:انا مش همشى من هنا الا لما تفوق واخدها معايا.
كرم بصله وهز رأسه بإيجاب:طيب زى ماحضرتك تحب…انا هروح اصلى العشاء تحب حضرتك تيجى معايا ونرجع تكون فاقت؟
عزام بصله وهز رأسه بإيجاب:يلا يا بنى..يمكن ربنا يسمع منى ويهديها.
ويمشوا.
بعد ماخلصوا صلاه ورجعوا على المستشفى..
الدكتور راح لعزام :الانسه روسندا فاقت وكانت بتسئل على حضرتك.
عزام ابتسم براحه راح بسرعه على الاوضه الموجوده فيها روسندا..
كرم راح وراه ..
عزام خبط على باب أوضتها ودخل.
روسندا فتحت عيونها وهى تحت جهاز التنفس..عزام قعد على كرسى جنبها ومسك أيدها:حبيبتى قلقتينى عليكى.
روسندا مدت أيدها بعدت جهاز التنفس عن بؤها بتعب…بتحاول تقعد وعزام ساعدها..
عزام :على مهلك.
روسندا حطت أيدها على بطنها بألم وبصت لعزام بأستغراب:هو ايه اللى حصل؟؟!!
عزام:الخمره اللى حضرتك شربتيها كانت مسممه…
روسندا بصتله:مسممه ازاى!؟؟؟
عزام:الله اعلم بس ستر ربنا أن الخمره وقفت مفعول السم … روسندا مش كفايه بقى؟؟…انتى هتسمعيلى وتهتمى بصحتك وتبعدى عن الطريق اللى انتى ماشيه فيه ده !!؟
روسندا بعدت نظرها عنه وعيونها جات ف عيون كرم .
كرم ابتسم ورفع حواجبه:حمدالله على سلامتك.
روسندا بعدت نظرها عنه وبصت لعزام بغل:خرج الكأن ده برا..
كرم بصلها ورفع حاجب واحد.
عزام: روسندا ممكن تهدى انتى تعبانه.
روسندا بعدت نظرها عنه وحطت أيدها على بطنها بألم:اااااااه..
عزام:انادي للدكتور؟؟
روسندا هزت راسها بنفى:عايزه اخرج من هنا انا بتخنق من المستشفى.
عزام:انتى لازم تفضلى هنا على الأقل لحد بكره .
روسندا:انا مش هستحمل افضل هنا لحد بكره ..
عزام:طيب انا هروح اسئل الدكتور ولو قال تخرجى هخرجك..
ويقف ويخرج من الاوضه.
كرم راح قعد مكان معزام كان قاعد..
روسندا بصتله بأستغراب
كرم بصلها وأبتسم:الحقيقه انا كنت عايز اسئلك على حاجه محيرانى اوى..
روسندا بصاله ومستنياه يكمل
كرم:هو انا عاجبك؟؟؟
روسندا بصتله وبرقت:نعم؟؟
كرم بيستفزها:لو عاجبك قولى ماهو انك تقوليلى انت حلو وتبوسينى ده كلو بيوحى على..
روسندا قاطعته بصدمه من كلامه:هاااى استنى ايه اللى بتقوله ده !!..حلو ايه وبوس مين ؟؟!!
كرم:ايوه قبل مايغمى عليكى انتى مسكتى وشى وقولتيلى انى حلو وبوستينى كمان ..مش مصدقانى؟..أسئلى الداده فاطمه ..
روسندا بصاله ولسه صدمتها من اللى قاله متحكمه فيها.
كرم بصلها وكان بيكتم ضحكته بالعافيه:احم ..انا بقول ناخد رأى عزام بيه ف الموضوع ده اسمه حب ولا حاجه تانيه.
جى يقف روسندا مسكت ايده بسرعه :ااا..انت عارف انى مكنتش ف وعيى..صح؟؟
كرم بصلها ورفع حاجبه:الصراحه لا. 
روسندا بصتله بغل وغضب:انت كذاب .
كرم:تؤتؤتؤ…شوفى مين اللى بيغلط.
روسندا اتكلمت بمسكنه:اا..مش قصدى ده انا حتى تعبانه و..
كرم:امم وبعدين!
روسندا بصتله بغضب وغل:انت بتهددنى؟؟
كرم:اكيد مش قصدى اهددك بس لو انتى شيفانى كده يبقى خلاص..
روسندا الغل بياكل فيها:طيب ممكن يا كرم بعد اذنك تخلى الفضايح دى بينى وبينك
كرم بصلها وأبتسم بأستفزاز ضم عيونه وهو مبتسم وهز رأسه بإيجاب:ممكن.
روسندا بعدت نظرها عنه بغل .
عزام دخل الاوضه الموجوده فيها روسندا.
عزام قرب وقعد جنبها على السرير وبصلها:الدكتور قال ممكن تخرجى بس لازملك راحه تامه..
روسندا بتحاول تقف بتعب.
عزام مسك دراعها وبيساعدها تقف: كرم تعالى ساعدنى أخرجها..
كرم قرب جى يمسك دراعها بعدته واتكلمت بتحذير ومن غير ماتبصله:اياك تلمسنى فاهم؟
كرم بصلها ورفع حاجب واحد وبخبث :اممم…ام..رك..يا روسندا هانم..
بعد ماخرجوا من المستشفى وروحوا على القصر..
