رواية البر التاني الفصل الحادي والأربعون 41 بقلم لولو محمد
رواية البر التاني الجزء الحادي والأربعون
رواية البر التاني البارت الحادي والأربعون
رواية البر التاني الحلقة الحادية والأربعون
مختار / ايه اللى مصحيكي لحد دلوقت
هند / مش عارفه انام
مختار / سيبى الموبايل و سبحى هتنامى
هند تسيب الموبايل و تبصله و تنام فى حضنه
مختار / ما تفكريش
هند / ازاى
مختار / مش عارف بس حاولى
هند / بيوجعك صح
مختار / مش قد ما بيوجعه
هند / هو ما يهمنيش
مختار يبتسم
مختار / بتحصل يا هند فى كل حته بتحصل رجاله اتخانقوا و مسكوا فى بعض بتحصل
هند / لا ما بتحصلش لما تبقوا عيال تبقي تحصل لكن انتوا كبار ما شاء الله و رجاله ازاى تقولى بتحصل
مختار / معاكى حق … والله معاكى حق … بس الواحد لما بيتعصب … انتى عارفه مغاورى مستفز و انا مضغوط و مش ناقص
هند / و بعدين
مختار / ما تشغليش بالك صدقيني مفيش حاجه
هند / هتتخانقوا تانى
مختار / لا
هند / طب و الفرح
مختار يهز كتافه ما اعرفش و يتقلب و يديها ضهره
مختار / نامى و ما تفكريش يا هند
هند / ان شاء الله
هند تدى لمختار ضهرها و هم الاتنين صاحيين
……………..
فى اوضه خديجه
قاعده بتعيط و امها قاعده على كرسي قدامها
ام مغاورى / انا عاوزه افهم انتى بعيطي على ايه
خديجه تبص الناحيه التانيه و ما تردش
ام مغاورى / يعني ابن الزنايته هيبقي اغلى عندك من اخوكى
خديجه / و مال عباده و مال مختار بس
ام مغاورى / يا سلام و اللى حصل فى المخزن
خديجه / هاتيلى دليل واحد ان عباده له يد فى الموضوع انتى ليه جايه عليه اوى كدا
ام مغاورى / انتى اللى ليه محابياله اوى كدا هو اللى خلقه ما خلقش غيره
خديجه / اه ما خلقش غيره هو فى ايه انا مالى بكل ده
ام مغاورى / صوتك بدل ما ارقعلك سداغك يا قليله الرباه يا عديمه الحيا
خديجه عنيها تتملى بالدموع و تبص لامها بحزن
خديجه / انا يا اما !!!
باب الاوضه يخبط الست تقوم تفتح تلاقي مغاورى
مغاورى / بتعملوا حاجه و لا ايه كنت عاوز خديجه فى كلمتين بس لو
ام مغاورى / لا ما بنعملش ادخل
مغاورى يدخل
مغاورى / تقريبا ابويا كان بيسال عليكي
الست / ماشي
الست تمشي و تقفل الباب وراها مغاورى يقفل الباب بالمفتاح و يروح يقعد جنب خديجه و يطلع من جيبه موبايل صغير قديم
خديجه / ايه ده
مغاورى / فاكره التليفونات دى تقعد بالاسبوعين على ما تفصل شحن و مش بس كدا دا يقع منك على الارض يفلقها و يفضل سليم
خديجه تتنهد مغاورى يوشوشها
مغاورى / و ما بتنزلش عليه برامج تجسس
خديجه تبصله
مغاورى / جواه خط و متسجل عليه نمره واحده
خديجه / نمره مين بقي ان شاء الله
مغاورى يبوس راسها
مغاورى / ما كانش المفروض اعمل كدا بس على قد ما بتعصبيني على قد ما بيهونش عليا زعلك
مغاورى يقوم و يفتح الباب و خديجه بتبصله باستغراب يطلع بره و يقفل الباب تمسك الموبايل و تبص تلاقي نمره واحده باسم زوجى تفتحها تلاقي رقم غريب تستغرب و تبص على الباب و تروح ما تلاقيش حد تدخل و تقفل الباب توصل رساله تفتحها
عباده / انا عباده يا خديجه كل اللى بيحصل ده تمثيل
توصل رساله تانيه
عباده / اوعى حد يحس بيكي مين ما كان لازم الكل يشوفك زعلانه كان فرحك اتلغى
توصل رساله تالته
عباده / اقفلى موبايلك التانى و حطيه فى درج و كلميني
خديجه تجرى تقفل موبايلها و تحطه فى الدرج و تفتح باب الاوضه تتاكد ان ما فيش حد بره و تقفل الباب بالمفتاح و تروح تقعد على السرير و تتصل
عباده / السلام عليكم
خديجه / انا مش فاهمه حاجه
عباده / الاول قفلتى موبايلك
خديجه / ايوه
عباده / و اللاب
خديجه / مقفول … استنى
خديجه تروح تشيل اللاب من على المكتب و تحطه فى شنطته و تحطها فى الدولاب و تقفل الدولاب و ترجع تقعد على السرير و تتكلم
خديجه / هو فى حد بيتجسس عليا و لا ايه
عباده / احنا ما نعرفش حاجه كل اللى اعرفه اننا عملنا خطه و لقينا ست زفته بتنفذها قولنا يبقي اكيد ليها عيون وسطينا
خديجه / مين
عباده / مش شرط حد نعرفه و مش شرط تكون هى ممكن يكون حد عاوز يوقع بين العيلتين فلازم يبان انه نجح عشان يتحرك و نعرف هو مين
خديجه / و الموضوع ده هيفضل لحد امتى
عباده / نسال الله التساهيل على فكره ما حدش يعرف الحقيقه غير مختار و مغاورى و انا و الكبير و الحج شاهين و انتى دلوقت عشان ما تزعليش غير كدا مفيش لازم ما حدش ياخد باله انك اتغيرتى لازم الكل يفهم انك زعلانه
خديجه / حتى امى
عباده / مين ما كان اللى عارف الحقيقه لازم ياخد باله طول الوقت ما حدش عارف ان كان فى حد بينقل الكلام و لا بيتجسسوا علينا
خديجه / للدرجادى
عباده / الله اعلم يمكن كدا و يمكن اكتر و يمكن ما فيش حاجه خالص اهو بنعمل حسابنا و خلاص
خديجه / طب و بعدين
عباده / مش عارف
خديجه / يعني ايه مش عارف
عباده / يعني مش عارف يا خديجه كدا كدا كل ده كان هيحصل بس لما نرجع من شهر العسل
خديجه / ايه الكلام ده
عباده / مهو ده الاتفاق اللى اتسرب العيلتين كانوا هيقعوا فى بعض عشان مغاورى يعرف زخانيق الوليه دى و نعرف نضربها فى مقتل
خديجه / و احنا مالنا بيها هى فى حالها و احنا فى حالنا
عباده / كل اللى اقدر اقوله من اللى شوفناه و عرفناه ان الموضوع كبير بس بالنسبالك كل ما عرفتى اقل كل ما كان احسنلك المهم دلوقت انك تاخدى بالك كويس و حاولى الفتره الجايه ما تخرجيش من السرايا و ما تختلطيش بحد
خديجه / طب و انت
عباده / انا هبقى اكلمك كل يوم اطمنك و اطمن عليكي
خديجه / و ابويا لو عرف انى بكلمك
عباده / لا اله الا الله هو مين اللى اداكى الموبايل يا بنت الناس مش ابوكى و بعدين هو انا هعمل حاجه تضرك يا خديجه
خديجه / يووووه قصدى لو امى
عباده / ما ينفعش تعرف ما ينفعش حد يعرف يا خديجه هو انا كل شويه اشرحلك
خديجه / خلاص خلاص ماشى
عباده / انا مش هطول عليكي هبقى اكلمك تانى بكره ان شاء الله
خديجه / ماشى هستناك
عباده / حسبى الله و نعم الوكيل فى اللى كان السبب مش كان زمانك معايا دلوقت
خديجه / كل شئ باوانه
عباده / نص عقلك يارب
خديجه / ما تقولش كدا دا انت العقل كله
عباده / هتوحشيني لبكره
خديجه تبتسم بخجل
عباده / ماشى اتقلى اتقلى سلام
خديجه تقفل السكه و هى مبتسمه اوى فرحانه و فجاه تتخض
خديجه / يا لاهوى البتاع ده لازم اداريه فى حته
خديجه تبدا تقوم و تدور على مكان فى الاوضه تخبى فيه الموبايل
……………………….