عايده قاعده ف اوضتها وقفت اول ماسمعت صوت عزام …قامت من على السرير وخرجت من اوضتها وهى متحمسه تسمع الخبر اللى حلمت كتير بيه.
اول ماخرجت لقت انجى واقفه مكانها قدام الباب ومبرقه وباين على وشها علامات الصدمه.
عايده بصتلها بأستغراب وبتناديها لكن مفيش اى استجابه ..
عايده:انجى ممكن تردى عليا وتفهمينى فى ايه؟؟؟
انجى شاورتلها بصباعها على عزام وروسندا اللى داخلين القصر .
فاطمه وعزام جم يمسكوا أيدها عشان يسندوهه بعدت عنهم :انا كويسه ممكن خلاص بقى.
عايده برقت اول مشافتهم صدمه الكون كله اتملكتها..
انجى همست ولسه الصدمه متملكاهه:كده تمام اوى انا بردو بقول مش معقول نخلص منها بالسرعه دى..
عايده بصتلها وبصت لروسندا ولسه مصدومه:ازاى ده حصل!!
عزام بصوت عالى:فاطمه …عايده …انجى…كلوا يجيلى حالا .
عايده وانجى قربوا منهم .
انجى بصت لروسندا وبتحاول تبتسم ابتسامه مصطنعه:اا… روسندا..انتى جيتى ..الف حمدالله على سلامتك..
روسندا بصتلها ودورت وشها للجهه التانيه بعدم اهتمام .
عزام:انا جمعت الكل هنا ولأن اللى حصل لروسندا ده من فعل فاعل وميتسكتش عليه..
عايده بصت لعزام والغل بياكل فيها:قصدك أننا اللى حاولنا نأزى روسندا؟!!
كرم بصلها بغموض.
عايده:ماهو كلامك بيدل على كده….ناقص تقول أننا اللى سممنالها الخمره..
كرم قاطعها:انا مش قصدى المقاطعه بس…هو مين اللى قال لحضرتك أن فى حد حاول يسمم الخمره لروسندا هانم؟؟؟!!
عايده بصتله وارتبكت وده اللى خلاها سكتت
روسندا بصت لكرم بأعجاب من ذكائه ورده عليها وهى مبتسمه ابتسامه بتظهر إعجابها بكلامه..
عزام بص لعايده ومستنى ردها
انجى اتكلمت بسرعه وحاولت تطلع عايده من الموقف اللى اتحطت فيه:اا..الحقيقه يا خالى عزام انا اتصلت بالمستشفى اللى كنتوا فيها وسئلت عن حاله روسندا وهما بلغونى بكده.
عزام:وانتى عرفتى المستشفى اللى احنا فيها ازاى!؟
انجى بصتله وهنا عايده اتكلمت بحمائيه:عزام انت بتحقق معانا وكأننا فعلا اللى قصدنا نأذيها أو كأنك شاكك فينا ..شوف احنا قاعدين معاك هنا بقالنا قد ايه ومفيش اى مشاكل اتسببنالك فيها حتى ف الشغل انجى واقفه جانبك دايمآ وبتعمل كل اللى بتطلبه منها ودلوقت جاى وتحملنا حاجه احنا ملناش اى دخل فيها …انا مش هقبل اهانه زى دى ومساعده الم هدومى دلوقت حالا ونمشى حتى لو هقعد ف الشارع اهون عندى من انى اتهان انا وبنتى ف بيت اخويا .
عزام: عايده انا موجهتلكيش اى كلام وموجهتش لفاطمه كمان انتى ليه خدتى الكلام على نفسك؟!!
روسندا همست بصوت مسموع:هو بس اللى على رأسه بطحه.
عزام بصلها بتحذير: روسندا…
عايده:لو انت مبتوجهلناش احنا الكلام مين غيرنا هنا؟؟ ..وليه اصلا طلبت نيجى واتكلمت ف الموضوع !!؟؟
عزام:انتى مدتنيش فرصه اقول حاجه..انا فعلا جمعتكوا هنا واتكلمت ف الموضوع وبس عشان اعرف مين الغريب عننا اللى دخل هنا؟؟!!
فاطمه:النهارده مفيش اى حد غريب جى يا عزام بيه .
عزام بصلها:امال السم اللى اتحط لروسندا ف الخمره مين اللى حطه!!
روسندا حاطه رجل على رجل وباصه لعايده ورافعه حاجب واحد :ردى يا عايده هانم..
عايده بصتلها بقرف وبعدت نظرها عنها
عزام:طيب روسندا ممكن تطلعى تستريحى ف سريرك..
روسندا:انا مش هعرف انام ولا هيهدالى بال الا لما اعرف مين اللى حاول يقتلنى..وسع انت كده يا عزومى انا هعرف مين اللى عمل كده بطريقتى
انجى بصتلها وبعدت نظرها عنها.
عزام: روسنداااااا..
روسندا:طيب طيب انا هطلع على اوضتى بس خليك فاكر انى المره دى مش هسكت على الحاجات الغريبه اللى بتحصل ف القصر ده…فاطمه..
فاطمه:نعم يا روسندا هانم؟
روسندا حاطه أيدها على بطنها بألم:تعالى سندينى .
فاطمه راحتلها وسندتها تطلع على اوضتها.
عزام اتنهد بعمق وبص لعايده وانجى:بتمنى تخلوا بالكوا ومتدخلوش حد غريب هنا المرا دى روسندا حد حاول يقتلها ومش بعيد لقدر الله المرا الجايه يكون حد مننا..ده كل اللى انا عايز اقوله..يلا تصبحوا على خير .
عايده وانجى دخلوا للئوضه .
عايده بتدوس على قبضه أيدها بعنف ومغمضه عيونها بغل وعصبيه ويتردد بعدم تصديق:ازاى ازاى ازاى تنفد من الموت وبالسرعه دى!!!!
انجى:كده خالى عزام هيخلى عيونه عليها اكتر وهيقول للحارس بتاعها يخلى باله منها اكتر ..يعنى هيبقى صعب علينا نعمل اى حاجه عشان نخلص منها..
عايده بعصبيه وبتنفى اللى انجى قالته:لا ..مهما يحصل انا مش هسكت ومش هرتاح الا لما اخلص منها .
انجى بصتلها بتفكير وفجاه برقت وبصت لعايده :الكاميرات ..كاميرات المراقبه اللى ف القصر.
عايده :اكيد دى حاجه مش هتفوتنى ..
انجى اتنهدت بأرتياح:كنا هنضيع .
عزام قاعد بيراجع كاميرات المراقبه وبعد مراجعها اتنهد بحيره وتفكير:الكاميرات مفيهاش اى حد غريب دخل …بس مين اللى عمل حاجه زى دى!!!؟
كرم عاد الكاميرات من الاول وركذ اكتر وبص لعزام:عزام بيه فى حد لاعب ف الكاميرات دى .
عزام بصله بأستغراب:وانت عرفت منين؟؟!!!
كرم:الكاميرات بتعيد المقطع ده من اول ما الداده فاطمه قابلت روسندا هانم وقالتلها تجيبلها ازازه الخمره المفروض بعديها روسندا هانم تعبت ودخلنا بيها لهنا بس المقطع ده محذوف وكل اللى بعد كده محذوف وحد وقف الكاميرات على القصر وهو فاضى ..حضرتك فاهمنى؟؟!!
عزام باصصله بتركيز وحاطت ايده على بؤه:بس مين اللى هيجيله الجراه يدخل هنا ويلعب ف الكاميرات كمان؟!!!..الموضوع اخطر من أننا نتجاهله.
كرم:انا اسف انى هقول ده بس اللى عمل كده واحد من القصر…ماهو مش معقول واحد يدخل ويحط لروسندا هانم السم ف الخمره ويلعب فى كاميرات القصر اللى هى اصلا محدش يعرف مكانها غير أصحاب القصر..وبعدين حضرتك موقف حرس على القصر ..ازاى حد هيدخل ويخرج من غير ماحد يحس؟!!!
عزام باصصله ومقتنع جدا بكلامه :مفيش هنا غير عايده اختى وبنتها انجى وفاطمه المربيه بتاعت روسندا ومن وهى صغيره وهى عايشه معانا وانا متأكد ميه ف الميه أنها بتحب روسندا ومش هتفكر تأذيها…مين اللى هيعمل كده؟!
كرم ضم شفايفه بأسف وقله حيله:انا هعمل اللى عليا وهخلى بالى على روسندا هانم واوعدك ابتداء من دلوقت محدش هيتحرك اى تحرك الا وانا على علم بيه.
فى الوقت المتأخر..
روسندا قاعده ف البلاكونه بتكتب ف كتاب مذكراتها..
روسندا حطت القلم على شفايفها وبصت قدامها كأنها سرحت فى حاجه…للحظات افتكرت كلام كرم لما كانوا واقفين عند البحر.
Flash back
لما كنت طفل وكنت ببقى زهقان ومضايق وقتها كنت باجى هنا مع ابويا نقعد على البحر ونشغل قرأن وقتها كنت بحس براحه كبيره…ليه متحاوليش تجربى الاحساس ده؟ 
Back
روسندا غمضت عيونها واتنهدت بعمق :ليه هااا!!…ليه بفكر ف كلام الكأن ده؟؟..انا محدش قبل كده كلمنى كلمتين فكرت فيهم ولا عزام حتى..
نعكشت شعرها بأنزعاج:يااااا اهو ده اللى كان ناقصنى 
وقفت وراحت وقفت قدام التمثال اللى مخطارتلوش اسم:ينفع كده اللى بيحصل معايا ده!!… روسندا تتبهدل البهدله دى ويجى حد يخليها تاكل ف نفسها لا وكمان تفكر في كلامه جنون هااا..
اتنهدت بعمق وبتحاول تنظم نفسها ..ف الوقت ده افتكرت مامتها وده اللى خلا عيونها دمعت واتجمعت فيها الدموع ..قربت من الصوره المحطوطه على الكمودينوا واللى ليها هى ومامتها..مسكت الصوره وبصت لمامتها والدموع اللى بتنزل من عيون روسندا غرقت الصوره:انتى ليه سيبتينى..هااا؟؟؟…انا عملتلك ايه عشان تسيبينى؟؟…هااا ردى عليا..انا عملتلك ايه؟؟!!
رمت الصوره على الأرض بغضب وكرم بص لئوضتها بأستغراب ودخل القصر بسرعه
روسندا بغضب وهى بتشد ف شعرها وبصراخ:انا عملتلك ايه عشان تسيبينى اتكلمى ولا هو عزاب وخلاص هو عزاب لروسندا عشان نعقد روسندا ف حياتها صح انتوا مجانييين..