فى الشونه تانى يوم
عبد الله قاعد مضايق و الرجاله بتتكلم
راجل 1/ و انت خالت عليك الحكايه دى
راجل 2/ يعنى ايه ما خلصتش على كدا
راجل 3/ لا خلصت ما تنسوش ان فى بينهم نسب
راجل 1/ و هو فين النسب ده ما خلاص
راجل 2/ الجوارحه كلمتهم واحده و فى فاتحه مقريه
راجل 1/ بس ما حصلش دخله لسه يعنى ممكن فى اى ثانيه يتقال مفيش نصيب
راجل 3 / لا كبير الجوارحه و لا كبير الزنايته هيسمحوا بكدا
راجل 4/ تفتكروا بجد ان الزنايته هم اللى حرقوا المخزن زى ما الجوارحه بيقولوا
عبد الله / اى هجص طبعا امال مين اول ناس جريوا يطفوا مش الزنايته
راجل 2/ و بعدين الزنايته هيعملوا كدا ليه ما طول عمرهم علاقتهم حلوه مع الجوارحه
راجل 1/ الا مغاورى و مختار علاقتهم طول الوقت وحشه و اديك شوفت مع اول مشكله مسكوا فى بعض ازاى
عبد الله / مغاورى ما بيعملش احترام لحد
راجل 4/ بيقولوا مختار اللى بدا بالضرب ما تطلعش من مختار الزيني دى
عبد الله / ما ينفعش تخرج اللى قدامك عن شعوره و بعدين ترجع تحاسبه كل واحد و له اخر و ما حدش عارف مغاورى قاله ايه عصبه اوى كدا
راجل 4/ سى مختار على راسنا و احنا مش بنغلطه
راجل 1/ احنا غلابه يا سى عبد الله وقت الجد احنا اللى بنروح فى الرجلين احنا مش قدهم ان كانوا دول و لا دول
عبد الله / اطمنوا ان كانوا دول و لا دول ما حدش هيتعرضلكوا و اصلا الموضوع خلص على كدا و ياريت نبطل كلام فيه عشان يتقفل خالص
عبد الله يسيب المكان و يقوم
……………………….
فى الصيدليه
الدكتور / ينهار اسوح للدرجادى اتارى الناس كلها بتتكلم
راجل / تعرف لو كانوا اى اتنين عادين اللى مسكوا فى بعض ما كانتش فرقت انما دول اتنين من كبارات البلد
الدكتور / بس بيقولوا ان عيله الزيني هى اللى بدات لما حرقت المخزن بتاع عيله الجارحى الا صحيح هو المخزن ده كان فى سلاح صحيح زى ما بيقولوا
الراجل/ اه امال ايه دا كان واحد من اكبر المخازن اللى عندهم
الدكتور / و دا عادى يعنى
الراجل / امال ايه دا مترخص كمان دا الجوارحه عندهم محلات سلاح فى حتت كتير فى البلد
الدكتور / اااه فهمت معلش اصل انا مش من البلد و لسه ما اخدتش على الجو يعنى
الراجل / بكره تاخد
الدكتور / اعزرنى اخرتك حالا اجبلك الدوا بتاعك
الدكتور ياخد الروجته و يبدا يجمع الادويه
الراجل / و لا اخرتنى و لا حاجه اصلا البلد من امبارح و اول ما لهاش سيره غير الموضوع ده
الدكتور / ربنا يصلح الحال الواحد جاى من اخر بلاد المسلمين عشان ياكل عيش يقوم دا يحصل على بختى
الراجل / هههههههههههههههههه لا ان شاء الله خير و تعدى
الدكتور / والله كان فى زبون قبلك كلامه كان غير كلامك خالص الراجل كان متوتر اوى واضح كدا ان فى لعب من تحت الترابيزه
الراجل / ازاى يعنى
الدكتور / انا مش فاهم اوى بس الراجل كان شكله متوتر اوى
الراجل / اسمه ايه الجدع ده
الدكتور / والله ما اعرفش ما انت عارف انا لسه ما حفظتش الناس بس هو كان طويل كدا و مش مليان عريض و لابس جلبيه و عمه و شنبه عريض
الراجل / ما كل رجاله البلد كدا انا اقصد ابيضانى و لا اسمر عنيه ملونه شعره لونه ايه
الدكتور / انا لو متقدم لواحده مش هاخد بالى من الاوصاف دى من اول مره يعنى فى ايه يا حج
الراجل / على رايك هههههههههههههههه
الدكتور / العلاج يا سيدنا الحساب متين تلاته و اربعين
الراجل / هما غلوه و لا ايه
الدكتور / ما انتوا ما بترضوش بالبدايل الرخيصه و بصراحه الدكاتره بتوعكوا دول ما بيتقوش ربنا فيكوا
الراجل / ازاى الكلام ده
الدكتور / هفهمك يا حج طبعا حضرتك عارف ان اى منتج فى الدنيا بيتعمله تسويق و اعلانات و كدا
الراجل / ايوه
الدكتور / اهو شركات الادويه بتعمل الاعلانات بشكل تانى خالص
الراجل / ازاى يعنى
الدكتور / الشركات دى بتبعت مناديب مبيعات و انت عند الدكتور فى العياده ما بيدخلش عليه راجل محترم كدا و شايل شنطه و مش بيستنى الدور بيدخل خمس عشر دقايق كدا و تلاقيهم عارفينه
الراجل / تقريبا اتخايلت بحد كدا مره و لا اتنين مالهم دول يعنى مش فاهم
الدكتور / دول بيشتغلوا مسوقين لشركات الادويه بيخلوا الدكتور يكتب الادويه بتاعتهم للمرضى بتوعه مقابل بقى نسبه من المبيعات فى دكاتره بتطلب فرش للعيادات سفر و مصايف عمره او حج و كل دكتور و شطارته بقى
الراجل / قول والله
الدكتور / اسال اى حد شغال فى مجال الادويه يقولك تسمع عن حاجه اسمها نقابه يا حج
الراجل / طبعا امال ايه