كرم واقف برا اوضتها ومتردد يخبط عليها ولا لا ..فكر أنه ممكن يرجع ويصحيلها عزام..بس اللى خلاه أتراجع عن تفكيره هو كلام عزام اللى أتردد ف باله وأنه قالها متسيبهاش لوحدها وهى مضايقه لانها ممكن تعمل حاجه ف نفسها..صراخ روسندا وبكلمات بتدل تماما على قله وعى الشخص ده أنه يسئل واحده ميته على أمل أنها هترد عليها وأنها تعترض على قدرها..كل ده أكد لكرم أن كلام عزام صح ميه ف الميه وبردو اكدله أنه ماينفعش يسببها لوحدها وبالذات فى الحاله اللى هى فيها.
كرم خبط على باب اوضتها ودخل
روسندا قاعده على السرير ومملكه راسها بين أيدها رفعت رأسها وبصتله
كرم بصلها وشها كله متغرق بالدموع وعيونها حمر من كتر العياط واعصابها كلها سايبه..حس أنه بيهاود قطته الشرسه عشان يحسسها بحنيه وامان مربيها.
كرم بص لصورتها هى ومامتها الموجوده على الارض مكنش عارف يقولها ايه …ايه الكلمه اللى فعلا هتواسيها؟؟!
روسندا:انت ايه اللى دخلك اوضتى؟؟
كرم بصلها ولسانه عاجز عن الرد.
روسندا وقفت وزأته بعصبيه وبصراخ:انت فاكر نفسك مين عشان تدخل اوضتى من غير استأذان ؟؟؟
كرم بيحاول يهديها من الحاله اللى هى فيها:اا.. روسندا هانم ..ممكن تهدى.
روسندا بتزأه بعنف وبصراخ:أخرج برا انا مش عايز اسمع منك حاجه..
كرم مسك أيدها اللى بتزأه وحاول يهديها: روسندا هانم ..
روسندا قاطعته وبتحاول تسحب أيدها وبتتكلم بصراخ:سيبنى حالا وإلا انا هقتلك حالا ..
كرم صرخ فيها:ممكن كفايه بقى انتى فاكره أن اللى بتعمليه ده هيرجعلك امك ولا حتى هيصلح من حياتك..
روسندا زادت بعياط وصرخت اكتر:انت ملكش دعوه وملكش الحق تتكلم معايا بالطريقه دى
كرم:فعلا انا معنديش الحق اتكلم معاكى بالطريقه دى ..عارفه ليه؟؟..لأن مستوى تفكيرك مش هيجيب مستوى تفكيرى ابدا..انتى بتعملى أقصى حاجه عندك عشان تعبرى عن الغضب اللى جواكى لحد خرج من حياتك وللابد ..بس أنا بحافظ على اللى عندى واللى خايف لايسيبونى هما كمان ..عرفتى الفرق بينى وبينك ايه؟؟
روسندا بصراخ وعياط:انتوا محدش حاسس بيا محدش فكر يفهمنى..
كرم اتكلم بعصبية وبأمل تفتحله قلبها لأن وقتها حالها هيتغير كتير وده اللى عزام طالبه من كرم..مش مجرد حارس بس ومعالج نفسى كمان..
كرم:احنا هنفهمك لو فتحتلنا قلبك..
روسندا بصتله واحساسها كله بيميل أنها تحكيله كل حاجه بتخنقها وكتماهه ف نفسها نفسها فعلا تخرج كل اللى جواها لحد يفهمها..لكن كبريائها غطا على مشاعرها واحساسها كله..
روسندا بعدت عنه ومسحت دموعها وبصتله بمقاومه وكبرياء:برا..
كرم بصلها وهى كررت الكلمه بعصبيه:براااا..
كرم بعد نظره عنها وهز رأسه بإيجاب:طيب..انا هطلع برا…بس اتأكدى انك كل اللى محتجاه هو انك تحكى لحد ويوم ماتقررى تحكى اتأكدى انك لو جيتيلى انا هسمعك وهترتاحى جدا لما تخرجى كل اللى جواكى …معايا أو مع غيرى..
ويسيبها ويمشى .
روسندا فضلت بصاله لحد مامشى قعدت على الأرض وحطت أيدها على وشها وبتعيط…كلام كرم معاها ادالها مجال للتفكير في الموضوع وأنها فعلا محتاجه حد تفتحله قلبها بس يكون الشخص الصح .. روسندا من نوع اللى مابتحبش تبان قدام حد ضعيفه وتصادف إن كل وقت كانت بتحزن فيه أو بتنزل دموعها بتصادف وجود كرم..وكأن قلبها مصر يحكى كل حاجه للشخص ده..
عده اليوم وكل واحد فى همومه ووجع قلبه بيصرخ من جواه ومحدش سامعه..طلعت الشمس وفى اللى منمش من وجع قلبه وكتر التفكير لكن دايمآ لازم نبقى مؤمنين ومع كل شروق الشمس فى امل بيتجدد ف حياتنا وبتتجدد فكرتنا لبناء مستقبل وحياه كامله جديده ..بس الخطوه اللى لازم ناخدها اول حاجه هى أننا نتخلص من ذكريات وأوجاع الماضى كلها..لأن لو كل واحد اكتفى بماضى عاشه لمين هنسيب المستقبل !؟؟
روسندا قاعده بتفكر وباين على عيونها السهتانين سهرها طول الليل…باصه قدامها بسرحان وبتشرب الشاى.
عزام باصصلها وملاحظ سرحانها وأنها مكلتش حاجه ومبتشربش غير الشاى.
عزام: روسندا… روسندا…
روسندا رفعت عيونها وبصتله بأنتباه
عزام:انتى مشربتيش حاجه غير الشاى وبتشربيه من غير سكر وده غلط جدا على صحتك.
روسندا بعدت نظرها عنه وساكته تمامآ سابت الفنجان وقامت من على السفره:عن اذنكوا..
كرم واقف عند الباب وعيونه مركذين معاها..
عزام اتنهد بحزن على حالتها ومزاجها المتقلب يوم بعد تانى.
عزام وقف وبينادى على فاطمه:فاطمه.. فاطمه.
فاطمه راحتله:امرك يا عزام بيه؟
عزام:شيلى الاكل .
فاطمه بصت للاكل وبصتله:بس ياعزام بيه حضرتك مكالتش حاجه ولازم تاكل كويس عشان الدوا 
عزام بضيق:واللهى يا فاطمه النكد اللى الواحد فيه يسد نفس اى حد..
هنا روسندا نزلت على السلم واتكلمت بتكشير :وهو انا مسببالك نكد ف ايه؟؟؟
عزام بصلها وكرم كمان عيونه متشالتش من عليها.
روسندا وقفت قدامه بصلابه :رد…انا منكده عليك فى ايه؟؟..ولا هى تلاكيك وخلاص
عزام : روسندا طريقتك دى متنفعش مع واحد زيى عده الخمسين وداخل ف الستين يعنى شوفى الفرق بينى وبين ابوكى …انتى حالتك وحياتك كلها منكده عليا بيهم كل تصرفاتك الغلط ولبسك وطريقتك وصحابك الولاد كل ده منكد عليا …حياتك اللى بتضيعيها وانتى مش دريانه كل ده منكد عليا..
روسندا:انا حره اعمل ف حياتى اللى عيزاه
عزام:لا يا روسندا مش حره انتى مش عايشه ف دول برا عشان تقوليلى حره…طول مانتى ف البيت ده انا المسئول عنك.
روسندا:اممم..تمام اوى انا بقى مش عايزه بيتك ومش هقعد هنا تانى…ولا هروح عند عادل.
عزام بصلها:امال هتباتى ف الشارع؟؟!
روسندا:انا هوافق على الجواز من كريم..
كرم بصلها وعزام اتصدم من ردها :تتجوزى مين!!!..ده اخر واحد ممكن اوافق على جوازك منه .
روسندا:انا اسفه بس مش انت اللى هتقرر اتجوزه ولا لا ..ده قرارى انا وانا حره فيه…وعلى كل حال انا بلغته موافقتى ومش هتراجع ف كلامى.
عزام بعصبيه: روسندا انتى لو ركبتى دماغك المراه دى هتندمى طول عمرك كريم مش بتاع جواز ومسئوليه ده دلوع امه وسكرى وبتاع ستات..انتى مش ناقصه جنون على جنونك..
روسندا قاطعته:انا قولت بلغته ومش هرجع ف كلمتى…اهو هيحددوا معاد الخطوبه وبعدها نتجوز واسيبلك البيت يفضى عليك ..
مش ده اللى انت عايزه؟؟…انا مش عايزه حاجه من فلوسك اللى انت خايف عليها وبلاش تتعب عشانى انا هسيبهالك خالص .
عزام باصصلها ومش عارف يهددها بأيه مش عارف ايه اللى ممكن يخليها تتراجع عن قرارها المتهور ده…معقول دى تكون النهايه ؟.
..بعد العمر ده كله تسيبينى وتمشى!
روسندا:صح…هما حددوا معاد الخطوبه النهارده..ده اللى انا طلبته….هتيجى تعالى..مش هتيجى زى مانت عايز.
وتسيبه وتروح على أوضتها.
كرم بص لعزام اللى لاحظ عليه التعب.
عزام قعد على الكنبه وملك رأسه بين أيده بتعب وقله حيله:تتجوز كريم!!!…بعد كل الصبر والتعب اللى انا فيه وعمرى اللى ضاع وانا ماشى معاها خطوه بخطوه..تقولى هتتجوز وكريم!؟!..ده اخر واحد اتمنى تكون ليه….ليه بس كده ياربى وانا اللى كنت فاكر انى خلاص ..قربت اعملها بنى ادمه..طلعت ببعد عن هدفى وانا مش حاسس..
كرم باصصله وحاسس بأسف على حاله عزام اللى كل ماده بتسوء وهى ولا على بالها..
للكاتبه/منه محسن [Milly]
كارم قاعد ف الديسكوا مع امينه ومحمود..جاله اتصال من كريم .
كارم:كيمو بيتصل بيا ..هرد وارجعلكوا.
ويخرج برا الديسكوا.
امينه فضلت باصه عليه لحد مارجع وسألته بتحمس وافتقاد:قولى قالك ايه؟؟
كارم بصلهم بأبتسامه:كريم عازمنا على خطوبته النهارده باليل ف فلته..
امينه بصتله بصدمه رجفت قلبها:اييييه!!!…خطوبه.. كريم؟؟
محمود ابتسم بخبث وارتياح:طب والله كويس…فرحتله من كل قلبى
امينه بصتله والصدمه لسه مسيطره عليها..قامت بسرعه خرجت برا الديسكوا واتصلت بيه ..فضلت تتصل كذا مره بس مفيش اى رد وف اخر اتصال قفل تليفونه.