الدكتور / اهو نقابه الصيادله بقى كانت عمله حمله كبيره اوى من فتره بتطالب فيها الدكاتره ما يكتبوش فى الروجتات اسامى ادويه بعينها و يكتبوا الماده الفعاله و الجرعه بس تقول ايه بقى الطمع عاميهم يضيعوا من ايدهم السبوبه يعنى
الراجل / انا اول مره اسمع الكلام ده
الدكتور / كله بيزنس يا حج عمركش سمعت عن دكتور عمل عمليه لواحد من غير ما يكون محتاج عشان ياخد من وراه قرشين تعرف يا حج ان الدكاتره لما تحب تبدا حياتها بتيجي للارياف او الصعيد عشان انتوا طيبين و بتصدقوا كل حاجه انما فى مصر و الحتت دى خلاص الناس فهمت اللعبه و ما عدتش بتاكل معاهم
الراجل / لا اله الا الله حتى صحه الناس بيتاجروا فيها
الدكتور / امال انت فاكر ايه يا حج حسبى الله و نعم الوكيل
الراجل / حسبى الله و نعم الوكيل
الدكتور / ها يا سيد الناس تحب اجبلك بدايل ارخص للدوا اللى معاك ده
الراجل / لا مش عاوزين نتعبك مره تانيه يبقى مش معايا الحمد لله الخير كتير
الدكتور / يدوم العز يا حج
الراجل / مش متين جنيه برده
الدكتور / متين تلاته و اربعين يا حج
الراجل / اتفضل
الدكتور / نورتنى
الراجل ياخد الدوا و يمشى
الدكتور / ابو شكلك بعد كل الرغى ده دا انا لو بتكلم مع جموسه كانت فهمت
ست تدخل شايله عيل على كتفها
الست / السلام عليكوا يا خويا الدوا ده بسرعه الله يخليك
الدكتور / دا لابنك يا ست الكل
الست / اه بس بسرعه الله يسترك
الدكتور / حالا
الدكتور يروح يصرفلها الدوا
…………………………
على القهوه
الرجاله قاعده تتكلم
راجل 1/ انا سالت مجاهد ابنى فى الحوار ده و قالى انه حقيقى
راجل 2/ ايوه بس الكبير ماكد علينا ما ناخدش دوا من غير اذن الدكتور
راجل 1/ ايوه بس الله اعلم ما يمكن الكبير ما عندوش فكره باللى الدكاتره بتعمله و بعدين احنا بنجرى على قوت عيالنا و راس مالنا صحتنا يعنى ما فيهاش لا هزار و لا متاجره و الدكاتره ما ينفعش تتاجر بقوت عيالنا يعنى دا ما يرضيش ربنا
راجل 2/ احنا لازم نتكلم معاه فى الموضوع ده و نعرف راسنا من رجلينا
راجل 3/ انا فى الاول قولت الدكتور ده عاوز يبيع و خلاص
راجل 4/ و انا قولت كدا قولت عنده ادويه موقوف حالها و عاوز يخلص منها
راجل 5/ تلاقى صلاحيتها هتخلص
راجل 3/ لا يا رجاله مش ده اللى كنت بقوله انا روحت لدكتور رفعت فى الصيدليه بتاعته و سالته و طلعلى كتاب كبير من عنده جوه و اكدلى ان الدكتور الاسكندرانى الجديد ده كلامه صح و ان فى فعلا الكلام ده
راجل 2/ ما على كدا بقى احنا اولى بالجنيه
راجل 4/ ما يمكن برده الدوا الرخيص ده مش عارف ايه كدا يتفاعل مع باقى الادويه
راجل 1/ ايوه الكبير قال كدا ان ممكن دول يتفاعل مع دوا تانى و بدل ما يبقوا علاج يبقى سم
راجل 3/ و هو انت صارف الدوا ده من على فرشه ما انت صارفه من صيدليه و الدكتور هو اللى صارفهولك هو الدكتور ده مش متخرج من كليه الصيدله و لا متخرج من معهد صرف صحى
راجل 6/ يعنى اخر كلام هنعمل ايه يا رجاله الوليه كل يوم تزن على دماغى فى الحوار ده خصوصا ان علاج الواد عندى انتوا عارفين
راجل 3/ ربنا يزيح عنه هو لسه ما خفش
راجل 6/ لسه والله و كل مره الدكتور يغير العلاج و دخت بيه السبع دوخات
راجل 4/ قول للكبير يبعتك بيه لدكتور مصر زى ما مصيلحى عمل مع ابن اخته من سنتين فاكر
راجل 6/ و هو الكبير فايق للكلام ده
راجل 7/ و هو لو ما فاقش لمشاكلنا يبقى كبير ازاى
راجل 2/ اتكلم عدل انت بتتكلم عن الحج ناصر الزيني الجدع عمره ما اتاخر عن حد مننا
راجل 7/ انا ما قصدتش حاجه انت هتلبسنى الغلط ليه انا اقصد المشاكل اللى عنده
راجل 4/ كل واحد يعمل اللى عليه احنا نكلمه و نقوله كل الحاجات اللى اتكلمنا فيها دى و لما يبقى الجدع يتاخر نبقى نتكلم
راجل 3/ هو ده الكلام الصح ان شاء الله يوم الجمعه بعد الصلاه نقعد و نحكيله كل حاجه
راجل 5/ و احنا لسه هنستنى للجمعه بيقولك الواد تعبان
راجل 2/ خلاص يبقى نروح دلوقت بقى و نتكلم معاه و اهو بالمره يحطلنا النقط على الحروف فى حوار الجوارحه
راجل 3/ نقط ايه و حروف ايه ما الكبير كان واضح فى كلامه
راجل 2/ اهو نتاكد تانى يمكن قال كدا عشان الجوارحه كانوا موجودين
راجل 4/ و هو الكبير بيغير كلامه و لا بيخاف من حد عشان يدارى منه
راجل 2/ مش هنخسر حاجه لما نتاكد يا رجاله و بعدين ما تسالوهوش انتوا هساله انا
راجل 7/ طب هنروحله و لا ايه
راجل 2/ ايوه دلوقت اهو يلا بينا كدا بربطه المعلم
الرجاله يقوموا و يروحوا مجموعه على سرايا الزنايته
…………………………..