امينه اتنهدت بأنزعاج وضيق ودخلت الديسكوا تانى..خدت شنطتها وجات تمشى.
محمود بصلها وكارم سئل بأستغراب:رايحه فين؟؟ 
امينه مردت ومشيت.
كارم:هى اضايقت عشان كريم هيخطب؟؟
محمود بصله وبعد نظره عنه..
للكاتبه/منه محسن [Milly]
شاهيناز بتخبط على باب بيت شمس جامد ..
مامت شمس:شمس انت يا بت تعالى شوفى مين على الباب..
شمس خرجت من أوضتها بسرعه وراحت فتحت الباب وشاهيناز دخلت بسرعه:سمعت اللى حصل روسندا بنت المجانين …
سكتت لما شافت مامت شمس واتكلمت بتسرع:ااا..ازيك يا طنت..
مسكت ايد شمس:عيزاكى ثوانى.
شمس راحت معاها للئوضه.
وشاهيناز قعدت على السرير وقعدت شمس معاها..
شمس:فى ايه يا بنتى مالك كده متسربعه على ايه؟!!
شاهيناز: روسندا المجنونه انا مش فاهمه بتفكر ازاى ..
شمس:ممكن تهدى وتفهمينى فى ايه..مالها روسندا؟؟
شاهيناز:متصله بيا تقولى بلغى شمس والكل أن خطوبتى النهارده بالليل …تخيلى
شمس بصتلها بصدمه:خطوبتها!!!
شاهيناز هزت راسها بإيجاب:على كريم ابن عمها..
شمس بصالها والصدمه موتتوو سيطره على ملامحها:ازاى !!..اكيد فى حاجه غلط يعنى ..ايه اللى خلا روسندا توافق تتجوز عشان يبقى معاها راجل و يتحكم فيها وف تصرفاتها… روسندا من النوع اللى مبتسمعش كلام حد والخطوه  دى صعبه وكانت بعيده عن تفكير الكل..ازاى ده يحصل؟؟!
شاهيناز:انا كمان اتصدمت نفس صدمتك دى والله حاسه ان ضغطى علي ومش قادره استوعب اللى بيحصل .
ف الوقت ده جى اتصال لشاهيناز ..
شاهيناز مسكت التليفون وبصت لشمس:ده ماذن..ممكن يكون وليد قاله.
شمس:ردى شوفيه عايز ايه
شاهيناز ردت وفتحت الاسبيكر جات تقول الو قاطعها صوته اللى كان باين عليه العصبيه وكأن بركان من الغضب انفجر
ماذن بعصبيه: الخبر اللى انا سمعته ده صح؟؟…انا من الصبح بتصل بروسندا ومبتردش ممكن افهم فى ايه؟
شاهيناز بصت لشمس وكأنها متردده تأكد كلامه..عيونها بتسئل شمس تقوله ايه
شاهيناذ:اا..ايوه يا ماذن…هو ..صح..و..
ماذن قاطعها:نعم ياختى ايه اللى صح!؟ ..انتوا بتستهبلوا ولا ده استعباط ازاى تاخد قرار زى ده ومن غير ماتتصل بيا وتعرفنى على الأقل..انتوا مجانين!
شمس اتكلمت : ماذن محدش مننا كان يعرف الموضوع انا لسه عارفه من شاهيناز وشاهيناز اول ماعرفت جاتلى وكمان هى هتستأذنك ف حاجه خاصه بيها ليه!!
ماذن:ماهو الكلام مش معاكوا..انا عارف هعمل ايه.
ويقفل الخط.
شاهيناز بصت لشمس: هنعمل ايه؟؟
شمس:انتى بتسئلى يا روحى!..العمل عمل ربنا ..شكلها هتبقى خطوبه ايه..لوز اللوز
فى الليل ولما روسندا اشترت الفستان اللى هتحضر بيه الخطوبه..وف قصر عزام.
عايده:يعنى ايه هتتخطب!!..هى لو اتجوزت وبعدت عن القصر مش هنقدر نعملها حاجه…وهتبقى ضاعت علينا ثروه عزام..
انجى :معرفش بقى …على كل حال لسه الايام جايه قدامنا لازم نعمل اى حاجه فى فتره خطوبتها وهى دى اخر فرصه لينا..
بصتلها بتفكير ونفخت بضيق وشرود.
شمس وشاهيناز مع روسندا ف أوضتها بعد مالبست الفستان وخلصت حط الميكب..
شاهيناز: روسندا انتى واثقه من اللى بتعمليه ده؟؟..يعنى بتفكرى بعقل؟
شمس بصتلها :ممكن تفهمينا فى ايه وليه طلعت ف دماغك مرا واحده توافقى على الجواز من كريم؟؟
روسندا وقفت و هى بتبص ف المرايه ولفت وبصتلهم وابتسمت ابتسامه مصطنعه:ايه رايكوا؟؟
شاهيناز اتنهدت بعمق : روسندا بربى..
روسندا:انا مستغرباكوا بجد شكلكوا مضايق وانا اللى كنت فكراكوا هتنبسطوا ليا…اخس بجد اخس.
شمس:احنا اكيد هنفرحلك لو كان ده بمزاجك..لكن انتى عارفه المشكله فين أننا متأكدين ميه ف الميه أن فى سبب يخليكى تتجوزى ابن عمك..
روسندا قاطعتها وبتدارى مشاعرها الحقيقيه ورا وش سعيد مبتسم واثق من نفسه:ولو قولتلك أن مفيش اى سبب وأنى انا اللى عايزه كده …
شمس اتكلمت بتسرع وثقه:كذابه..
روسندا بصتلها .
شمس:ولو حلفتى من هنا للصبح مش هتقنعينى بحاجه مرفوضه تماما..انتى بتكلمى عشره عمر مش معرفه يوم ولا اتنين .
روسندا بعصبيه:يا ريت توفرى كلامك لانى على أخرى ومش ناقصه حضرتك..
شاهيناز:شمس خلاص…بدل مانتى اختارتى كده وفعلا مفيش حاجه زى مابتقولى خلاص زى ماتحبى ..انتى سعادتك من سعادتنا وكلنا اكيد مبسوطين عشانك..بس لو كنتى فعلا مبسوطه بالخطوبه دى..
روسندا بصتلها وبعدت نظرها عنهم ونزلت من الاوضه.
شاهيناز بصت لشمس:انتى كترتى ف الكلام معاها مكنش لازم تنكدى عليها..
شمس بسخريه:وهو انتى شايفه وشها كان مبسوط اوى؟؟…حبيبتى انا مستعده احلف على مصحف أنها لابتحبه ولاعايزاه..
شاهيناز:مينفعش نتكلم ف الموضوع ده دلوقت..دى حياتها وهى حره فيها..يلا ننزل ..
روسندا نازله على السلم وكانت بتمسح دموعها اول مشافت عزام اصطنعت القوه وكملت نزول..
عزام بصلها وقفل مع اللى كان بيتكلم معاه .
روسندا نزلت من على السلم وبصوت عالي: فاطمه… فاطمه..
فاطمه راحتلها بسرعه:نعم يا روسندا هانم؟؟
روسندا بصتلها بأبتسامه سألتها كأنها بتقول لعزام انت وجودك مش فارق معايا :ايه رأيك ف الفستان؟
فاطمه ابتسمت بخفه وحزن:انتى بتحلى اى حاجه تلبسيها..يارب لو فى خير ليكى ف الجوازه دى تكمل.
روسندا بصت لعزام اللى اتجاهلها ومشى
روسندا بصاله وهو ماشى وعيونها مدمعه:امم..شكرا..ممكن تروحى .
فاطمه مشيت وهى مسحت دموعها واتنهدت بعمق وشمس وشاهيناز واقفين على السلم وملاحظينها..
روسندا لفت وبصتلهم وحاولت تكون طبيعيه وتتصرف زى مكانت بتتصرف معاهم:ايه مش يلا احنا اتأخرنا جدا .
شاهيناز بصت لشمس .. نظراتها ليها بتقول تنزل معاهم وتسكت .
شاهيناز نزلت وشمس وراها..
كرم واقف برا القصر وركب العربيه لما خرجوا هو ركب قدام وروسندا ركبت مع شمس ورا وشاهيناز جانب كرم ..
فى فله عادل اللى مزوقينها على الاخر وعاملين مكان مخصص لروسندا وكريم شبيه بالكوشه والاغانى شغاله والأضواء مفيش بعد كده..بعد ما المعازيم كلهم جوم ..
كريم بيبص ف الساعه بتسرع:هى ليه ماوصلتش لحد دلوقت؟؟
مصطفى:الصبر حلو مالك مستعجل كده ليه..
كريم لفت انتباهه دخول صحابه كلهم..واللى مركبين ذقون على حسب كلام كريم ليهم وتحذيراته .
راحوله وهو باصصلهم وبيكتم ضحكته..
مصطفى باصصلهم وهما جايين وبص لكريم:تعرف مين دول يا كريم؟؟
كريم اتعدل ف وقفته وحاول يدارى ضحكه:ايوه يا بابا …دول صحابى ..
مصطفى ابتسم:ماشاء الله ماشاء الله دايمآ اختياراتك صح ربنا يكملك بعقلك ويتملك الجوازه دى على خير..انت ابن حلال وتستاهل كل خير..
كريم ابتسم وحط أيده على بؤه وبيدارى ضحكه..
كارم :احم…السلام عليكم ورحمه الله وبركاته
مصطفى ابتسم وسلم عليهم:وعليكم السلام ورحمه الله وبركاته..اهلا بيكوا صحيح شباب تشرف.
امينه عيونها على كريم .
كريم:ده صاحبى من ايام الجامعه كارم ..
كارم:وكنا بنصلى الجمعه مع بعض ف الجامع لحد دلوقت..
مصطفى ابتسم:ماشاء الله تبارك وتعالى.
كارم بص ف الأرض بهدوء وابتسامه.
كريم حاطت أيده على بؤه وبيضحك:احم…وده يبقى محمود..صاحبى بردو..
مصطفى سلم عليه:كنت بتصلى معاهم فى الجامع بردو ؟؟
محمود بصله ورفع حواجبه:هاا..اا..اه..طبعآ.
بعد ماسلم على الكل وقعدوا ..
مصطفى:انت خريج كليه ايه يا كارم؟؟
كارم:بسم الله الرحمن الرحيم والصلاه والسلام على رسول الله…انا خريج شريعه وقانون..مدرس لغه شرعيه .
مصطفى:ماشاء الله ..
كريم كل اللى عليه أنه بيضحك وهمس لكارم:كفايه لحد كده احسن عارفك بتيجى ف الآخر وتعك.