فى سرايا الزنايته
مختار و عباده واقفين فى الجنينه
مختار / للحظه كنت هقولها كل حاجه امبارح
عباده / ما لهمش دخل بكل ده و هم اكتر ناس بيدفعوا التمن
مختار / فدى معاك حق … بس قال يعنى احنا اللى حياتنا فى المهلبيه اوى ما احنا طالع عينا احنا كمان
عباده / طالع عينك امال انا اعمل ايه خلينى ساكت الحجه ام عباده بدات تدور على عروسه
مختار يضحك و يبص الناحيه التانيه
عباده / طب والله ما بهزر مصحيانى الصبح على الخبر السعيد ايه رايك فى بنت المعلم ابو العلا الجزار تيجي خديجه تسمع عشان تولع فى البت و ابوها و البلد بحالها و انا اولهم
مختار / خديجه اعقل من كدا
عباده / بيبقوا عاقلين فى كل حاجه و يجوا عند الحته دى بالزات و ابقى سلملى على عقلك روح كدا قول لهند و لو بهزار انهم عاوزين يجوزوك بس و انت رايح ابقى امن نفسك لحسن انت مش ناقص بسم الله ما شاء الله مغاورى قام بالواجب و زياده
مختار / ههههههههههههههههههههههه مش هرد عليك … اصل هرد اقول ايه معاك حق
عباده / هههههههههههههههههههههههههه
الرجاله توصل على البوابه
عباده / هو فى ايه ؟
مختار / مش عارف تعال نشوف
مختار يشاور للغفير يفتح الباب الرجاله تدخل
راجل 1/ السلام عليكم
مختار / و عليكم السلام خير يا رجاله فى حاجه حصلت و لا ايه
راجل 2/ كنا عاوزين نتكلم مع الكبير لو موجود
عباده / موجود بس خير برده لو فى حاجه قولولى و انا لو اقدر اساعد ما اتاخرش
راجل 1/ طول عمرك ابو الواجب يا سى عباده بس احنا كنا عاوزين ناخد رايه فى كام حاجه كدا
مختار / تمام يا رجاله اتفضلوا فى المضيفه و احنا ثوانى و نناديه
راجل 2/ تسلم يا سى مختار
الرجاله تروح ناحيه المضيفه
مختار / انت بتجادل فى ايه عاوزين الكبير نادى الكبير
عباده / افهم طيب
مختار / يا خبر بفلوس دقيقتين بالعدد و يبقى ببلاش هروح انادى الكبير
عباده يهز راسه و يدخل المضيفه و مختار يدخل السرايا يقابل مريم معديه
مختار / مريم
مريم تقف
مختار / الكبير فين
مريم / فوق
مختار / طب اطلعى ناديه قوليله فى رجاله من اهل البلد عاوزينه فى المضيفه
مريم / حالا
مريم تجرى على فوق و مختار يروح المطبخ يلاقى هند و فاتن واقفين
مختار / دور شاى للمضيفه
فاتن / كام كبايه
مختار / ما عدتش اعملى خمستاشر خليهم عشرين
فاتن / عشرين هو فى حاجه و لا ايه
هند / مين ؟
مختار / مفيش حاجه يا جماعه دول اهل البلد عادى يعنى هى اول مره و لا ايه
فاتن / بنطمن بس مفيش حاجه
مختار / تمام يلا اتجدعنوا
مختار يسيبهم و يمشى
فاتن / احنا هنشوف من دا كتير الفتره الجايه
هند تبص لفاتن و تبص الناحيه التانيه
……………………….
فى المضيفه
ناصر / هو انا مش اتكلمت مع دكاتره البلد قدامكوا فى حوار العلاج ده قبل كدا
راجل 1/ العلاج كل يوم بيغلا و احنا زى ما حضرتك عارف على باب الله
ناصر / و الصيدلى قال ان لنفس الادويه دى بدايل ارخص و الدكاتره بيكتبوا الغالى
راجل 2/ ايوه يا سيد الناس امال احنا جاينلك و تاعبينك ليه
ناصر / ما تقولش كدا امال احنا هنا بنعمل ايه … عباده
عباده / اؤمر يا كبير
ناصر / النهرده كل دكاتره البلد يبقوا عندى رجاله و حريم
عباده / اعتبره حصل يا كبير
ناصر / و الصيادله
عباده / تمام
ناصر / انا هتكلم معاهم تانى و اللى حصل ده مش هيتكرر
مختار / اسمحلى يا كبير بعد اذنك
ناصر يبص لمختار
مختار / الدكاتره بتوعنا بيعرفوا ربنا و اكيد ليهم وجهه نظر فى اللى حصل
ناصر / و انا قولت هعلقلهم المشانق انا هجيبهم اسمعلهم
مختار / الدكتور يكتب العلاج اللى يشوفه مناسب لانه ادرى بشغله و اللى يستتقل العلاج
ناصر / احنا بابنا مفتوح و الكل عارف و المرض ما فيهوش كسوف و لا له كبير لو رجاله البلد ما كانوش قادرين يقفوا على رجليهم البلد هتمشى ازاى و لو ما كانش بالهم رايق و مشغول بعيلتهم هيشوفوا شغلهم صح ازاى المسلم للمسلم كالبنيان و انا برده هعيد الكلام مع الدكاتره ما يكونش عندكوا فكر
راجل 6/ و ابنى يا حج
ناصر / سليمان فين يا عباده
عباده / لسه ما جاش يا كبير
ناصر / ماشى … بكره الصبح سليمان هيعدى عليك بالعربيه لحد باب بيتك ياخدك انت و ابنك و تنزلوا مصر … خلى الرجاله تجهز الشقه
عباده / تمام يا كبير
ناصر / مش هترجعوا الا و انت مطمن على ابنك
راجل 6 يقوم يحاول يبوس ايد ناصر ناصر يسحبها بسرعه
ناصر / استغفر الله انت هتزعلنى منك ليه
راجل 6/ اللهى يسترك اللهى ما يوقعك فى ديقك
ناصر / امين … حد تانى يا رجاله عنده مشكله
الرجاله تبص لبعض
راجل 3/ ربنا ما يجيب مشاكل يا كبير بس كنا يعنى عاوزين نطمن على الوضع فى البلد الفتره الجايه
ناصر / وضع ايه ؟
الرجاله تبص لبعض
راجل 3/ يعنى انتوا و الجوارحه
ناصر / مصارين البطن بتتعارك بس فى الاول و الاخر الضفر عمره ما يطلع من الدم و ان شاء الله ربنا يعمل اللى فيه الخير للبلد و كل الامور تصفى و ترجع المايه لمجاريها تانى
راجل 2/ ان شاء الله يا كبير
عباده / و فى كل الاحوال انتوا ما لكوش دعوه بحاجه كل واحد يركز فى شغله و حاله و ماله و اللى عنده مشكله بابنا مفتوح اكتر من كدا ما تشغلوش بالكوا و تضيعوا وقتكوا فى الحكى فى المحكى
راجل 4/ احنا بس
مختار / كتر الكلام بيكبر المواضيع ما حدش يتكلم فى المواضيع دى تانى و اللى يسمع حد بيتكلم فى الحاجات دى يسكته
عباده / و لو ما عرفش يقولنا و احنا هنسكته بمعرفتنا
ناصر / الناس مش هتبطل كلام يا عباده و احنا مش هنربط اللسنه الناس … بس ان كنا ما نقدرش على اللسنه الناس نقدر نسد ودانا و لا ايه يا رجاله
الرجاله / صح كلامك يا كبير
ناصر / البلد دى بتاعتنا كلنا و ما حدش فيها له فضل على التانى اللى بياكل بياكل من عرق جبينه بس لو اخواتى بيتعاركوا اكيد هتاثر و هضايق بس فى الاول و الاخر الاتنين اخواتى و ما ينفعش اخسر واحد فيهم على حساب التانى و لا ايه يا رجاله
الرجاله / معاك حق يا كبير … عداك العيب يا كبير
ناصر / على بركه الله
الرجاله تبص لبعض و يقوموا يقفوا ناصر يقف
ناصر / على فين … الحريم بيحضروا العشا
راجل 1/ تعبناك و قلينا راحتك
ناصر / ما تقولش كدا و تزعلنى منك بقى … طب والله ما حد متحرك الا اما نتعشى سوا دا انتوا فى بيت الكبير اقعدوا
راجل 2/ يدوم العز يا كبير بس
عباده / جرا ايه يا ابن عمى هو الكبير يتقاله بس برده
الرجاله تهز راسه و يبتسموا و يقعدوا
ناصر / استعجلنا الاكل يا مختار
مختار يهز راسه و يمشى
ناصر / منورين يا رجاله
الرجاله / نورك يا كبير
ناصر يبص لعباده
ناصر / هتفضل واقف كدا كتير مش فى حاجه طلبتها منك و لا ايه
عباده / لا مؤاخذه يا كبير حالا
عباده يطلع يجرى
ناصر / مش عاوزكوا تقلقوا من حاجه محلوله ان شاء الله
الرجاله تهز راسها و هى مبتسمه
…………………….
فى فيلا فيرا
فيرا قاعده بتتفرج على التليفزيون و تقلب بالريمود و هى زهقانه يدخل اتنين شباب متحوطين باربعه بدى بيلدينج فيرا تشاورلهم يمشوا ما يفضلش غير الشابين واقفين ساكتين
فيرا / هستنى كتير
الشابين يبصوا لبعض
شاب 1/ احم مختار الزينى و مغاورى الجارحى مسكوا فى بعض
فيرا / قول حاجه ما اعرفهاش
شاب 2/ العيلتين اتراضوا بس مش ده اللى الناس بتقوله الناس بتقول ان الموضوع مستحيل يخلص على كدا و ان اكيد الجوارحه مش هيسكتوا على المخزن اللى اتحرق
فيرا / ازعل اوى لو سكتوا
شاب 1/ بس الناس بتقول ان الزنايته مستحيل يعملوا كدا
فيرا / ههههههههههههه يا ابنى قول حاجه ما اعرفهاش ما تخلينيش احزنهم عليك
شاب 1/ الناس لموا بعض سرايا الزنايته و قعدوا وقت طويل و الزنايته لموا كل الدكاتره و الصيادله بما فيهم الراجل بتاعنا و اتكلموا لمده تلت ساعات عن الادويه و البدايل
فيرا تنتبه
شاب 1/ الروجتات هتتعدل الدكتور هيكتب اكتر من بديل فى نفس الروجته لكن برده ما فيش اى دوا هيتصرف من غير روجته
فيرا / يوووووه بقى
شاب 2/ لو سمحتى انا عندى فكره فى الموضوع ده
فيرا / اتفضل
شاب 2/ احنا ليه عاوزين نبيع البى كاى فى الصيدليه حبايه واحده كفايه عشان يدمنوا الحبايه لو اتحطت فى كبايه شاى فى ازازه حاجه ساقعه فى علبه عصير
فيرا / انت فاكرنى ما فكرتش فى كدا … بمجرد ما هتظهر عليك اعراض الانسحاب هيجروا بيك على المستشفى و مش هيعرفوا فيك ايه هتتحجز يوم اتنين و هتطلع .. الكل هيدور ايه اللى حصل و ليه ما حدش هيفكر فيك و لا هيدور عليك غير اكتر ناس احنا مش عاوزينهم ياخدوا بالهم اننا بنحاول ندخل وسطيهم و ساعتها لو وقفنا على راسنا مش هنعرف ندخل وسطيهم … اتمنى تكونوا فهمتوا لانى بجد بدات افقد الامل ان الاقى فيكوا واحد … واحد بس بيشغل عقله فى البلد دى
الشابين يبصوا لبعض
فيرا / الناس لازم ترجع الصيدليه عشان تشترى العلاج لازم يبقوا عارفين ان الوجع و التعب مش هيروح غير بالدوا بتاعنا لازم يجروا ورانا على انهم مرضى تعبانين و احنا اللى بنديهم العلاج مش بنسمهم
الشاب 1/ كان فى واحد من الناس ابنه تعبان الزنايته هياخدوه مصر يعالجوا ابنه لو اى حد تعب و ما خفش الزنايته هتلف بيه مستشفيات مصر لحد ما يلاقى علاج يعنى لو واحد اشتكى انه ما بيخفش الزنايته برده هيعرفوا بوجودنا
فيرا تسحب مسدس و تضربه فى دماغه الشاب 2 يبص عليه و على فيرا
فيرا / قولتله ما يخلينيش ازعلهم عليه ما سمعش الكلام
شاب 2 يبص فى الارض
فيرا / انا عارفه انك ما سالتش بس انا هقولك على كل حال … طول ما العلاج موجود و انت قادر على تمنه هتروح تشتكى الكبير من ايه هتقوله ايه انا ما بخفش الكبير مش ربنا مش هيقدر يخففك
فيرا تشاور للشاب يمشى يطلع يجرى و يدخل رجاله ينضفوا المكان و يشيلوا الشاب اللى ميت
فيرا / انا بعانى فى البلد دى
……………………….
فى اوضه خديجه
خديجه نايمه فى السرير و بتكلم فى التليفون
خديجه / ما خرجتش من اوضتى طول اليوم ما اتكلمتش مع اى حد بالعافيه خليت امى تدخلى الاكل بس ما كلتوش
عباده / طول اليوم من غير اكل امال قولنالك ليه
خديجه / خايفه يا عباده
عباده / لا اله الا الله
خديجه / حاسه انى بعمل حاجه غلط
عباده / احنا اللى غلطنا لما قولنالك
خديجه / ما كانتش هتفرق صدقنى كنت هبقى فى نفس الوضع برده
عباده / تعرفى البلاد اللى حوالينا مليانين خير بس الدنيا كلها عينها على مصر الحرب ما وقفتش على بره مصر بس المدن اللى حوالينا مليانه رجاله بس بنت الكلب دى سابتهم و حطت عينها على بلدنا و رجالتها
خديجه / و اخرتها
عباده / لو عليا اقلعها من جذورها بس اخوكى بقى شايف اننا مش قدها
خديجه / تبقوا مش قدها يا عباده انت عارف مغاورى اكتر منى ما يقولش انه مش قد حد بسهوله
عباده / عارف هنجيب اسلحه اقوى هنماطل فى الوقت لحد ما نكبر و نبقى قدها و زياده
خديجه / و هى هتسكت لحد ما تقوا هتستناكوا تجهزوا و تخلصوا عليها
عباده / اكيد لا سنين و انا بزن فى نفس السيره و ما حدش بيسمعلى هنعمل ايه بسلاح حديث هنبيعه لمين و لا هنستخدمه فى ايه هو احنا هنحارب اخرنا البندقيه و المسدس ادينا هنحارب من غير سلاح اهو اياكش يرتاحوا
خديجه / كان عندنا سلاح فى المخزن اللى اتحرق
عباده / كان هيفرق فى ايه يا خديجه
خديجه / هو ايه اللى كان هيفرق فى ايه المخزن ده دون عن باقى المخازن كان بتاع اخويا امال انت فاكر اشمعن ده اللى اتحرق
عباده / قصدك ايه يا خديجه اتكلمى علاطول
خديجه / مغاورى كان بيجمع السلاح كان بيحب يجيبها و يتمرن عليها و يعينها لروحه و كان عامل المخزن ده للاسلحه بتاعته ابويا كان دايما يتمالس عليه و يسميه المتحف
عباده / انت متاكده من الكلام ده
خديجه / ايوه لو سالت اى حد من السرايا عندنا هيقولك
عباده / من السرايا هيقول لكن من بره السرايا
خديجه / ما اعرفش بس انت عارف احنا مش مسموحلنا ننقل اى كلام سمعناه جوه السرايا لحد و لا حتى نتكلم فى شغلهم لا ارى لا اسمع لا اتكلم
عباده / طبعا
خديجه / بتفكر فى ايه
عباده / و لا حاجه اقفلى و ارتاحى و كلى اهم حاجه تاكلى انا مش هاجى اخدك الاقيكي ضعفانه هعمل بيكي ايه ساعتها
خديجه تبتسم
عباده / كلى يا خديجه كلى و ما تحزنينيش كلى
خديجه / حاضر
عباده / ارتاحى و انا هكلمك بكره تانى عاوزك بكره احسن ممكن ؟
خديجه / خد بالك من روحك
عباده / خد انتى بالك منها و اكليها كويس
خديجه تبتسم و تبص فى الارض
عباده / هتوحشينى
خديجه / و انت كمان
خديجه تقفل و هى مبسوطه اوى تقوم تكشف صينيه الاكل و تاكل بنهم و هى مستمتعه
…………………………
فى اوضه هند
هند بتلعب على الموبايل مختار يخرج من الحمام تحط الموبايل و تبصله
هند / و اخرتها يعني
مختار / اخره ايه
هند / اخره الجوازه انت مش بتقول مش هينفع تتم دلوقت
مختار / يا هند الجو متواتر بينا و بينهم مش شايفه يعني ؟
هند / و هو فى حاجه تحسن الجو اكتر من النسب
مختار / الموضوع مش بالبساطه دى
هند / و ايه اللى كبر الموضوع للدرجادى
مختار / النصيب ما يمكن ما لهمش نصيب فى بعض
هند / ما تقولش كدا تف من بقك
مختار / انا ما بقولش و مش عاوز ده خديجه بنت كويسه و اكيد اتعلقوا ببعض خلاص بس ساعات فى حاجات بتحصل اقوى مننا و بيتهيالى انا و انتى جربنا ده قبل كدا
هند / وضعنا كان مختلف
مختار / كلو نصيب كل حاجه بتحصل فى اوانها هتتاجل تتاجل لحد ما يجي اوانها و تحصل
هند / بعد ايه بقي
مختار / لا اله الا الله
هند / يعني الكبير لو لم الرجاله كدا و عملوا قعده عرب كدا و الناس قعدت مع بعض و الحاج شاهين قعد كدا مع الحج شاكر مش هيعرفوا يلموا الليله و يتمموا الفرح يعني
مختار / سبيها لله
هند / احنا لازم نبينلهم اننا باقيين عليهم خديجه كمان لازم تحس ان عباده باقى عليها لازم يروحلها كل شويه و يتكلم مع اهلها مره و اتنين و تلاته هى برده خطيبته
مختار / سبيها لله
هند / حتى لو اجلتوا الموضوع عشان حوار التلاته اللى ماتوا ما ممكن يعملوا كتب الكتاب على الضيق و زفه عربيات و يسافروا يقضوا شهر العسل و لما يرجعوا
مختار / انسي الكلام ما ينفعش
هند / طب ما احنا ناجل الفرح و لما نيجي نعمله تانى حد تانى يموت و نفضل ناجل ناجل و بعدين يعني ما الحى ابقي من الميت
مختار / و لو كان الميت ده من عندك ما كنتيش هتضايقي و تقولى بيفرحوا و مش مراعيين حزنى
هند / انا ابويا ميت بقاله قد ايه يا مختار
مختار يبص الناحيه التانيه بندم و هند عنيها تتملى بالدموع مختار يبصلها و يوطى على راسها يبوسها
مختار / حقك عليا
هند / فى ايه ؟ على فكره لو ما كانتش خديجه و عباده غاليين عندى انا ما كنتش اتكلمت
مختار / عارف
هند / و بعدين
مختار / سبيها لله يا هند ابوس ايدك سبيها لله
هند / و نعم بالله انا بس
باب الاوضه يخبط هند و مختار يبصوا لبعض باستغراب مختار يشاور لهند تدخل الحمام و يقوم يفتح الباب
مختار / ثوانى
مختار يفتح الباب يلاقى عباده واقف بعيد و باصص فى الارض مختار يشد الباب و يقفله و يروح لعباده
عباده / حقك عليا لو كنت
مختار / ايه اللى حصل
عباده يبص حوالبه
عباده / تعال نقعد فى المضيفه شويه
مختار / ثوانى و احصلك
عباده يهز راسه و ينزل و مختار يدخل الاوضه
هند / فى حاجه و لا ايه
مختار / مخنوق و محتاج حد يتكلم معاه هنزل اقعد معاه شويه تمام
هند / تمام
مختار ياخد موبايله و يمشي و يقفل الباب وراه
……………………….
فى المضيفه
مختار / لو اللى بتقوله صحيح يبقي اللى نقل الكلام حد من الجوارحه
عباده / جايز بس ازاى هو انت ما تعرفش الجوارحه
مختار / عارفهم بس خديجه كمان من الجوارحه و قالت
عباده / انا جوزها
مختار / لسه و حتى لو ما يمكن هم مش عاوزينك تعرف اديك قولتلى ما كانش يصح و انت كمان ما ينفعش تشجعها على الكلام ده
عباده / من امتى كان فى بينا و بين الجوارحه الكلام ده اصلا
مختار / هم احرار … حقهم … يقولوا اللى يعجبهم و يخبوا اللى يعجبهم
عباده يبص الناحيه التانيه و يشوح بايده مختار يتنهد
مختار / تمام ادينا حطينا ايدنا على اول الخيط و فيرا ليها عين وسط الجوارحه … طب ما يمكن صدفه
عباده يبص لمختار بطرف عينه
مختار / هنعرف الخاين منين
……………………
فى منطقه فاضيه
عباده و مغاورى راكنين عربياتهم
مغاورى / انت عبيط و لا ايه الجوارحه ما يعملوش كدا
عباده / مين تانى كان يعرف
مغاورى / ما انت عارف اهو
عباده / انا لسه عارف امبارح
مغاورى / و انا اش درانى بقي ان شاء الله
عباده / ما تتعدل يا مغاورى الحق عليا انى بوعيك يعني
مغاورى / بتوعيني و لا بتوقع بيني و بين اهلى
عباده / لا اله الا الله انا كنت فاكرك اعقل من كدا و انا و انت ايه يا مغاورى
مغاورى / هفكرك بكلامك ليا انا و ابن اخويا على ابن عمى
مغاورى يركب عربيته عباده يروح يقف قدامها مغاورى ينزل
مغاورى / عاوز ايه تانى
عباده / لا انا و لا حد من اهلى لا عمرنا غدرنا و لا هنغدر بيكوا يا مغاورى
مغاورى / و لا اهلى هيغدروا يا ابن الزيني وسع
عباده يوسع مغاورى يسوق زى المجنون و عباده بينفخ
…………………
فى سرايا الزنايته
عبد الله واقف فى الهول شايل صينيه ملفوفه فى كيس انتصار تدخل
انتصار / منور منور يا زينه الشباب تعال اقعد اتفضل
عبد الله / معلش انا والله ورايا شغل بس ماما بقى صممت انى اجيب دى و هى سخنه صينيه ام على
انتصار / الله دا الكبير بيحبها اوى تسلم ايدها تعبت روحها
عبد الله / تعبك راحه ما تقوليش كدا
عبد الله يبص يمين و شمال و انتصار كاتمه الضحكه جواها و بتبصله
عبد الله / امال هند فين اسلم عليها
انتصار / فوق فى اوضتها انا خليت الواد عمر يطلع يقولها انك هنا … مش عاوز تسال عن حد تانى
عبد الله / ينفع ؟
انتصار / ههههههههههههههههههه ما انا بعتلها هى كمان اقعد ارتاح زمانهم نازلين حالا اعملك ايه قهوه و لا شاى و لا اقولك انا عامله حواوشى يستاهل بقك هسويلك رغفين سخنين فى السريع
عبد الله / لا لا انا مش جعان تسلم ايدك
انتصار / عيب يا عبد الله دا حواوشى ام فاتن اللى لا دوقت و لا هتدوق زيه
عبد الله / ماشى
انتصار /ايوه كدا اقعد ارتاح و انا عشر دقايق و اجبهولك سخن
عبد الله يبتسم و يقعد و انتصار تروح المطبخ هند و مريم ينزلوا
هند / اتارى البيت منور
عبد الله يقوم يقف
عبد الله / منور باهله ازيك
هند / الحمد لله تمام ماما ما جاتش معاك ليه
عبد الله / بتروق البيت
عبد الله يبص لمريم و يبتسموا
هند / اتوزع و لا ايه
عبد الله / لا يا اختى خليكي
هند / ههههههههههههههههههه
مريم / اخبار الحضانه ايه
عبد الله / محلك سر ما فيش جديد اديكى شايفه الدنيا مش عارفين نعمل حاجه و لا نروح و لا نيجي
مريم / ان شاء الله خير انا لقيت كام حاجه على النت هبقى ابعتهالك على الواتس شوفها و ريها لخالتى و ان شاء الله تنفع
عبد الله / ما اتحرمش
مريم تبص فى الارض عبد الله يحط ايده فى جيبه و يطلع دبدوب صغيره خالص فرو و يديه لمريم
عبد الله / بتحبى الحاجات دى انتى
هند / و انا فين
عبد الله / جوزك يجيبلك و انا خلفتك و نسيتك
مريم تضحك و تغطى بقها بايدها عبد الله يبتسم و هند متابعه
هند / هى بقت كدا ماشى ماشى عشان مريم حبيبتى بس …هعمل باصلى و اروح ابص على ام فاتن فى المطبخ يمكن تكون محتاجه مساعده و لا حاجه
عبد الله / خدى راحتك خدى راحتك
هند تضحك و تضرب كف على كف و تمشى
عبد الله / وحشتينى اوى
مريم / ما انا كنت لسه معاك
عبد الله / معايا فين بس دا حياله بشوفك من بعيد
مريم / و انت يعنى عاوز ايه اكتر من كدا
عبد الله / والله الطمع فى الحاجات دى حلو بس الصبر احلا
مريم تبص فى الارض و هى مكسوفه
عبد الله / هو انا ما وحشتكيش
مريم / يعنى
عبد الله / هعمل مصدق هعمل مصدق
مريم / شكرا على الدبدوب
عبد الله/ هو ما بيقولش اى لوف يو بس انا بقولها عادى
مريم تضحك و تبص فى الارض و سماح بتبص عليهم من فوق السلم
…………………….
فى سرايا الجوارحه
مغاورى يدخل سايق زى المجنون و يركن العربيه و ينزل منها و يدخل السرايا
مغاورى / خديجه فين ؟
ام مغاورى / فى اوضتها فى حاجه و لا ايه ؟
مغاورى يطلع يجرى على السلم و الكل بيبص عليه و بيستغرب مغاورى يرزع على باب خديجه خديجه تفتح الباب يزقها و يدخل يقفل الباب بالمفتاح
خديجه / فى ايه ؟ فى حاجه حصلت
مغاورى / انتى قولتى ايه لعباده عننا ؟
خديجه / فى ايه ؟
مغاورى / ما تستهبليش هو قالى كل حاجه
خديجه / طب بالراحه و اهدى عشان اعرف افهم منك و ارد عليك
مغاورى / انتى قولتيله على مخزن السلاح بتاعى
خديجه / دا كان فى وسط الكلام والله
مغاورى / فى وسطه و لا اوله امتى الكلام ده
خديجه / امبارح
مغاورى / و قبل كدا كنتوا بتتكلموا فى ايه قولتيله ايه تانى عننا
خديجه / انا مش فاهمه حاجه هو ايه اللى حصل
مغاورى / ما تجاوبى على السؤال ما تخلينيش اتغابى عليكي
الدموع تملا عنين خديجه
خديجه / انا عملت ايه لكل ده
مغاورى / اسرار اهلك و اهل بيتك ما تطلعش بره يا خديجه عرفتى عملتى ايه
خديجه / هتفرق فى ايه ما كلها راحت انا ما قولتلوش غير على المتحف بتاعك و ان السلاح اللى كان ممكن نقف فيه قدام الحربايه دى راح و رب الكعبه ما قولت غير كدا
مغاورى /و مش هتقولى ما تجننينيش يا خديجه لو فى يوم …النهرده و لا بكره و لا بعد مليون سنه وقفتى بينا و بين الزنايته هتختارى اهلك انتى فاهمه و لا لا
خديجه تزعق و مغاورى يتعصب و يتكلموا بعصبيه
خديجه / لا ما افهمش
مغاورى / انتى بتقولى ايه يا بت
خديجه / بقول ما اقدرش ما اقدرش اقف بين جوزى و اخويا ما اقدرش اقف بين جوزى و اهلى ما اقدرش اقف بينكوا ما تحطونيش بينكوا
مغاورى / لو الظروف حكمت
خديجه / ما تحكمش ما تجيش دلوقت و تحكم انا ما جبتش عباده انا ما دخلتوش البيت انا ما قولتلوش تعال اخطبنى انتوا اللى جبتوه انتوا اللى قولتولى انه كويس ما تجوش دلوقت و تقولولى اقفى بينا و بينه عمل ايه عباده لكل ده
مغاورى يتصدم
خديجه / لو عمل ؟ لو معاك دليل واحد انه عمل
خديجه تروح تفتح الدولاب و تطلع المسدس مغاورى عنيه توسع
خديجه / قولى و انا اقتله بايدى
مغاورى ساكت
خديجه / اتفاقكوا انكوا تبانوا متخانقين تبينوا لبنت الكلب دى انكوا متخانقين انها نجحت انها تفرق بينكوا انتوا بتمثلوا يا مغاورى انتوا بتمثلوا … اوعى تكدب الكدبه و تصدقها عشان انا مش هقدر اصدقها مش دلوقت
مغاورى / النهرده و لا بكره و لا بعد مليون سنه
خديجه / انتوا ما ربتونيش على كدا انا مش هقف بينك و بين جوزى انا هقف مع الحق حتى لو مع الغريب
مغاورى / انصر اخاك ظالما او مظلوما
خديجه / كمل الحديث يا حافظ كتاب ربنا كمل الحديث
مغاورى / هاتى التليفون اللى معاكى
خديجه / لا
مغاورى / هعد من واحد لتلاته هاتيه بالزوق احسنلك
خديجه/ عنك انت … واحد
خديجه تفك الامان فى المسدس و تشد الاجزاء
خديجه / اتنين
خديجه تحط الموبايل على دماغها مغاورى يتفاجئ
خديجه / تحب تقول تلاته و لا اقولها انا
مغاورى / نزلى السلاح يا خديجه بلاش جنان
خديجه تنزل السلاح و تديهوله و تروح تاخد الموبايل من تحت المرتبه و تديهوله و تقعد على طرف السرير بتعيط مغاورى يروح ياخدها فى حضنه و يطبطب عليها
خديجه / انت اللى ادتنى الموبايل انت اللى قولتلى كلميه
مغاورى / عارف
خديجه / ما تبقاش انت و الدنيا عليا ما تحطهوش فى حياتى و تشيله و ترجعه و تشيله و كانى ما ليش قلب كانى لعبه ما بتحسش
مغاورى / لو جواكى ربع اللى جواكى هتحسى بيا
خديجه / لو مش عارف مين حبيبك من عدوك يا مغاورى تبقى كارثه كبيره لو مش عارف تثق في مين و تتسند على مين تبقى مصيبه
مغاورى يبص فى الارض
خديجه / انا غلطت لما قولتله ان السلاح اللى راح كان بتاعك
مغاورى / انتى ما غلطتيش يا خديجه انا اللى بتخبط و مش عارف اقف على رجلى العيب فيا مش فيكي مش قادر اصدق ان الخاين مننا احنا مش منهم
خديجه / ايه ؟
مغاورى / من يوم ما المخزن اتحرق و انا النار قادت فى قلبى انا بتهم الزنايته و اتخانق معاهم و اقول كلام اهبل و اطلع نفسى اهبل عشان مش عاوز اصدق ان الخاين مننا جيت عليكي عشان مش عاوز اصدق ان فى حد من البيت ده خان العيش و الملح
خديجه / مين
مغاورى/ اه لو اعرفه اااااه على اللى هيشوفه منى
خديجه تبص فى الارض
مغاورى / انتى ما قولتيش لعباده او لاى حد قبل كدا
خديجه / اقسم بالله امبارح بس
مغاورى يهز راسه بحزن
خديجه / هتعمل ايه
مغاورى / هدور على التفاحه البايظه قبل ما تبوظ باقى المحصول
خديجه تهز راسها
مغاورى / من بكره تنزلى وسط الحريم و تتعاملى عادى و كل كلمه تسمعيها تيجي تنقليهالى … تنقليهالى انا يا خديجه مش حد تانى
خديجه تبصله بحزن و تهز راسها
مغاورى / و ما تخليش حد يحس بحاجه و انا عن نفسى هراقب باقى الرجاله و النهرده و لا بكره هيبان هيبان هيروح مننا فين يعنى
خديجه تهز راسها مغاورى يحضنها و يبوس راسها
مغاورى / حقك عليا
خديجه / حقك انت عليا
مغاورى / بس حلوه الحركه بتاعه المسدس دى بتهتيني بمسدس فاضى
خديجه تضحك و تبص فى الارض
مغاورى / و الله يا خديجه لو كان مسدس ميه حتى قلبى كان هيقع فى رجلى برده دا كلو الا انتى يا بت
خديجه تبتسم الباب يخبط الاتنين يبصوا لبعض مغاورى يقوم يفتح الباب يلاقى امه
ام مغاورى / فى ايه يا ولاد مالكوا
مغاورى / مالنا
ام مغاورى / جاى من بره تجرى و صوتكوا كان عالى و فجاه سكتوا ايه اللى حصل
مغاورى / انتى مش عارفه ست الدكتوره يعنى و تنطيتها علينا
خديجه / انا !!!
مغاورى / دكتوره ما دكتوراش هتفضلى اختى الصغيره و كلامى يمشى عليكي فاهمه و لا لا
خديجه / حاضر
مغاورى / انا ماشى عشان ورايا شغل يلا بالاذن
مغاورى يمشى
الست / فى ايه يا خديجه
خديجه / ما فيش حاجه يا امه انتى لسه هتعرفيه النهرده
الست / هتفضلى حابسه نفسك فى الاوضه كدا كتير
خديجه / لا نازله معاكى
خديجه و الست ينزلوا
…………………………
فى شقه عبد الله
عبد الله يدخل و يقفل الباب مفيش صوت و لا حد
عبد الله / انا جيت
مفيش صوت
عبد الله / نورت البيت
مفيش صوت
عبد الله يفتح باب اوضه مامته يلاقيها نايمه و ياسمينا فى حضنها يعدلهم الغطا و يدخل اوضته و يمدد على السرير و هو مبتسم تجيله رساله يطلع الموبايل من جيبه و يفتح الرساله واتس يلاقى صوره الدبدوب جنب البرفيوم اللى كان جايبه يبتسم و يكتب و مريم ترد على الواتس
عبد الله / ممكن تصوريلى حاجات احلى بكتير من كدا
مريم / زى ايه
عبد الله / مرايتك مثلا
مفيش حاجه توصل عبد الله يقوم يقعد و يكتب
عبد الله / لو مش عاوزه بلاش
توصل صوره عبد الله يبتسم و يفتحها يلاقيها المرايه من زاويه مريم مش باينه فيها يضحك
عبد الله / لا مش باينه
مريم تبعت سمايل بيطلع لسانه عبد الله يبعت اسمايل بيعيط
عبد الله / الصوره هتصبرنى لحد ما ربنا يكرمنى و يقرب الاصل
مريم / لا
عبد الله / عيب ؟
مريم / ما انت لو معاك الصوره الاصل مش هيوحشك … و ساعتها مش هتجيلى
عبد الله / هاجى
مريم / خلاص يبقى مش هتحتاج للصوره
عبد الله / ماشى
شيرى تدخل و هى بتدعك فى عنيها
شيرى / انت جيت يا حبيبى
عبد الله / ايوه يا ماما لسه واصل
شيرى / اغرفلك
عبد الله / لا اكلت حواوشى عند ام فاتن
شيرى / على العموم منابك جوه لما تجوع قولى اسخنلك
عبد الله / تمام
توصل لعبد الله رساله
شيرى / هروح اللم الغسيل و اكويه خد راحتك
شيرى تبتسم و تقفل الباب و تمشى عبد الله يبص فى الموبايل
مريم / نمت
عبد الله / معلش ماما صحيت كنت بتكلم معاها
مريم / روحلها اقعد معاها شويه و نتكلم وقت تانى
عبد الله / هتوحشينى
مريم / كويس يلا سلام
عبد الله يبوس الموبايل و يقوم يروح يساعد مامته فى لم الغسيل
شيرى / اديتها الدبدوب
عبد الله / مش هتبقى انتى و بنتك عليا
شيرى / هههههههههههه لا و على ايه ربنا يهديلك الحال
………………………..
فى اوضه مختار
مختار / ههههههههههههههه طب عشان تعرفى بقى انا لما جبتلك الدبوب كان بيبوس و يقول اى لوف يو
هند / ما هو قالها هبقى اقول انا
مختار / و انا ما بقولش و لا ايه
هند / امممم سبنى كدا افتكر كنت بتقول ايه فاكر يوم دخلتنا اول مره اشملك ريحه حلوه
مختار / قلبك اسود
هند / كلمت ناصر
مختار / فى ايه ؟
هند / اللى اتكلمنا فيه امبارح
مختار / لا و زنانه كمان ما شاء الله متعدده المواهب
هند / دى اخرتها يعنى … مبسوط من حالته يعنى امال لو ما كانش جالك فى عز الليل يشكيلك همه
مختار يقوم يحضن هند تعمل مقموصه
هند / عاوز ايه انا مخصماك
مختار / انتى مش قولتى لما تبقى متوتره احضنك ادينى بحضن اهو هو مش شغال و لا ايه
مختار يحضن اجمد هند تبتسم
مختار / اشتغل اهو … هو بس الزرار بيعلق شويه فى الاول بس بعد كدا بيشتغل زى الحلاوه
هند تضحك و تبص الناحيه التانيه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
تعليق واحد