كارم همسله:متقلقش ده انا هشرفك
كريم:لا ورحمه امك كده كفايه..
امينه انتهزت فرصه كلامهم مع بعض وشدته وهو بصلها.
امينه:عايزه اتكلم معاك..
كريم بتهرب:اا…امينه مش هينفع دلوقت انتى شايفه المعازيم جوم ولازم ابقى موجود معاهم.
امينه: كريم انا عايزه اتكلم معاك فى حاجه ضروريه..
كريم:بقولك ايه انا…
جى يكمل كلامه شاف روسندا وشمس وشاهيناز داخلين الفله وكرم وراهم.
كريم ابتسم وبعد ايد امينه عنه وراحلهم.
امينه بصتله وهو ماشى وبصت لروسندا اللى لفتت انتباهه بجمالها وده اللى زاد غيرتها..
امينه بغل:هى دى السنيوريته اللى ماشى وراها …
كارم برق لما شاف روسندا وشاور لمحمود عليهم:يله يا محمود بص خطيبته ده ليه حق يتجوز …
محمود بصلهم ونظره اتعلق بروسندا كل ماده وكريم بيثبتله أنه احسن منه ف كل حاجه..
امينه راحت قعدت على الترابيه معاهم.
كارم بصلها:شوفتى خطيبه كريم؟…خطيره.
امينه من غير متبصله:شوفتها..
مصطفى راح حضن روسندا بأبتسامه:مبروك يا نور عيونى.
روسندا ابتسمت بخفه وبعدت عنه وبصت لسوسن اللى شكلها باين عليه الضيق.
سوسن وهى رافعه وشها وبتتكلم من مناخيرها:مبروك..
روسندا بعدت نظرها عنها:الله يبارك فيكى..
عادل وسمر راحولهم.
عادل ابتسم وحضن روسندا:مبروووك يا روح قلب بابا.
روسندا ابتسمت بسخريه وهمستله:دلوقت روح قلب بابا!!..منا كنت هندم من كام يوم ..مش ده تهديدك؟؟
عادل بص قدامه وفهم انها لسه مصفيتش من ناحيته ..اتكلم وحاول يغير الموضوع وهمسلها:احم..ايوه طبعآ روح قلب بابا وعشان انا بحبك سحبت القضيه.
روسندا بهمس:تؤتؤتؤ..غلطان..على كل حال الاحسن بلاش كلمه بابا دى..انا بنت عزام ولا نسيت؟؟
عادل بعد وبصلها قدرت تعصبه وتخليه ياكل ف نفسه من جديد.
روسندا بصتله بأبتسامه مستفزه:فنظر الناس يعنى.
عادل لسه باصصلها بعصبيه وغل فاهم أنها بتقوله كده عشان تعصبه وتفكره أنها منسيتش..أو بمعنى أصح موافقتها على الجوازه دى مكنتش ارضائآ ليه..وهى اللى عايزه كده
روسندا سابته ومشيت مع كريم 
عادل عيونه بتوه ف كل مكان مش باصص على حد معين ..نفخ بضيق لكن اللى هداه من عصبيته هو تفكير أنها هتبعد عن عزام ومش هيبقى مضطر يشيل همها أو بمعنى أنه هياخدها من عزام لانه عارف اد ايه هو بيحبها وقدام العيله مش هيتقال عنه الاب اللى سايب بنته تعيش مع جوز امها ..زى مابيتقال عليه..
روسندا وكريم قعدوا على الكنبه اللى مزوقينها ومزوقين المكان حواليها وكأنها كوشه لعروسين…
كرم واقف جانب روسندا وباصص قدامه.
عادل:اا..انا بقول نلبس الدبل دلوقت وبعدها نكمل احتفال..
روسندا بصتله وفهمت أنه عايز يخطبهم بسرعه عشان ماترجعش ف رأيها..
كريم خرج الدبل ومسك أيدها وهى بالها كله شارد ف كلام كرم جملته بتتردد ف بالها(اتأكدى انك كل اللى محتجاه هو انك تحكى لحد اللى جواكى…).
كريم بصلها ولأنه ماددلها الدبله وهى مش بصاله.
كريم: روسندا..
روسندا بصتله بأنتباه وبصت للدبله ..خادتها منه وبصت لكرم من طرف عيونها مش فاهمه هى ليه بتعمل كده وايه اللى هى عيزاه منه حاسه بخوف كبير حواليها مش فاهمه سببه لكن وبتلقائيه عقلها بيرسم صوره عزام ف بالها عيونها بتدور عليه ف كل مكان ..معقول اللى مخوفها عدم وجود عزام!!؟
كرم بصلها من طرف عيونه وفاهم أنها بتدور على عزام.
مصطفى: روسندا لبسى كريم الدبله..
روسندا بصتله بأنتباه وأمينه قاعده على اعصابها وبتدعى الجوازه تبوظ ..كل واحد مخبى جواه كوم من الأسرار مش مجرد اسرار بس دى كوارس محدش عالم بيها ..ويوم ماهتتكشف كل اللى بيحبوا بعض هيبقوا أعداء وظنك الكويس ف الشخص اللى بتحبه..هيتقلب ١٨٠ درجه..
يتبع..
لقراءة الحلقة السادسة : اضغط هنا
لقراءة باقي حلقات الرواية : اضغط هنا
نرشح لك أيضاً رواية اختطفني لأكون له سجينة للكاتبة وفاء كامل

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى